এইবাৰ “ককৰোচ জনতা পাৰ্টি”ৰ ট্ৰেডমাৰ্কৰ বাবে দুখন আবেদন দাখিল কৰা হৈছে। এই ব্যংগত্মক আন্দোলনে ইতিমধ্যে সমগ্ৰ দেশতে আলোড়নৰ সৃষ্টি কৰিছে। উচ্চতম ন্যায়ালয়ত শুনানিৰ সময়ত দেশৰ মুখ্য ন্যায়াধীশ সূৰ্য কান্তে কৰা মন্তব্যৰ পিছতেই জন্ম হৈছিল ককৰোচ জনতা পাৰ্টিৰ।
যোৱা সপ্তাহত মুখ্য ন্যায়াধীশগৰাকীয়ে এটা গোচৰৰ শুনানি গ্ৰহণ কৰি আছিল। শুনানিৰ সময়ত তেওঁ নিবনুৱা যুৱক-যুৱতীক ‘পইঁতাচোৰা’ আৰু ‘পৰজীৱী’ৰ সৈতে তুলনা কৰা বুলি অভিযোগ উত্থাপন হৈছিল।
অভিযোগ অনুসৰি, একো কৰিব নোৱাৰা নিবনুৱা যুৱক-যুৱতীয়ে সাংবাদিক, ছ’চিয়েল মিডিয়া ব্যৱহাৰকাৰী আৰু আৰ টি আই কৰ্মী হিচাপে কাম কৰিবলৈ আৰম্ভ কৰে। কিন্তু পিছত মুখ্য ন্যায়াধীশগৰাকীয়ে স্পষ্ট কৰি দিয়ে যে তেওঁৰ এই মন্তব্য ভুৱা ডিগ্ৰী লৈ পেছাত যোগদান কৰা লোকসকলক লক্ষ্য কৰি কৰা হৈছিল।
মুখ্য ন্যায়াধীশগৰাকীৰ মন্তব্য ভাইৰেল হোৱাৰ পিছতে ছচিয়েল মিডিয়াত এক আন্দোলনৰ জন্ম হয়। CockroachJanataParty হেচটেগটো বনজুইৰ দৰে বিয়পি পৰিল। বহু যুৱকে নিজকে “পইঁতাচোৰা” বুলি দাবী কৰিবলৈ আৰম্ভ কৰিলে, যিসকলে ব্যৱস্থাটোক লৈ প্ৰশ্ন উত্থাপন কৰিবলৈ ভয় নকৰে।
এসময়ত আম আদমী পাৰ্টিত কাম কৰা ৰাজনৈতিক যোগাযোগ কৌশলবিদ অভিজিৎ দীপকে ককৰোচ জনতা পাৰ্টি নামৰ পেজ আৰু ইয়াৰ ছ’চিয়েল মিডিয়া একাউণ্ট খুলি দিয়ে। কেইদিনমানৰ ভিতৰতে ইয়াৰ এক্স আৰু ইনষ্টাগ্ৰাম হেণ্ডেলত ফ’ল’ৱাৰৰ সংখ্যা লাখ লাখ হ’ল। কিন্তু ভাৰত চৰকাৰৰ আইনী দাবীৰ ভিত্তিত ককৰোচ জনতা পাৰ্টিৰ এক্স হেণ্ডেল স্থগিত ৰখা হৈছে।
এই পৰিস্থিতিত ট্ৰেডমাৰ্কৰ বাবে দুখন আবেদন দাখিল কৰা হৈছে। প্ৰথম আৱেদন দাখিল কৰিছে আজিম আদমভাই জামে। তেওঁৰ আবেদন নম্বৰ ৭৭৩৭৯৩৭।তেওঁ “ককৰোচ জনতা পাৰ্টি” শব্দচিহ্নৰ (ওৱাৰ্ডমাৰ্ক) বাবে আবেদন কৰিছে। দ্বিতীয়টো আবেদন নম্বৰ হৈছে ৭৭৪১৪৮১। অখণ্ড স্বৰূপ নামৰ এজন ব্যক্তিয়ে “ককৰোচ জনতা পাৰ্টি”ৰ বাবে আবেদন দাখিল কৰিছে। দুয়োটা আবেদনৰ অৱস্থা বৰ্তমান “আনুষ্ঠানিকতা পৰীক্ষণত উত্তীৰ্ণ” বুলি দেখুওৱা হৈছে।
মাত্ৰ পাঁচ দিনতে ১ কোটিৰো অধিক ‘ফ’ল’ৱাৰ’ পোৱা গ’ল। আনকি ইনষ্টাগ্ৰামতো বিজেপিকো চেৰ পেলাইছিল ককৰোচ জনতা পাৰ্টিয়ে। আৰু তাৰ পিছত ভাৰতত মাইক্ৰ’ব্লগিং চাইট এক্স (পূৰ্বৰ টুইটাৰ)ত চিজেপিৰ হেণ্ডেল ‘নিষিদ্ধ’ হোৱাৰ অভিযোগ উত্থাপন হৈছে।
চিজেপিৰ প্ৰতিষ্ঠাপক অভিজিতে এই অভিযোগ চৰ্চালৈ আনে। আনকি তেওঁ এটা স্ক্ৰীণশ্বট পোষ্ট কৰিছিল। অভিজিতেও তেওঁৰ এক্স হেণ্ডেলত তাক লৈ ক্ষোভ প্ৰকাশ কৰিছে। তেওঁ লিখিছে, ‘আশংকা কৰা মতে ভাৰতত ককৰোচ জনতা পাৰ্টিৰ একাউণ্ট ব্লক কৰা হৈছে’। এক্সত ‘ককৰোচ জনতা পাৰ্টি’ৰ হেণ্ডেললৈ গ’লে দেখা যায় যে ভাৰতৰ পৰা চাব নোৱাৰি। কাৰণ দিয়া হৈছে যে আইনী দাবী মানি এনে সিদ্ধান্ত লোৱা হৈছে।
