বিশ্ব সংবাদ মাধ্যম স্বাধীনতা দিৱসৰ পৱিত্ৰ দিনটোতেই অসমৰ সংবাদ জগতলৈ এটি অতি আনন্দৰ খবৰ আহিছে। অসমৰ বিশিষ্ট সাংবাদিক, সম্পাদক, নিৰ্ভীক লেখক তথা সমাজ চিন্তাবিদ হাইদৰ হুছেইনলৈ এইবেলিৰ অৰ্থাৎ ২০২৬ বৰ্ষৰ সন্মানীয় ‘পৰাগ কুমাৰ দাস সাংবাদিকতা বঁটা’ আগবঢ়োৱা হৈছে। অসমৰ সাংবাদিকতাৰ ক্ষেত্ৰখনৰ লগতে আমাৰ জাতীয় জীৱনলৈ তেখেতে আগবঢ়োৱা অতুলনীয় অৱদান আৰু সুদীৰ্ঘ পাঁচটা দশক ধৰি অব্যাহত ৰখা নিৰবিচ্ছিন্ন বৌদ্ধিক সাধনাৰ এক শ্ৰদ্ধাপূৰ্ণ স্বীকৃতিস্বৰূপে তেখেতক এই বঁটাৰ বাবে নিৰ্বাচিত কৰা হৈছে।
১৯৪৫ চনত নলবাৰী জিলাৰ বড়িদতৰা গাঁৱত জন্মগ্ৰহণ কৰা হাইদৰ হুছেইনে ছাত্ৰ অৱস্থাৰ পৰাই সাংবাদিকতাৰ সৈতে ওতঃপ্ৰোতভাৱে জড়িত হৈ পৰিছিল। অধ্যাপক সম্ভূ চক্ৰৱৰ্তীৰ সম্পাদনাত প্ৰকাশিত ‘নতুন প্ৰভাত’ কাকতৰ পৰা নিজৰ যাত্ৰা আৰম্ভ কৰি তেখেতে পৰৱৰ্তী সময়ত ‘অসমবাণী’ আৰু ‘সাদিন’ৰ দৰে জনপ্ৰিয় কাকতত কাম কৰে। বিশেষকৈ ‘অসমীয়া প্ৰতিদিন’ কাকতৰ সম্পাদক তথা মুখ্য সম্পাদক হিচাপে তেখেতে সুদীৰ্ঘ ১৬ বছৰ ধৰি যি বলিষ্ঠ আৰু নিৰপেক্ষ ভূমিকা পালন কৰিছিল, সেয়া অসমৰ সংবাদ ইতিহাসৰ এক অতি উজ্জ্বল আৰু স্মৰণীয় অধ্যায়। অসমৰ প্ৰায়বোৰ সাপ্তাহিক বাতৰি কাকত আৰু মাহেকীয়া আলোচনীত প্ৰকাশিত তেখেতৰ চিন্তা উদ্ৰেককাৰী আৰু সাহসী প্ৰতিষ্ঠানবিৰোধী নিৱন্ধসমূহৰ বাবে তেখেত নতুন প্ৰজন্মৰ মাজত অত্যন্ত সমাদৃত।
কেৱল এজন সাংবাদিকেই নহয়, হাইদৰ হুছেইন এজন নিষ্ঠাবান মানৱ অধিকাৰ কৰ্মী হিচাপেও সমাজত পৰিচিত। প্ৰয়াত সতীৰ্থ পৰাগ কুমাৰ দাসৰ লগ লাগি তেখেতে অসমত চৰকাৰী বাহিনীৰ অত্যাচাৰৰ বিৰুদ্ধে জনমত গঠন কৰাত গুৰুত্বপূৰ্ণ ভূমিকা গ্ৰহণ কৰিছিল। অসমৰ খাটিখোৱা জনসাধাৰণ আৰু থলুৱা লোকৰ অধিকাৰ সুৰক্ষিত কৰাৰ স্বাৰ্থত তেখেতে সদায় বলিষ্ঠভাৱে নিজৰ মত প্ৰকাশ কৰি আহিছে। তেখেতৰ লিখনীৰ ভাষা অতি প্ৰাঞ্জল হোৱাৰ লগতে অসমীয়া ভাষাত থলুৱা শব্দৰ সঠিক আৰু সুন্দৰ প্ৰয়োগ কৰি তেখেতে মাতৃভাষাক অধিক চহকী কৰি তুলিছে। এজন সুবক্তা হিচাপেও পৰিচিত হাইদৰ হুছেইনৰ ধাৰাবাহিক লেখনিয়ে সমাজক সদায় এক উচিত আৰু সঠিক দিশ নিৰ্দেশনা দি আহিছে।
সাংবাদিকতাৰ লগতে এগৰাকী তীক্ষ্ণ ৰাজনৈতিক ভাষ্যকাৰ হিচাপে তেখেতে দেশ-বিদেশৰ বিভিন্ন সন্মানীয় মঞ্চত অসমক প্ৰতিনিধিত্ব কৰিছে। ভাৰতৰ প্ৰাক্তন প্ৰধানমন্ত্ৰী অটল বিহাৰী বাজপেয়ী আৰু ড০ মনমোহন সিঙৰ দৰে নেতাসকলৰ সৈতে জ্যেষ্ঠ সাংবাদিক প্ৰতিনিধি হিচাপে তেখেতে আমেৰিকা, জাপান, ছোভিয়েট ৰাছিয়া আৰু চীনকে ধৰি পৃথিৱীৰ বহু দেশ ভ্ৰমণ কৰি জ্ঞানৰ পৰিসৰ বৃদ্ধি কৰিছে। সংবাদ জগতৰ বাহিৰেও তেখেত ৰাজ্যৰ বহু শিক্ষানুষ্ঠান গঢ়ি তোলা আৰু পৰিচালনা কৰাৰ লগতো জড়িত। পৰাগ কুমাৰ দাস সতীৰ্থ মঞ্চই জনোৱা অনুসৰি, অহা ১৭ মে’ তাৰিখে গুৱাহাটী প্ৰেছ ক্লাৱত অনুষ্ঠিত হ’বলগীয়া পৰাগ কুমাৰ দাসৰ স্মৃতি দিৱসৰ গাম্ভীৰ্যপূৰ্ণ অনুষ্ঠানত হাইদৰ হুছেইনক এই সন্মানীয় বঁটা আনুষ্ঠানিকভাৱে প্ৰদান কৰা হ’ব।
