ভাৰতক মাওবাদমুক্ত কৰাৰ লক্ষ্যৰে কেন্দ্ৰীয় চৰকাৰে গ্ৰহণ কৰা কঠোৰ পদক্ষেপৰ মাজতে ঝাৰখণ্ডত এক বৃহৎ সফলতা লাভ কৰিছে যৌথ বাহিনীয়ে। ঝাৰখণ্ড চৰকাৰৰ বিশেষ পুনৰ্সংস্থাপন আঁচনি ‘অপাৰেচন নৱজীৱন’ৰ আহ্বানৰ প্ৰতি সঁহাৰি জনাই ২৫ গৰাকী সশস্ত্ৰ মাওবাদী নেতা-কৰ্মীয়ে হিংসাৰ পথ ত্যাগ কৰি চৰকাৰৰ ওচৰত আত্মসমৰ্পণ কৰিছে। এই সকলো মাওবাদীয়ে দীৰ্ঘদিন ধৰি সাৰাণ্ডাৰ ঘন অৰণ্যত নিজৰ সক্ৰিয় কাৰ্যকলাপ চলাই আছিল। ইয়াৰ উপৰিও ঝাৰখণ্ডৰ আন এটা সশস্ত্ৰ সংগঠন ঝাৰখণ্ড জনমুক্তি পৰিষদৰো দুগৰাকী সদস্যই চৰকাৰৰ ওচৰত শৰণাপন্ন হৈছে। আত্মসমৰ্পণ কৰা এই উগ্ৰপন্থীসকলৰ পৰা যৌথ বাহিনীয়ে বুজন পৰিমাণৰ মাৰাত্মক অস্ত্ৰ-শস্ত্ৰ আৰু গুলী-বাৰুদ উদ্ধাৰ কৰিবলৈ সক্ষম হৈছে।
পুলিচ আৰু যৌথ বাহিনীৰ সূত্ৰই প্ৰকাশ কৰা অনুসৰি আত্মসমৰ্পণ কৰা ২৫ গৰাকী মাওবাদীৰ ভিতৰত পাঁচগৰাকীৰ মূৰৰ বিনিময়ত পাঁচ লাখ টকাকৈ পুৰস্কাৰ ঘোষণা কৰা আছিল। এইসকলৰ ভিতৰত আটাইতকৈ কুখ্যাত আৰু দুৰ্ধৰ্ষ মাওবাদী নেত্ৰীগৰাকী হৈছে ৰাঁচীৰ বাসিন্দা ৰেখা মুণ্ডা ওৰফে জয়ন্তী, যিয়ে সাৰাণ্ডাৰ জংঘলত কেইবাটাও ডাঙৰ উগ্ৰপন্থী অভিযান চলাইছিল। বাকী চাৰিজন পুৰস্কাৰঘোষিত মাওবাদী নেতা হৈছে গাদী মুণ্ডা, নগেন্দ্ৰ মুণ্ডা, সাগেন আঙাৰীয়া আৰু চুলেমান হাঁচদা।
আত্মসমৰ্পণকাৰী এই দলটোৰ ভিতৰত ১৩ জন চি পি আই মাওবাদী সংগঠনৰ সাধাৰণ কেডাৰ হোৱাৰ বিপৰীতে ৬ জন চাবজ’নেল কমিটি আৰু ৬ জন এৰিয়া কমিটিৰ গুৰুত্বপূৰ্ণ সদস্য বুলি চিনাক্ত কৰা হৈছে। এই সকলো সদস্য পশ্চিম সিংভূমৰ চাইবাছা আৰু গিৰিডী অঞ্চলৰ বাসিন্দা। তেওঁলোকৰ পৰা ইনছাচ ৰাইফেল, দেশীয় পিষ্টল আৰু প্ৰায় ২৮০০ ৰাউণ্ড সজীৱ গুলীৰ লগতে ৱাকিটকিও জব্দ কৰা হৈছে। আনহাতে ঝাৰখণ্ড জনমুক্তি পৰিষদৰ আত্মসমৰ্পণ কৰা দুই সদস্য শচীন বেগ আৰু শ্ৰৱণ গোপৰ পৰাও কেইবাটাও মেগাজিন আৰু ১৩০ ৰাউণ্ড গুলী উদ্ধাৰ হৈছে।
পৰিসংখ্যা অনুসৰি ২০২৬ চনত ঝাৰখণ্ডত যৌথ বাহিনীৰ অভিযানত এতিয়ালৈকে ৪৪ গৰাকী সশস্ত্ৰ মাওবাদী গ্ৰেপ্তাৰ হৈছে আৰু আৰক্ষীৰ গুলীত প্ৰাণ হেৰুৱাইছে ২২ গৰাকীয়ে। অৱশ্যে কেন্দ্ৰীয় চৰকাৰৰ ধাৰাবাহিক অভিযানৰ পাছতো সাৰাণ্ডাৰ জংঘলত এতিয়াও প্ৰায় ৪০ ৰ পৰা ৪৫ গৰাকী মাওবাদীয়ে মৰণপণ যুঁজ চলাই আছে বুলি জানিব পৰা গৈছে। এই দলটোৰ অধিকাংশ সদস্যই পশ্চিমবঙ্গৰ বুলি জানিব পৰা গৈছে আৰু ইয়াৰ ভিতৰত মিচিৰ বেচৰা, অসীম দাস তথা এসময়ৰ দুৰ্ধৰ্ষ মহিলা কমাণ্ডাৰ মীৰা পাহাৰীয়াৰ নাম বিশেষভাৱে উল্লেখনীয়।
কেৱল মাওবাদীয়েই নহয়, ঝাৰখণ্ডত সক্ৰিয় হৈ থকা আন এটা সশস্ত্ৰ গোট ‘তৃতীয় প্ৰস্তুত কমিটি’ চমুকৈ টি পি চি নামৰ সংগঠনটোৰ দপদপনিও এতিয়াও সম্পূৰ্ণৰূপে শেষ হোৱা নাই। ঝাৰখণ্ড চৰকাৰে জানিবলৈ দিয়া মতে এই মাওবাদীসকলক দমন কৰিবলৈ জংঘলৰ ভিতৰুৱা অঞ্চলত ২১ টাকৈ উন্নত সেনা শিবিৰ স্থাপন কৰা হৈছিল, যাৰ ফলত উগ্ৰপন্থী বিৰোধী অভিযান চলোৱাৰ লগতে তেওঁলোকক মূল সুঁতিলৈ ঘূৰাই অনাৰ কামত ব্যাপক সফলতা লাভ কৰা হৈছে।
