বন্ধুৰ সৈতে ঘৰুৱা অনুষ্ঠান এটাৰ পৰা উভতি আহি আছিল পাণ্ডৱ কুমাৰ (২১) নামৰ এজন যুৱক। সময় তেতিয়া মাজনিশা। দিল্লী আৰক্ষীৰ কনিষ্টবল নীৰজে হঠাতে তেওঁলোকক ধৰিলে। অভিযোগ অনুসৰি নিশা পথত ওলাই যোৱাক লৈ হোৱা কথা কটাকটিৰ মাজতে পাণ্ডৱৰ ওপৰত গুলীচালনা কৰে কনিষ্টবলজনে। পাণ্ডৱৰ থিতাতে মৃত্যু হয়। তেওঁৰ বন্ধু কৃষ্ণ পাণ্ডে গুৰুতৰভাৱে আহত হয়।
দেওবাৰে দিল্লীৰ জাফৰপুৰ কালনা গ্ৰামৰ এই ঘটনাই চাঞ্চল্যৰ সৃষ্টি কৰিছে। গুলীচালনাৰ পিছৰে পৰা পলাতক হৈ আছে নীৰজ। ঘটনা সন্দৰ্ভত আৰক্ষীয়ে তদন্ত আৰম্ভ কৰিছে।
আৰক্ষীৰ সূত্ৰ অনুসৰি দেওবাৰে নিশা প্ৰায় ২:৩০ বজাত দিল্লীৰ জাফৰপুৰ কালনা গ্ৰামৰ পথত বাইকত থিয় হৈ আছিল পাণ্ডৱ। পেছাত তেওঁ এজন ফুড ডেলিভাৰী কৰ্মী। কৃষ্ণ তেওঁৰ লগত পিছৰ চিটত বহি আছিল। জন্মদিনৰ পাৰ্টিৰ পৰা উভতি আহিছিল দুয়ো। সেই সময়ত নীৰজে পথত টহল দি আছিল। পাণ্ডৱবহঁতক থিয় হৈ থকা দেখি তেওঁ আগবাঢ়ি গ’ল। তেওঁ পোনপটীয়াকৈ সুধিলে, ‘ইমান ৰাতি ৰাস্তাত কিয় আছা?’ ইয়াৰ উত্তৰত তৰ্ক আৰম্ভ হ’ল। অভিযোগ অনুসৰি, কথা কটাকটিৰ সময়ত নীৰজে হঠাতে বন্দুক উলিয়াই গুলীচালনা কৰে।
গুলীয়ে পাণ্ডৱৰ বুকুত আঘাত কৰে। ইয়াৰ পিছত গুলীটো তেওঁৰ শৰীৰ ফুটি পিছফালে বহি থকা কৃষ্ণৰ পেটত সোমাই যায়। দুয়োজনেই পথত ৰক্তাক্ত অৱস্থাত বাগৰি পৰে। বন্দুকৰ গুলীৰ প্ৰচণ্ড শব্দ শুনি স্থানীয় ৰাইজে ততাতৈয়াকৈ সেই স্থানত উপস্থিত হয়। পাণ্ডৱ আৰু কৃষ্ণক স্থানীয় চিকিৎসালয়ত ভৰ্তি কৰে। তাতে চিকিৎসকে পাণ্ডৱক মৃত ঘোষণা কৰে। চিকিৎসাধীন হৈ আছে কৃষ্ণ।
ঘটনাৰ লগে লগে পাণ্ডৱৰ পৰিয়ালে আৰক্ষী বিষয়াজনৰ পিনে আঙুলি টোৱাইছে। তেওঁলোকে অভিযোগ কৰে, ‘নীৰাজ মাতাল অৱস্থাত আছিল। কোনো প্ৰৰোচনা অবিহনে গুলীচালনা কৰে।’ কেৱল সেয়াই নহয়, পাণ্ডৱৰ মাতৃ মীনা দেৱীয়ে গুলী চলোৱাৰ পূৰ্বে তেওঁলোকৰ জাতিক ধৰি কুমন্তব্য কৰা বুলি অভিযোগ কৰে।
তেওঁৰ ভাষাত ‘আমি বিহাৰৰ বাসিন্দা। এই কথা জানি তেওঁ গুলীচালনা কৰি পলাই যায়।’ পৰিয়ালটোৰ একমাত্ৰ উপাৰ্জনকাৰী সদস্য আছিল পাণ্ডৱ। মীনাই কয়, মোৰ ল’ৰাটো নিৰ্দোষী। সি বহুত কষ্ট কৰি পৰিয়ালটো চলাইছিল। মই তাৰ বাবে ন্যায় বিচাৰো।’
পাণ্ডৱৰ মৃত্যুৰ পিছত স্থানীয় ৰাইজে জাফৰপুৰ কালনা আৰক্ষী থানাৰ সন্মুখত প্ৰতিবাদ সাব্যস্ত কৰে। অভিযুক্তক কঠোৰ শাস্তি প্ৰদানৰ দাবী উত্থাপন কৰে।
আৰক্ষীৰ সূত্ৰ অনুসৰি নীৰজ হাৰিয়ানাৰ ৰোহটকৰ আকবৰপুৰ গাঁৱৰ বাসিন্দা। যোৱা ১৫ বছৰ ধৰি তেওঁ অকলে থাকিছিল। সমগ্ৰ ঘটনাৰ তদন্ত আৰম্ভ কৰিছে আৰক্ষীয়ে। অভিযুক্তক বিচাৰি উলিয়াবলৈ অব্যাহত আছে তালাচী অভিযান।
