প্ৰাক্তন প্ৰধানমন্ত্ৰী ৰাজীৱ গান্ধীৰ ৩৫ সংখ্যক মৃত্যুবৰ্ষীকীত তেওঁৰ পুত্ৰ তথা লোকসভাৰ বিৰোধী দলপতি ৰাহুল গান্ধীয়ে এক আৱেগিক বাৰ্তা প্ৰেৰণ কৰিছে। বৃহস্পতিবাৰে দিল্লীৰ বীৰ ভূমিলৈ গৈ ৰাহুল গান্ধীয়ে পিতৃৰ সমাধিস্থলত ফুল দি শ্ৰদ্ধা জনায়। ইয়াৰ পিছতে তেওঁ ছচিয়েল মিডিয়া এক্স হেণ্ডেলত দুখন ছবি শ্বেয়াৰ কৰে।
ইয়াৰে এখন ছবি তেওঁ ল’ৰালি কালৰ। এই ছবিকেইখন পোষ্ট কৰি ৰাহুল গান্ধীয়ে লিখে যে তেওঁৰ পিতৃয়ে এক দক্ষ, সমৃদ্ধিশালী আৰু শক্তিশালী ভাৰত গঢ়াৰ সপোন দেখিছিল। পিতৃৰ সেই সপোনক বাস্তৱায়িত কৰাৰ সকলো দায়িত্ব তেওঁ নিজৰ কান্ধত তুলি লৈছে বুলি উল্লেখ কৰাৰ লগতে পিতৃৰ শিক্ষা, মূল্যবোধ আৰু স্মৃতি সদায় তেওঁৰ লগত থাকিব বুলিও তেওঁ আৱেগিক হৈ পৰে। উল্লেখ্য যে বিশেষজ্ঞসকলৰ মতে ৰাজীৱ গান্ধীক আধুনিক ভাৰত গঢ়াৰ মূল কাৰিকৰ বুলি গণ্য কৰা হয়।
ৰাহুল গান্ধীৰ লগতে ছোনীয়া গান্ধী আৰু প্ৰিয়ংকা গান্ধীয়েও প্ৰাক্তন প্ৰধানমন্ত্ৰীগৰাকীক শ্ৰদ্ধাঞ্জলি অৰ্পণ কৰে। এই শ্ৰদ্ধাজ্ঞাপন অনুষ্ঠানত কংগ্ৰেছ সভাপতি মল্লিকাৰ্জুন খাৰ্গেও উপস্থিত আছিল আৰু তেওঁ ৰাজীৱ গান্ধীৰ পুৰণি বাণী সোঁৱৰণ কৰি শ্ৰদ্ধা জনায়। বৰ্তমান বিদেশ ভ্ৰমণত থকা প্ৰধানমন্ত্ৰী নৰেন্দ্ৰ মোদীয়েও ছচিয়েল মিডিয়াৰ জৰিয়তে প্ৰাক্তন প্ৰধানমন্ত্ৰী ৰাজীৱ গান্ধীক শ্ৰদ্ধাঞ্জলি জ্ঞাপন কৰে।
উল্লেখ্য যে ১৯৯১ চনৰ ২১ মে’ তাৰিখে তামিলনাডুৰ শ্ৰীপেৰুম্বুদুৰত এক নিৰ্বাচনী প্ৰচাৰ চলাই থকাৰ সময়তে এল টি টি ই নামৰ সন্ত্ৰাসবাদী সংগঠনৰ আত্মঘাতী বিস্ফোৰণত ৰাজীৱ গান্ধীয়ে প্ৰাণ হেৰুৱাইছিল। এই ঘটনাত জড়িত থকাৰ অপৰাধত আদালতে সাতজন লোকক দোষী সাব্যস্ত কৰি মৃত্যুদণ্ডৰ ৰায় দিছিল। এই দোষীসকল আছিল মৰুগান, ছান্থান, পেৰাৰিভালান, জয়াকুমাৰ, ৰবিচন্দ্ৰন, ৰবাৰ্ট পায়াছ আৰু নলিনী। পৰৱৰ্তী সময়ত ছোনীয়া গান্ধীৰ হস্তক্ষেপৰ বাবেই তেওঁলোকৰ মৃত্যুদণ্ডৰ সলনি যাৱজ্জীৱন কাৰাদণ্ড বিহা হয়। অৱশেষত ৩৩ বছৰ কাৰাগাৰত কটোৱাৰ পিছত অলপতে তেওঁলোক সকলোৱে মুক্তি লাভ কৰে।
