শেহতীয়াকৈ আম আদমী পাৰ্টি ত্যাগ কৰি বিজেপিত যোগদান কৰা ৰাজ্যসভাৰ সাংসদ সন্দীপ পাঠকৰ বিৰুদ্ধে পঞ্জাৱ আৰক্ষীয়ে গোচৰ ৰুজু কৰিছে। শনিবাৰে সূত্ৰৰ পৰা জানিব পৰা মতে, সাংসদ পাঠকৰ বিৰুদ্ধে জামিনহীন ধাৰাত দুখনকৈ এফ আই আৰ দাখিল কৰা হৈছে। অৱশ্যে আৰক্ষীয়ে বৰ্তমানলৈকে এই গোচৰ দুটাৰ কোনো সবিশেষ তথ্য ৰাজহুৱা কৰা নাই।
উল্লেখযোগ্য যে সন্দীপ পাঠক আম আদমী পাৰ্টিৰ সেই সাতজন ৰাজ্যসভা সাংসদৰ ভিতৰত এজন আছিল যিয়ে শেহতীয়াকৈ দল ত্যাগ কৰিছিল। যোৱা ২৪ এপ্ৰিল তাৰিখে অৰবিন্দ কেজৰিৱালৰ নেতৃত্বাধীন দলটোৱে নিজৰ নীতি, মূল্যবোধ আৰু মূল নৈতিকতাৰ পৰা আঁতৰি অহাৰ অভিযোগ তুলি ৰাজ্যসভাৰ দহজন সাংসদৰ ভিতৰত সাতজনেই পদত্যাগ কৰিছিল। এই সাংসদসকল আছিল ক্ৰমে সন্দীপ পাঠক, ৰাঘৱ চাধা, অশোক মিট্টল, হৰভজন সিং, ৰাজেন্দ্ৰ গুপ্তা, বিক্ৰমজিৎ সাহনী আৰু স্বাতী মালিৱাল। এই ঘটনাই সমগ্ৰ আম আদমী পাৰ্টিত এক ডাঙৰ জোকাৰণিৰ সৃষ্টি কৰিছিল।
পৰৱৰ্তী সময়ত ৰাজ্যসভাৰ অধ্যক্ষ চি পি ৰাধাকৃষ্ণনে আনুষ্ঠানিকভাৱে এই সাতজন সাংসদৰ বিজেপিত যোগদানক স্বীকৃতি প্ৰদান কৰে। ইয়াৰ ফলশ্ৰুতিত উচ্চ সদনত আম আদমী পাৰ্টিৰ সাংসদৰ সংখ্যা মাত্ৰ তিনিলৈ হ্ৰাস পায়। দল সলনি কৰাৰ কিছুদিন পিছতেই সন্দীপ পাঠকৰ বিৰুদ্ধে পঞ্জাৱ আৰক্ষীয়ে লোৱা এই কঠোৰ পদক্ষেপে এতিয়া সকলোৰে দৃষ্টি আকৰ্ষণ কৰিছে।
