শুকুৰবাৰে ভাৰতৰ উচ্চতম ন্যায়ালয়ে এক অতি গুৰুত্বপূৰ্ণ ৰায়দান কৰে। আদালতে এগৰাকী ১৫ বছৰীয়া কিশোৰীক তেওঁৰ ৩১ সপ্তাহৰ গৰ্ভৱস্থা চিকিৎসা বিজ্ঞানৰ সহায়ত শেষ কৰিবলৈ অনুমতি প্ৰদান কৰিছে। ন্যায়াধীশ বি ভি নাগাৰাথ্না আৰু ন্যায়াধীশ উজ্জ্বল ভূঞাৰ বিচাৰপীঠে এই ৰায় দি স্পষ্ট কৰি দিয়ে যে এগৰাকী কিশোৰীক তাইৰ ইচ্ছাৰ বিৰুদ্ধে গৰ্ভধাৰণ কৰিবলৈ বাধ্য কৰোৱাটো মৌলিক অধিকাৰৰ উলংঘন। এগৰাকী মহিলাৰ নিজৰ শৰীৰৰ ওপৰত থকা অধিকাৰক আদালতে আটাইতকৈ বেছি গুৰুত্ব দিছে আৰু কৈছে যে কোনো আদালতে এগৰাকী মহিলাক বা নাবালিকাক জোৰকৈ সন্তান জন্ম দিবলৈ বাধ্য কৰিব নালাগে।
কিশোৰীগৰাকীৰ মানসিক অৱস্থাৰ প্ৰতি লক্ষ্য ৰাখি আদালতে গভীৰ দুখ প্ৰকাশ কৰে। ছোৱালীজনীয়ে মানসিক নিৰ্যাতন সহিব নোৱাৰি দুবাৰকৈ আত্মহত্যাৰ চেষ্টাও কৰিছিল। এই কথা উল্লেখ কৰি আদালতে কয় যে তাইক এই গৰ্ভৱস্থা আগবঢ়াই নিবলৈ বাধ্য কৰাটো তাইৰ সন্মান সহকাৰে জীয়াই থকাৰ অধিকাৰৰ সম্পূৰ্ণ বিৰোধী। নিজৰ শৰীৰৰ বিষয়ে সিদ্ধান্ত লোৱাৰ অধিকাৰ, বিশেষকৈ সন্তান জন্ম দিয়াৰ ক্ষেত্ৰত, প্ৰতিগৰাকী মহিলাৰ ব্যক্তিগত স্বাধীনতা আৰু গোপনীয়তাৰ এক অবিচ্ছেদ্য অংশ বুলি আদালতে জানিবলৈ দিয়ে। অবাঞ্চিত গৰ্ভধাৰণৰ ক্ষেত্ৰত অযুক্তিকৰ বাধা দি এই অধিকাৰ কাঢ়ি নিব নোৱাৰি।
চৰকাৰৰ হৈ ছলিচিটৰ জেনেৰেল তুষাৰ মেহতাই আদালতত যুক্তি দিছিল যে ৩১ সপ্তাহত গৰ্ভপাত কৰাটো কিশোৰী আৰু ভ্ৰুণ দুয়োৰে বাবে অতি বিপদজনক হ’ব পাৰে। আইন অনুসৰি গৰ্ভপাতৰ সময়সীমা ২৪ সপ্তাহ, আৰু এই গোচৰটোৱে সেই সীমা পাৰ কৰিছে। মেহতাই পৰামৰ্শ দিছিল যে ছোৱালীজনীয়ে কষ্ট সহ্য কৰি হ’লেও সন্তানটো জন্ম দি পিছত দত্তক ল’বলৈ দিব পাৰে। ইয়াৰ উপৰিও তেওঁ কিশোৰীগৰাকীৰ পৰিয়ালক আৰ্থিক সহায় আগবঢ়োৱাৰো প্ৰস্তাৱ দিছিল। আনহাতে আবেদনকাৰীয়ে কৈছিল যে এই গৰ্ভৱস্থাই ইতিমধ্যে ছোৱালীজনীৰ শিক্ষাত ব্যাঘাত জন্মাইছে আৰু তাইৰ বাবে প্ৰতিটো দিনেই অতি যন্ত্ৰণাদায়ক হৈ পৰিছে।
উচ্চতম ন্যায়ালয়ে চৰকাৰৰ এই যুক্তি আৰু প্ৰস্তাৱ মানি ল’বলৈ অস্বীকাৰ কৰে। ন্যায়াধীশ নাগাৰাথ্ণাই কয় যে গৰ্ভপাতৰ বাবে অহা প্ৰতিগৰাকী মহিলাক আৰ্থিক সহায়ৰ প্ৰস্তাৱ দি ঘূৰাই পঠিয়াব নোৱাৰি। ভয় বা সজাগতাৰ অভাৱত বহুতো নাবালিকাই পলমকৈহে গৰ্ভধাৰণৰ কথা গম পায় আৰু তাৰ বাবেই ২৪ সপ্তাহৰ সীমা পাৰ হৈ যায়। আদালতে লগতে কয় যে যদি এনে অৱস্থাত ন্যায়ালয়ে সহায় নকৰে, তেন্তে ভুক্তভোগীয়ে আদালতলৈ অহা বন্ধ কৰি দিব। কিশোৰীগৰাকীৰ শিক্ষা, সামাজিক মৰ্যাদা, মানসিক স্বাস্থ্য আৰু সামগ্ৰিক ভৱিষ্যতৰ কথা চিন্তা কৰি, আদালতে আইনৰ নিৰ্দিষ্ট সময়সীমাতকৈ নাবালিকাৰ মংগলৰ কথাকহে বেছি গুৰুত্ব প্ৰদান কৰে। আদালতে পুনৰ দোঁহাৰে যে মহিলাৰ শৰীৰৰ অধিকাৰ আৰু সন্মানৰ সৈতে কোনো ধৰণৰ আপোচ কৰিব নোৱাৰি।
