দেশৰ চিকিৎসা বিজ্ঞানৰ প্ৰৱেশিকা পৰীক্ষা নিট ইউজিৰ প্ৰশ্নকাকত ফাদিল হোৱাক লৈ পুনৰ এবাৰ হাহাকাৰ পৰিস্থিতিৰ সৃষ্টি হৈছে। এই সমগ্ৰ ঘটনাৰ তদন্ত কৰি আৰক্ষীয়ে ৰাজস্থানৰ পৰা মঙ্গিলাল আৰু দীনেশ বিৱাল নামৰ দুই ভাই-ককাইক গ্ৰেপ্তাৰ কৰিছে। জানিব পৰা মতে, যোৱা ২৬ এপ্ৰিলত পৰীক্ষাৰ এসপ্তাহ পূৰ্বে গুৰুগ্ৰামৰ এজন চিকিৎসকৰ পৰা তেওঁলোকে ৩০ লাখ টকাৰ বিনিময়ত নিটৰ প্ৰশ্নকাকত ক্ৰয় কৰিছিল। ইয়াৰ পিছত ২৯ এপ্ৰিলত এই প্ৰশ্নকাকত আন বহু লোকৰ ওচৰত বৃহৎ ধনৰ বিনিময়ত বিক্ৰী কৰা হৈছিল। অভিযুক্ত দুই ভাতৃ ৰাজস্থানৰ জামৱা ৰামগড়ৰ বাসিন্দা আৰু তেওঁলোকৰ এজনে চিকাৰত মেডিকেল প্ৰৱেশিকা পৰীক্ষাৰ বাবে প্ৰস্তুতি চলাই আছিল। তদন্তকাৰীৰ মতে, এই অঞ্চলটোৱেই আছিল প্ৰশ্নকাকত ফাদিলৰ মূল কেন্দ্ৰবিন্দু।
অভিযোগ অনুসৰি, ৰামগড়ৰ পৰা এই প্ৰশ্নকাকত এমবিবিএছ কাউন্সিলিং এজেন্ট ৰাকেশ কুমাৰ মাণ্ডাৱাৰিয়াৰ হাতলৈ গৈছিল। ৰাকেশে এই প্ৰশ্নকাকত চহৰৰ ডাঙৰ ডাঙৰ কোচিং ইনষ্টিটিউটসমূহত বিক্ৰী কৰাৰ লগতে কেৰালাৰ এজন চিকিৎসা বিজ্ঞানৰ ছাত্ৰকো ৩০ হাজাৰ টকাত যোগান ধৰিছিল। এইদৰেই এটা নেটৱৰ্কৰ জৰিয়তে প্ৰশ্নকাকত চাৰিওফালে বিয়পি পৰে। ৰাজস্থান আৰক্ষীৰ সূত্ৰৰ মতে, নাছিকৰ এটা ছপাশালৰ পৰাই এই প্ৰশ্নকাকত ফাদিল হোৱাৰ প্ৰক্ৰিয়াটো আৰম্ভ হৈছিল আৰু তাৰ পৰাই গুৰুগ্ৰামৰ চিকিৎসকজনৰ হাতলৈ প্ৰশ্ন গৈছিল। আটক কৰা দুই ভাতৃক সোধা-পোছা কৰাৰ পিছত পোহৰলৈ আহিছে যে তেওঁলোকে এমাহ আগৰ পৰাই প্ৰশ্নকাকত ফাদিল হ’ব বুলি জানিছিল। ইয়াৰে দীনেশ নামৰ এজন এটা ৰাজনৈতিক দলৰ সৈতেও জড়িত বুলি জানিব পৰা গৈছে।
যোৱা ৩ মে’ত ৰাষ্ট্ৰীয় পৰীক্ষা সংস্থা বা এনটিএ-ৰ দ্বাৰা পৰিচালিত এই পৰীক্ষাত প্ৰায় ২৩ লাখ পৰীক্ষাৰ্থী অৱতীৰ্ণ হৈছিল। কিন্তু ৰাজস্থানত দেখা গৈছিল যে পৰীক্ষাৰ বহু আগতেই একাংশ শিক্ষাৰ্থীৰ হাতত সম্ভাব্য প্ৰশ্নকাকত আহি পৰিছিল। আৰক্ষীৰ শীৰ্ষ বিষয়া বিশাল বনশনৰ মতে, সেই সম্ভাব্য প্ৰশ্নকাকতখনত থকা ৪১০টা প্ৰশ্নৰ ভিতৰত ১২০টা ৰসায়ন বিজ্ঞানৰ প্ৰশ্ন আৰু উত্তৰৰ বিকল্পসমূহো মূল প্ৰশ্নকাকতৰ সৈতে হুবহু মিলি গৈছিল। আন এক সূত্ৰই দাবী কৰিছে যে ২৮১টা প্ৰশ্নৰ ভিতৰত ১৩৫টা প্ৰশ্নই আচল প্ৰশ্নকাকতৰ সৈতে একে আছিল। এই ঘটনাই দেশৰ শিক্ষা ব্যৱস্থাত এক বৃহৎ জোকাৰণিৰ সৃষ্টি কৰিছে।
এই কেলেংকাৰীক লৈ কেন্দ্ৰীয় চৰকাৰক তীব্ৰ সমালোচনা কৰিছে কংগ্ৰেছ নেতা ৰাহুল গান্ধী আৰু আম আদমী পাৰ্টিৰ অৰবিন্দ কেজৰিৱালে। ২০২৪ চনৰ নিট পৰীক্ষাতো এনেধৰণৰ ব্যাপক দুৰ্নীতিৰ অভিযোগ উঠিছিল আৰু পুনৰ একেটা ঘটনাৰ পুনৰাবৃত্তি হোৱাক লৈ বিৰোধীয়ে সৰৱ হৈ পৰিছে। এই বিতৰ্কৰ মাজতে ৰাষ্ট্ৰীয় পৰীক্ষা সংস্থাই ৩ মে’ত অনুষ্ঠিত হোৱা নিট পৰীক্ষা বাতিল কৰাৰ কথা ঘোষণা কৰিছে। প্ৰশ্নকাকত ফাদিলৰ এই সমগ্ৰ গোচৰৰ তদন্তৰ দায়িত্ব এতিয়া চিবিআইক অৰ্পণ কৰা হৈছে। যাৰ ফলত দেশৰ লাখ লাখ মেধাৱী শিক্ষাৰ্থীয়ে এতিয়া পুনৰবাৰ এই পৰীক্ষাত বহিবলগীয়া হ’ব।
