আমেৰিকাৰ বৈদেশিক মন্ত্ৰী মাৰ্কো ৰুবিঅ’ই বৃহস্পতিবাৰে ভাৰতক এক অন্যতম শ্ৰেষ্ঠ অংশীদাৰ হিচাপে অভিহিত কৰে। তেওঁ কয় যে ভাৰতে যিমান ইন্ধন কিনিব বিচাৰে, আমেৰিকাই সিমানখিনি বিক্ৰী কৰিবলৈ সাজু আছে। নিজৰ প্ৰথমটো ভাৰত ভ্ৰমণৰ বিষয়ে উল্লেখ কৰি তেওঁ কয় যে এই ভ্ৰমণ অত্যন্ত গুৰুত্বপূৰ্ণ, কিয়নো ইয়াৰ জৰিয়তে তেওঁ কোৱাড দেশসমূহৰ মন্ত্ৰীসকলক লগ পোৱাৰ সুযোগ পাব।
মাৰ্কো ৰুবিঅ’ অহা ২৩ ৰ পৰা ২৬ মে’লৈ ভাৰতত থাকিব। এই সময়ছোৱাত তেওঁ কলকাতা, আগ্ৰা, জয়পুৰ আৰু নতুন দিল্লী ভ্ৰমণ কৰিব। তেওঁ কয় যে ভাৰত আমাৰ এক শ্ৰেষ্ঠ মিত্ৰ আৰু অংশীদাৰ। আমি তেওঁলোকৰ সৈতে লগ লাগি বহুত ভাল কাম কৰি আছোঁ আৰু সেয়েহে এই ভ্ৰমণ অত্যন্ত গুৰুত্বপূৰ্ণ। তেওঁ লগতে কয় যে দুয়োখন দেশৰ মাজত আলোচনা কৰিবলৈ বহুতো বিষয় আছে আৰু তেওঁলোকে কোৱাড দেশসমূহৰ প্ৰতিনিধিসকলকো লগ পাব। এই বছৰৰ শেষৰ ফালে আন এখন কোৱাড বৈঠক অনুষ্ঠিত হ’ব বুলিও তেওঁ সদৰী কৰে।
বৈদেশিক মন্ত্ৰীগৰাকীয়ে জনোৱা মতে, ভেনিজুৱেলাৰ কাৰ্যবাহী ৰাষ্ট্ৰপতি ডেলচি ৰড্ৰিগেজো অহা সপ্তাহত ভাৰতলৈ আহিব। এই ভ্ৰমণৰ সময়ত নতুন দিল্লীৰ সৈতে মিলি কাম কৰাৰ বহুতো সুযোগ উপলব্ধ হ’ব বুলি আশা কৰা হৈছে। বিশেষকৈ তেল বিক্ৰীৰ বিষয়টোক লৈ দুয়োখন দেশৰ মাজত আলোচনা হোৱাৰ সম্ভাৱনা আছে।
ৰুবিঅ’ৰ এই মন্তব্য এনে এক সময়ত আহিছে যেতিয়া আমেৰিকাৰ ৰিফাইনাৰীসমূহত ভেনিজুৱেলাৰ খাৰুৱা তেলৰ আমদানি যথেষ্ট বৃদ্ধি পাইছে। যোৱা ফেব্ৰুৱাৰী মাহত আমেৰিকাৰ ৰাষ্ট্ৰপতি ডনাল্ড ট্ৰাম্পে কৈছিল যে আমেৰিকাই ভেনিজুৱেলাৰ পৰা ৮০ মিলিয়ন বেৰেলতকৈয়ো অধিক তেল লাভ কৰিছে। ৰুবিঅ’ই কয় যে ভেনিজুৱেলাৰ তেলক লৈ ভাৰতৰ বাবেও বহুতো সুযোগ আছে আৰু সেয়েহে তেওঁলোকৰ কাৰ্যবাহী ৰাষ্ট্ৰপতিগৰাকীয়ে ভাৰত ভ্ৰমণ কৰিব।
ইৰাণৰ প্ৰসংগতো ৰুবিঅ’ই স্পষ্ট মত প্ৰকাশ কৰে। তেওঁ সকীয়াই দিয়ে যে কৌশলগতভাৱে অত্যন্ত গুৰুত্বপূৰ্ণ হৰমুজ প্ৰণালী নিয়ন্ত্ৰণ কৰিবলৈ বা ইয়াৰ জৰিয়তে ধন ঘটিবলৈ ইৰাণে কৰা কোনো চেষ্টাকে ৱাশ্বিংটনে সহ্য নকৰিব। শেহতীয়াকৈ ইৰাণে ওমানৰ সৈতে লগ লাগি এই পথটোৰে যোৱা জাহাজসমূহৰ পৰা কৰ বা টোল সংগ্ৰহ কৰাৰ বিষয়ে আলোচনা কৰিছে বুলি খবৰ ওলাইছিল। ৰুবিঅ’ই ইৰাণৰ এই পদক্ষেপক বিশ্ব বাণিজ্য আৰু মুক্ত চলাচলৰ প্ৰতি এক প্ৰত্যক্ষ ভাবুকি বুলি অভিহিত কৰে।
উদ্ধৃতিযোগ্য যে ভাৰতে নিজৰ শক্তিৰ প্ৰয়োজনীয়তাৰ প্ৰায় আধা অংশ আৰু বেছিভাগ তেল বিদেশৰ পৰা আমদানি কৰে। ইৰাণত চলি থকা বৰ্তমানৰ সংঘাতে বিশ্বজুৰি এক ডাঙৰ শক্তি সংকটৰ সৃষ্টি কৰিছে। ইয়াৰ ফলত সমগ্ৰ বিশ্বতে ডিজেল, পেট্ৰ’ল আৰু এল এন জিৰ দাম অস্বাভাৱিকভাৱে বৃদ্ধি পাইছে। ইয়াৰ প্ৰভাৱত পৰি ভাৰততো তেল কোম্পানীসমূহৰ ওপৰত পৰা আৰ্থিক হেঁচা হ্ৰাস কৰিবলৈ মাত্ৰ চাৰিদিনৰ ভিতৰত দুবাৰকৈ ইন্ধনৰ দাম বৃদ্ধি কৰা হৈছে। প্ৰথমবাৰ ৩ টকা আৰু তাৰ পিছত আকৌ ৯০ পইচা বঢ়োৱা হৈছে।
