কেৰালাৰ এগৰাকী জ্যেষ্ঠ আই এ এছ বিষয়া বি অশোকক ছচিয়েল মিডিয়াত চৰকাৰৰ নীতিৰ বিৰুদ্ধে সমালোচনা কৰাৰ অভিযোগত শেহতীয়াকৈ নিলম্বন কৰা হৈছে। ১৯৯৮ চনৰ বেটচৰ এইগৰাকী অভিজ্ঞ বিষয়াই বৰ্তমান কেৰেলা কৃষি বিশ্ববিদ্যালয়ৰ উপাচাৰ্য আৰু সৈনিক কল্যাণ বিভাগৰ প্ৰধান সচিব হিচাপে দায়িত্ব পালন কৰি আছিল। চৰকাৰী পদবীত থাকিও সামাজিক মাধ্যমৰ জৰিয়তে নীতিৰ বিৰোধিতা কৰা কাৰ্যক কেন্দ্ৰ কৰিয়ে এই কঠোৰ সিদ্ধান্ত গ্ৰহণ কৰিছে ৰাজ্য চৰকাৰে।
উল্লেখ্য যে বি অশোকৰ সৈতে বৰ্তমানৰ বাওঁ ডেম’ক্ৰেটিক ফ্ৰণ্ট চৰকাৰৰ সংঘাত নতুন কথা নহয়। ইয়াৰ পূৰ্বেও পোষ্টিংক কেন্দ্ৰ কৰি চৰকাৰৰ সৈতে তেওঁৰ কেইবাবাৰো মতবিৰোধ ঘটিছিল আৰু ই সংবাদ মাধ্যমৰ শিৰোনাম দখল কৰিছিল। বিশেষকৈ তেওঁক বিভিন্ন সময়ত দিয়া নিযুক্তিৰ বিৰুদ্ধে কেন্দ্ৰীয় প্ৰশাসনিক ন্যায়াধিকৰণে হস্তক্ষেপ কৰিবলগীয়া হৈছিল। ইয়াৰ আগতে চৰকাৰে তেওঁক স্থানীয় স্বশাসন সংস্কাৰ আয়োগৰ অধ্যক্ষ আৰু কেৰেলা পৰিবহণ উন্নয়ন বিত্ত নিগমৰ অধ্যক্ষ হিচাপে নিযুক্তি দিছিল যদিও ন্যায়াধিকৰণে সেই নিযুক্তি বাতিল কৰিছিল।
২০২৫ চনৰ ছেপ্টেম্বৰ মাহতো চৰকাৰে তেওঁৰ নিযুক্তি সন্দৰ্ভত এক বিতৰ্কিত নিৰ্দেশ জাৰি কৰিছিল। পূৰ্বৰ স্থগিতাদেশক নেওচি তেওঁক কৰ্মচাৰী আৰু প্ৰশাসনিক সংস্কাৰ বিভাগৰ প্ৰধান সচিব হিচাপে নিযুক্তি দিয়া হৈছিল যদিও সেই নিৰ্দেশো আইনী মেৰপেঁচত পৰি বাতিল হৈছিল। শেহতীয়াকৈ যোৱা ১৩ মাৰ্চত তেওঁক সৈনিক কল্যাণ বিভাগৰ প্ৰধান সচিব হিচাপে বদলি কৰাৰ লগতে যুৱ পৰিক্ৰমা বিভাগৰ অতিৰিক্ত দায়িত্ব অৰ্পণ কৰা হৈছিল। ইমানবোৰ টনা-আঁজোৰাৰ মাজতে এতিয়া ছচিয়েল মিডিয়াৰ পোষ্টৰ বাবে তেওঁ নিলম্বিত হ’বলগীয়া হোৱা ঘটনাই ৰাজ্যখনৰ প্ৰশাসনিক মহলত চাঞ্চল্যৰ সৃষ্টি কৰিছে।
