দ্বিতীয়বাৰৰ বাবে আমেৰিকাৰ ৰাষ্ট্ৰপতি হিচাপে নিৰ্বাচিত হোৱাৰ পিছত প্ৰথমবাৰৰ বাবে চীন ভ্ৰমণলৈ গৈছিল ডোনাল্ড ট্ৰাম্প। এই বিশেষ ভ্ৰমণত তেওঁৰ লগত সংগী হিচাপে গৈছিল বিশ্বৰ অন্যতম ধনী ব্যক্তি ইলন মাস্ক। এতিয়া এই ভ্ৰমণক লৈ এক অতি আচৰিত দাবী কৰিছে জেনিফাৰ জেং নামৰ এগৰাকী চীনা ব্লাগাৰে। তেওঁ দাবী কৰিছে যে চীনত ইলন মাস্কৰ ওপৰত চোৰাংচোৱাগিৰি কৰিবলৈ চীনৰ ৰাষ্ট্ৰপতি ছি জিনপিঙৰ চৰকাৰে এগৰাকী সেনা বিষয়ক গোপনে নিযুক্তি দিছিল।
জেনিফাৰ জেঙে ছচিয়েল মিডিয়াত এখন ছবি শ্বেয়াৰ কৰিছে, য’ত ৰঙা কাপোৰ পিন্ধা এগৰাকী মহিলাক পৰিচাৰিকা হিচাপে কাম কৰি থকা দেখা গৈছে। জেঙৰ দাবী অনুসৰি, এই মহিলাগৰাকী কোনো সাধাৰণ পৰিচাৰিকা নহয়, তেওঁ প্ৰকৃততে চীনৰ সেনাৰ এগৰাকী বিষয়া, যাৰ নাম মেজৰ চেং চেং। কেৱল সেয়াই নহয়, পৰিচাৰিকাৰ সাজযোৰৰ ভিতৰত তেওঁ অস্ত্ৰ লুকুৱাই ৰখা বুলিও দাবী কৰা হৈছে। অৱশ্যে এই ভয়ংকৰ দাবীৰ পিছতো চীন চৰকাৰৰ তৰফৰ পৰা এতিয়ালৈকে কোনো ধৰণৰ প্ৰতিক্ৰিয়া প্ৰকাশ কৰা হোৱা নাই। কিন্তু সমগ্ৰ বিশ্বতে এই বিষয়টোক লৈ তীব্ৰ বিতৰ্কৰ সৃষ্টি হৈছে।
উল্লেখযোগ্য যে, ডোনাল্ড ট্ৰাম্পৰ এই চীন ভ্ৰমণত ইলন মাস্কৰ উপৰিও জেনচেন হুয়াঙৰ দৰে বিশ্বৰ আগশাৰীৰ উদ্যোগপতিসকলেও অংশগ্ৰহণ কৰিছিল। বেইজিং বিমানবন্দৰত উপস্থিত হোৱাৰ লগে লগে ট্ৰাম্পক উষ্ম আদৰণি জনাইছিল চীনৰ উপ-ৰাষ্ট্ৰপতি হান ঝেঙে। এই সময়ত তেওঁৰ লগত চীনত নিযুক্ত আমেৰিকাৰ ৰাষ্ট্ৰদূত ডেভিড পাৰডিউ, আমেৰিকাত নিযুক্ত চীনৰ ৰাষ্ট্ৰদূত শ্বি ফেং আৰু চীনৰ উপ-পৰৰাষ্ট্ৰমন্ত্ৰী মা ঝাওছু উপস্থিত আছিল।
