চীন আৰু টাইৱানৰ বিবাদত আমেৰিকাই সদায় টাইৱানক সহায় কৰি আহিছে। টাইৱানৰ নিৰাপত্তা শক্তিশালী কৰিবলৈ আমেৰিকাই আগতে অস্ত্ৰ দিবলৈ মান্তি হৈছিল। চীনে অৱশ্যে ইয়াৰ সদায় বিৰোধিতা কৰি আহিছিল। কিন্তু এতিয়া হঠাৎ এক ডাঙৰ পৰিৱৰ্তন দেখা গৈছে। আমেৰিকাই টাইৱানক দিবলগীয়া ১৪ বিলিয়ন ডলাৰৰ অস্ত্ৰ বিক্ৰীৰ সিদ্ধান্ত সাময়িকভাৱে বন্ধ কৰি দিছে।
এই বিষয়ে আমেৰিকাৰ নৌসেনাৰ এগৰাকী উচ্চপদস্থ বিষয়া হাং কাওৱে কয় যে ইৰাণৰ লগত ভৱিষ্যতে যুদ্ধ হ’লে আমেৰিকাক নিজৰ বাবে বহুত অস্ত্ৰৰ প্ৰয়োজন হ’ব। সেয়েহে এতিয়া টাইৱানক অস্ত্ৰ নিদি নিজৰ সেনাবাহিনীৰ বাবে জমা কৰি ৰখাৰ সিদ্ধান্ত লোৱা হৈছে। তেওঁ লগতে কয় যে আমেৰিকাৰ হাতত যথেষ্ট অস্ত্ৰ মজুত আছে যদিও ইৰাণৰ লগত কাজিয়া হোৱাৰ আশংকাত এই সাৱধানতা অৱলম্বন কৰা হৈছে। পৰিস্থিতি স্বাভাৱিক হ’লে পুনৰ আন দেশলৈ অস্ত্ৰ বিক্ৰী আৰম্ভ হ’ব বুলিও তেওঁ জানিবলৈ দিয়ে।
বহু বিশেষজ্ঞই দাবী কৰিছে যে আমেৰিকাৰ ৰাষ্ট্ৰপতি ড’নাল্ড ট্ৰাম্প চীনলৈ যোৱাৰ পিছতেই এই সমীকৰণ সলনি হৈছে। চীন ভ্ৰমণৰ সময়ত চীনৰ ৰাষ্ট্ৰপতি ছি জিনপিঙৰ লগত ট্ৰাম্পৰ টাইৱানৰ বিষয়ত বহু কথা আলোচনা হৈছিল। জিনপিঙে ট্ৰাম্পক স্পষ্টকৈ সকীয়াই দিছিল যে টাইৱানৰ কথাত আমেৰিকাই হস্তক্ষেপ কৰিলে আমেৰিকা আৰু চীনৰ মাজৰ সম্পৰ্ক অতি বেয়া হ’ব পাৰে। সেয়েহে জিনপিঙে ট্ৰাম্পক এই বিষয়টোৰ পৰা আঁতৰি থাকিবলৈ আহ্বান জনাইছিল।
উল্লেখযোগ্য যে, ১৯৪৯ চনত চীন আৰু টাইৱান পৃথক হৈছিল। তেতিয়াৰ পৰাই টাইৱানে নিজকে এখন স্বাধীন দেশ বুলি দাবী কৰি আহিছে আৰু আন বহুতো দেশেও ইয়াক স্বীকৃতি দিছে। কিন্তু চীনে টাইৱানক স্বাধীন দেশ বুলি নামানে আৰু নিজৰ দেশৰ এটা অংশ বুলিহে দাবী কৰে। চীনে সদায় কৈ আহিছে যে এদিন টাইৱান চীনৰ লগত চামিল হ’বই। ইয়াৰ বাবেই দুয়োখন দেশৰ মাজত দীৰ্ঘদিনীয়া বিবাদ চলি আছে আৰু বাতৰি অনুসৰি চীনে গোপনে টাইৱানক আক্ৰমণ কৰাৰো পৰিকল্পনা কৰিছে যদিও চীনে আজিলৈকে এই কথা স্বীকাৰ কৰা নাই।
