যোৱা বছৰ ২২ এপ্ৰিলত পাকিস্তানৰ সমৰ্থিত সন্ত্ৰাসবাদীয়ে পেহেলগামত এক ভয়ংকৰ আক্ৰমণ চলাইছিল। এই আক্ৰমণত ২৬ জন লোকৰ মৃত্যু হৈছিল। ইয়াৰ পিছতেই ভাৰতীয় সেনাই অপাৰেচন সেন্দূৰ চলাই পাকিস্তানক উচিত শিক্ষা দিছিল। মঙলবাৰে ভাৰতীয় সেনাই এক্স হেণ্ডেলত এটা পোষ্ট কৰি চুবুৰীয়া দেশখনক পুনৰ এবাৰ সেই কথা মনত পেলাই দিয়ে। সেনাই কয় যে কিছুমান সীমা কেতিয়াও অতিক্ৰম কৰিব নালাগে, নহ‘লে ইয়াৰ পৰিণাম বৰ ভয়ানক হয়। পেহেলগাম আক্ৰমণৰ এবছৰ সম্পূৰ্ণ হোৱাৰ দিনাই ভাৰতীয় সেনাই পাকিস্তানক এইদৰে কঠোৰ সকীয়নি দিছে।
ভাৰতীয় সেনাই এক্স হেণ্ডেলত এখন বিশেষ কাৰ্ড পোষ্ট কৰিছে। এই কাৰ্ডখনত অপাৰেচন সেন্দূৰৰ ছবি আৰু ভাৰতৰ মানচিত্ৰ আছে। কাৰ্ডখনত ক‘লা ৰঙৰ ওপৰত সেন্দূৰীয়া ৰঙৰ ব্যৱহাৰ কৰা হৈছে। তাত লিখা আছে যে কিছুমান সীমা অতিক্ৰম কৰিব নালাগে আৰু ভাৰতে কেতিয়াও এই কথা পাহৰি নাযায়। পোষ্টটোৰ কেপচনত লিখা হৈছে যে যেতিয়া মানৱতাৰ সীমা অতিক্ৰম কৰা হয়, তেতিয়া তাৰ পৰিণাম অতি ভয়ংকৰ হয়। ন্যায় সদায় পোৱা যায় আৰু সমগ্ৰ ভাৰত সদায় একত্ৰিত হৈ থাকে।
পেহেলগাম আক্ৰমণৰ এবছৰ সম্পূৰ্ণ হোৱাৰ লগে লগে সেই অঞ্চলত নিৰাপত্তা ব্যৱস্থা যথেষ্ট কটকটীয়া কৰা হৈছে। আৰক্ষী আৰু নিৰাপত্তাৰক্ষীক সষ্টম হৈ থাকিবলৈ নিৰ্দেশ দিয়া হৈছে। পৰ্যটকসকলৰ নিৰাপত্তাৰ প্ৰতি লক্ষ্য ৰাখি পেহেলগামত এতিয়া কিউ আৰ কোডৰ জৰিয়তে পৰিচয় নিশ্চিত কৰা ব্যৱস্থা আৰম্ভ কৰা হৈছে। এতিয়াৰে পৰা পৰ্যটকসকলে গাইড বা ঘোঁৰাচালকৰ ওপৰত চকু মুদি ভৰসা কৰিব নালাগে। তেওঁলোকৰ মোবাইলত থকা কিউ আৰ কোড স্কেন কৰিলেই সেই ব্যক্তিজনৰ সকলো তথ্য জানিব পৰা যাব। সন্ত্ৰাসবাদী আক্ৰমণৰ ভয় দূৰ কৰিবলৈকে প্ৰশাসনে এই নতুন ব্যৱস্থা গ্ৰহণ কৰিছে।
উল্লেখযোগ্য যে ২০২৫ চনৰ ২২ এপ্ৰিলত পেহেলগামৰ বৈচৰণ উপত্যকাত সন্ত্ৰাসবাদীয়ে চলোৱা সেই আক্ৰমণত ২৫ জন পৰ্যটক আৰু এজন স্থানীয় ঘোঁৰাচালকৰ মৃত্যু হৈছিল। ইয়াৰ প্ৰতিশোধ ল‘বলৈ ভাৰতীয় সেনাই অপাৰেচন সেন্দূৰ চলাইছিল। সেনাই পাকিস্তানৰ মাটিত সোমাই সন্ত্ৰাসবাদীৰ ঘাটিসমূহ সম্পূৰ্ণৰূপে ধ্বংস কৰিছিল। ইয়াৰ পিছতে ভাৰত আৰু পাকিস্তানৰ মাজত যুদ্ধৰ সৃষ্টি হৈছিল আৰু ভাৰতীয় সেনাৰ আক্ৰমণত পাকিস্তানৰ সামৰিক বাহিনীৰ বিস্তৰ ক্ষতিসাধন হৈছিল।
