প্ৰশ্নকাকত ফাদিলৰ অভিযোগ উত্থাপন হোৱাৰ পিছতে বাতিল কৰা হৈছে NEET UG পৰীক্ষা। যোৱা ৩ মে’ত সমগ্ৰ দেশতে অনুষ্ঠিত হৈছিল মেডিকেল এণ্ট্ৰেন্স পৰীক্ষা। কিন্তু সোমবাৰৰ পৰা পৰীক্ষাত প্ৰশ্নকাকত ফাদিল হোৱাৰ অভিযোগ উত্থাপন হৈছে।
লোকসভাৰ বিৰোধী দলৰ নেতা ৰাহুল গান্ধীয়েও এই বিষয়টো উত্থাপন কৰিছে। এনে পৰিস্থিতিত প্ৰৱেশ পৰীক্ষা বাতিল কৰা হৈছে। নতুনকৈ পৰীক্ষা অনুষ্ঠিত হ’ব বুলি ৰাষ্ট্ৰীয় টেষ্টিং এজেন্সীয়ে প্ৰকাশ কৰিছে। প্ৰশ্নকাকত ফাদিল হোৱাৰ তদন্ত কৰিব চিবিআইয়ে।
যোৱা ৩ মে’ত ৰাষ্ট্ৰীয় পৰীক্ষণ সংস্থাই NEET UG পৰীক্ষা অনুষ্ঠিত কৰিছিল। এই পৰীক্ষাত প্ৰায় ২৩ লাখ ছাত্ৰ-ছাত্ৰী অৱতীৰ্ণ হৈছিল। কিন্তু ৰাজস্থানত সমস্যাৰ উদ্ভৱ হয়। জানিব পৰা মতে, পৰীক্ষাৰ অন্ততঃ এমাহ আগতেই একাংশ ছাত্ৰ-ছাত্ৰীয়ে এখন সম্ভাৱ্য প্ৰশ্নকাকত পাইছিল।
অতিৰিক্ত সঞ্চালক প্ৰধান বিশাল বানচালে কয় যে সম্ভাৱ্য প্ৰশ্নকাকতত ৪১০টা প্ৰশ্ন আছিল। পৰীক্ষাৰ পিছত দেখা গ’ল যে ১২০টা ৰসায়ন বিজ্ঞানৰ প্ৰশ্ন মূল প্ৰশ্নৰ লগত হুবহু মিল আছে। কেৱল প্ৰশ্নবোৰেই নহয়, উত্তৰৰ বিকল্পবোৰো মিল আছিল। আন এটা সূত্ৰই দাবী কৰিছে যে সম্ভাৱ্য প্ৰশ্নকাকতত থকা ২৮১টা প্ৰশ্নৰ ভিতৰত ১৩৫টা প্ৰশ্ন মূল প্ৰশ্নকাকতখনৰ সৈতে হুবহু মিল আছিল।
সমগ্ৰ ঘটনাক লৈ কংগ্ৰেছৰ সাংসদ ৰাহুল গান্ধীয়ে কেন্দ্ৰক তীব্ৰ সমালোচনা কৰিছে। আপৰ মুৰব্বী অৰবিন্দ কেজৰিৱালেও এই বিষয়টো উত্থাপন কৰিছে।
২০২৪ চনত NEET UG পৰীক্ষাৰ প্ৰশ্নকাকতত ব্যাপক দুৰ্নীতিৰ অভিযোগ উত্থাপন হৈছিল। হাজাৰ হাজাৰ টকাত প্ৰশ্নকাকত বিক্ৰী হোৱাৰ অভিযোগ উত্থাপন হৈছিল। সেই ঘটনাৰ পুনৰাবৃত্তি হ’ল নেকি বুলি ৰাহুলে প্ৰশ্ন উত্থাপন কৰে।
ইয়াৰে কেইঘণ্টামানৰ ভিতৰতে নেশ্যনেল টেষ্টিং এজেন্সীয়ে ৩ মে’ৰ পৰীক্ষা বাতিল কৰাৰ কথা ঘোষণা কৰে। প্ৰশ্নকাকত ফাদিলৰ অভিযোগৰ তদন্তৰ অন্তত এই সিদ্ধান্ত লোৱা হৈছে। প্ৰশ্নকাকত ফাদিল হোৱাৰ তদন্তৰ দায়িত্ব চিবিআইক দিয়া হৈছে। ছাত্ৰ-ছাত্ৰীসকলে পুনৰ পৰীক্ষাত অৱতীৰ্ণ হ’ব লাগিব।
