জীৱনৰ কঠোৰ বাস্তৱ আৰু আৰ্থিক অনাটনৰ বলি হৈ এজন যুৱকে বাছি ল’লে এক চৰম পথ। উত্তৰ প্ৰদেশৰ বাৰেলীত সংঘটিত হৈছে এক অতি কৰুণ আৰু হৃদয় বিদাৰক ঘটনা। পিতৃ-মাতৃৰ চিকিৎসাৰ নামত হোৱা বৃহৎ ঋণৰ বোজা সহিব নোৱাৰি নিখিল অৰোৰা নামৰ মুম্বাইৰ এজন ৩৩ বছৰীয়া ব্যৱসায়ীয়ে আত্মহত্যা কৰে। আটাইতকৈ দুখজনক কথাটো হ’ল, মৃত্যুক আঁকোৱালি লোৱাৰ আগতে যুৱকজনে নিজৰ প্ৰিয় পোহনীয়া লেব্ৰাডৰ কুকুৰটোকো বিষ খুৱাই হত্যা কৰে।
জানিব পৰা মতে, নিখিলে বাৰেলীৰ এটা ফ্লেটত অকলশৰে বাস কৰিছিল। তেওঁৰ একমাত্ৰ সংগী আছিল তেওঁৰ মৰমৰ কুকুৰটো, যাৰ নাম আছিল প্ৰেমী। আৰক্ষীয়ে জানিবলৈ দিয়া মতে, নিজৰ পিতৃ-মাতৃৰ চিকিৎসাৰ খৰচ যোগাৰ কৰিবলৈ গৈ নিখিল বৃহৎ পৰিমাণৰ ঋণৰ সন্মুখীন হৈছিল। আনকি এই ধাৰ পৰিশোধ কৰিবলৈ তেওঁ থকা ঘৰটোও বিক্ৰী কৰিবলগীয়া হৈছিল। আৰ্থিক সংকট আৰু সীমাহীন ঋণৰ বোজাই তেওঁক গভীৰ হতাশাত ভুগিবলৈ বাধ্য কৰাইছিল।
বুধবাৰে নিশা নিখিলে তেওঁৰ বন্ধু ধীৰাজৰ ঘৰত নিশাৰ আহাৰ খাবলৈ যোৱাৰ কথা আছিল। কিন্তু নিৰ্ধাৰিত সময় পাৰ হোৱাৰ পিছতো নিখিল গৈ নোপোৱাত ধীৰাজ আৰু আন কেইজনমান বন্ধুৱে খবৰ ল’বলৈ তেওঁৰ ফ্লেটলৈ যায়। তাত গৈ তেওঁলোকে ফ্লেটৰ দুৱাৰখন ভিতৰৰ পৰা বন্ধ হৈ থকা দেখে। বহুবাৰ দুৱাৰত টোকৰ মৰা আৰু ফোন কৰাৰ পিছতো কোনো সঁহাৰি নাপাই তেওঁলোকে লগে লগে আৰক্ষীক খবৰ দিয়ে। আৰক্ষী উপস্থিত হৈ দুৱাৰ ভাঙি ভিতৰত সোমায় আৰু নিখিল তথা তেওঁৰ মৰমৰ কুকুৰটোক মজিয়াত মৃত অৱস্থাত পৰি থকা প্ৰত্যক্ষ কৰে। কোঠাটোৰ পৰা আৰক্ষীয়ে এটা মাখনৰ পেকেট আৰু ছালফাছ নামৰ বিহৰ এটা খালী টেমা উদ্ধাৰ কৰে।
আৰক্ষীৰ প্ৰাথমিক তদন্তৰ পৰা সন্দেহ কৰা হৈছে যে নিখিলে প্ৰথমে মাখনৰ লগত বিহ মিহলাই কুকুৰটোক খুৱাইছিল আৰু তাৰ পিছত নিজেই সেই বিহ পান কৰিছিল। স্থানীয় লোকসকলৰ মতে নিখিলে তেওঁৰ কুকুৰটোক নিজৰ প্ৰাণতকৈও বেছি ভাল পাইছিল। হয়তো তেওঁৰ মৃত্যুৰ পিছত অকলশৰীয়া কুকুৰটোৰ যতন কোনে ল’ব, সেই দুখ আৰু চিন্তাতে তেওঁ এই কঠোৰ সিদ্ধান্ত ল’বলৈ বাধ্য হৈছিল। বৰ্তমান আৰক্ষীয়ে দুয়োটা মৃতদেহ মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰিছে আৰু সমগ্ৰ ঘটনাটোৰ বিতং তদন্ত আৰম্ভ কৰিছে।
