চাকৰি প্ৰত্যাশী প্ৰাৰ্থীসকলৰ বাবে এটা ভাল খবৰ । চৰকাৰী সংস্থা হিন্দুস্তান কপাৰ লিমিটেডত খালী হৈছে বহুকেইটা পদ। এই ৰাষ্ট্ৰীয়কৃত সংস্থাত বিষয়া পদত নিযুক্তিৰ বাবে শেহতীয়াকৈ এক জাননী জাৰি কৰা হৈছে। বিশেষকৈ ইঞ্জিনিয়াৰিং পাছ কৰা ছাত্ৰ-ছাত্ৰীসকলে ইয়াত আবেদন কৰাৰ এক সোণালী সুযোগ লাভ কৰিব। এই নিযুক্তি প্ৰক্ৰিয়াৰ জৰিয়তে সংস্থাটোত প্ৰায় ৭০ টা পদ পূৰণ কৰা হ’ব বুলি জানিব পৰা গৈছে।
সংস্থাটোৰ মাইনিং, জিওলজি, এনভায়ৰনমেণ্ট মেনেজমেণ্ট, চেফ্টি এণ্ড ফায়াৰ চাৰ্ভিচেছ, কনচেণ্ট্ৰেটৰ, ইলেক্ট্ৰিকেল, ইনষ্ট্ৰুমেণ্টেচন, মেকানিকেল, চিভিল, চিষ্টেমছ, মেডিকেল এণ্ড হেল্থ চাৰ্ভিচেছ, এইচ আৰ, ফাইনান্স, কৰ্পোৰেট কমিউনিকেচন আৰু মেটেৰিয়েলছ এণ্ড কণ্ট্ৰেক্টছ বিভাগত এই নিযুক্তি দিয়া হ’ব। চৰকাৰী নিয়ম অনুসৰি সংৰক্ষিত শ্ৰেণীৰ প্ৰাৰ্থীসকলৰ বাবে আসন সংৰক্ষণৰ ব্যৱস্থাও থাকিব। ইয়াত প্ৰাৰ্থীসকলক চিনিয়ৰ মেনেজাৰ, মেনেজাৰ বা ডেপুটি মেনেজাৰ পদত নিযুক্তি দিয়া হ’ব।
পদ আৰু গ্ৰেড অনুসৰি প্ৰাৰ্থীসকলৰ শিক্ষাগত অৰ্হতা নিৰ্ধাৰণ কৰা হৈছে। যেনে মাইনিং বিভাগৰ ই-২ গ্ৰেডৰ বাবে মাইনিং ইঞ্জিনিয়াৰিং বিষয়ত স্নাতক ডিগ্ৰী থাকিব লাগিব আৰু মাইন মেনেজাৰ্ছ চাৰ্টিফিকেটত ফাৰ্ষ্ট ক্লাছ থকা প্ৰাৰ্থীয়ে অগ্ৰাধিকাৰ পাব। একেদৰে ই-৪ গ্ৰেডৰ বাবে মাইনিং ইঞ্জিনিয়াৰিং স্নাতকৰ লগতে মাইন মেনেজাৰ্ছ চাৰ্টিফিকেটৰ ফাৰ্ষ্ট ক্লাছ থকাটো বাধ্যতামূলক। আন বিভাগসমূহৰ বাবেও অৰ্হতা বেলেগ বেলেগ হ’ব, অৱশ্যে এই পদসমূহৰ বাবে কোনো বৃত্তিমূলক অভিজ্ঞতাৰ প্ৰয়োজন নাই।
আবেদনকাৰীৰ বয়সৰ উৰ্ধসীমা পদ আৰু গ্ৰেড অনুযায়ী ৪২, ৪৪, ৪৭ বা ৪৮ বছৰ নিৰ্ধাৰণ কৰা হৈছে আৰু সংৰক্ষিত শ্ৰেণীৰ বাবে চৰকাৰী নিয়ম মতে বয়সৰ ৰেহাই থাকিব। এই পদসমূহত নিযুক্তি পোৱা প্ৰাৰ্থীসকলে মাহিলী ৫০ হাজাৰৰ পৰা ২ লাখ টকা পৰ্যন্ত মোটা অংকৰ দৰমহা লাভ কৰিব। ইয়াৰ উপৰিও নিয়ন্ত্ৰণ অনুসৰি আন বহুতো সা-সুবিধাও প্ৰদান কৰা হ’ব। যোগ্য প্ৰাৰ্থীসকলক কেৱল সাক্ষাৎকাৰ বা ইণ্টাৰভিউৰ জৰিয়তে বাচনি কৰা হ’ব আৰু ইয়াৰ বাবে শাৰীৰিক সক্ষমতা থকাটো দৰকাৰ।
আগ্ৰহী প্ৰাৰ্থীসকলে হিন্দুস্তান কপাৰ লিমিটেডৰ অফিচিয়েল ৱেবচাইটলৈ গৈ অনলাইনযোগে আবেদন কৰিব পাৰিব। আবেদনৰ সময়ত প্ৰয়োজনীয় নথিপত্ৰ আৰু ফটো আপলোড কৰিব লাগিব। সাধাৰণ শ্ৰেণীৰ প্ৰাৰ্থীৰ বাবে আবেদন মাচুল ৫০০ টকা ধাৰ্য কৰা হৈছে আৰু সংৰক্ষিত শ্ৰেণীৰ প্ৰাৰ্থীয়ে এই মাচুলত ৰেহাই পাব। অহা ৫ জুনৰ পৰা আবেদন প্ৰক্ৰিয়া আৰম্ভ হ’ব আৰু আবেদন পত্ৰ জমা দিয়াৰ শেষ তাৰিখ হৈছে ২৫ জুন।
