ৰেলৱে প্ৰশাসনে বছৰ বছৰ ধৰি চলি অহা পদৱীৰ খেলিমেলি দূৰ কৰি এক ডাঙৰ তথা ঐতিহাসিক সিদ্ধান্ত গ্ৰহণ কৰিছে। ৰেলৱে ব’ৰ্ডে এক নিৰ্দেশনা জাৰি কৰি য়াৰ্ড মাষ্টাৰ আৰু ট্ৰেফিক ইন্সপেক্টৰৰ দৰে পুৰণি পদৱীসমূহ বিলুপ্ত কৰি এতিয়াৰে পৰা সকলোকে একেলগে ষ্টেচন মাষ্টাৰ পদৱীত অন্তৰ্ভুক্ত কৰিছে। এই সিদ্ধান্তক ৰেলৱেৰ মানৱ সম্পদ আন্তঃগাঁথনিৰ এক গুৰুত্বপূৰ্ণ সংস্কাৰ হিচাপে গণ্য কৰা হৈছে, যাৰ ফলত লাখ লাখ কৰ্মচাৰীৰ চাকৰিৰ পৰিচয় আৰু কেৰিয়াৰৰ ক্ষেত্ৰত স্পষ্টতা আহিব।
সূত্ৰৰ পৰা জানিব পৰা মতে, ২০০৩ চনতে এই পদসমূহ কাৰিকৰীভাৱে একত্ৰিত কৰা হৈছিল। কিন্তু ফিল্ড ডিউটি, ৰেকৰ্ড আৰু ডিজিটেল মানৱ সম্পদ ব্যৱস্থাপনা প্ৰণালীত পুৰণি পদৱীসমূহেই পঞ্জীয়ন হৈ আছিল। ইয়াৰ বাবে কৰ্মচাৰীসকলৰ পৰিচয়, সেৱা পুস্তিকা আৰু প্ৰশাসনিক প্ৰক্ৰিয়াত অহৰহ খেলিমেলিৰ সৃষ্টি হৈছিল। এতিয়া ৰেলৱে ব’ৰ্ডৰ নতুন নিৰ্দেশনাৰ পিছত সকলো সংশ্লিষ্ট কৰ্মচাৰীক আনুষ্ঠানিকভাৱে কেৱল ষ্টেচন মাষ্টাৰ হিচাপেই স্বীকৃতি দিয়া হ’ব।
এই একত্ৰীকৰণৰ আটাইতকৈ ডাঙৰ সুবিধাটো হ’ব যে পদোন্নতি ব্যৱস্থা অধিক সৰল, স্বচ্ছ আৰু একে ধৰণৰ হ’ব। আগতে বেলেগ বেলেগ পদৱী হোৱাৰ বাবে ইউনিফৰ্ম বানচ, প্ৰমোচনৰ নিয়ম আৰু কামৰ ভাগ-বতৰাত বহুতো জটিলতাৰ সৃষ্টি হৈছিল। এতিয়া একেটা কেডাৰতে সকলো কৰ্মচাৰী অন্তৰ্ভুক্ত হোৱাৰ বাবে প্ৰশাসনিক কাম-কাজবোৰ খৰতকীয়া আৰু সহজ হ’ব। ইয়াৰ লগতে কেৰিয়াৰ আগবঢ়াই নিয়াৰ সুযোগো বৃদ্ধি পাব, যাৰ ফলত কৰ্মচাৰীসকলে উচ্চ পদৱীলৈ যোৱাত অধিক সুবিধা লাভ কৰিব।
ৰেলৱেত ষ্টেচন মাষ্টাৰক পৰিচালনা ব্যৱস্থাৰ মেৰুদণ্ড বুলি কোৱা হয়। তেওঁলোকে ৰেলৰ আহ-যাহ, চিগনেল পৰিচালনা আৰু যাত্ৰীৰ নিৰাপত্তাৰ দায়িত্ব পালন কৰে। আনহাতে য়াৰ্ড মাষ্টাৰে ঘাইকৈ ডাঙৰ জংচন আৰু মালগাড়ীৰ য়াৰ্ডত কাম কৰিছিল, আৰু ট্ৰেফিক ইন্সপেক্টৰে পৰিচালনা ব্যৱস্থাৰ তদাৰক কৰিছিল। নতুন ব্যৱস্থাত এই সকলোবোৰ দায়িত্ব একত্ৰিত কৰা হৈছে, যাৰ ফলত পৰিচালনা প্ৰণালী অধিক মজবুত হ‘ব।
নতুন নিয়ম অনুসৰি কৰ্মচাৰীসকলে এতিয়া ষ্টেচন মাষ্টাৰৰ পৰা পদোন্নতি পাই ষ্টেচন অধীক্ষক, সহকাৰী পৰিচালনা প্ৰৱন্ধক, মণ্ডল পৰিচালনা প্ৰৱন্ধক আৰু জ্যেষ্ঠ মণ্ডল পৰিচালনা প্ৰৱন্ধকৰ দৰে উচ্চ পদৱীলৈ যোৱাৰ নতুন পথ মুকলি হ’ব।
