বলিউডৰ জনপ্ৰিয় অভিনেতা অক্ষয় কুমাৰৰ সমাজসেৱামূলক কামৰ কথা মনোৰঞ্জন জগতত নতুন নহয়। ইয়াৰ আগতেও বহুবাৰ দেশৰ নানা সংকটৰ সময়ত আৰু সাধাৰণ মানুহৰ প্ৰয়োজনত তেওঁ সহায়ৰ হাত আগবঢ়াইছে। এইবাৰ সেই তালিকাত সংযোজিত হ’ল আন এক মহান আৰু মানৱীয় নিদৰ্শন। কাশ্মীৰৰ ভাৰত-পাকিস্তান সীমান্তৱৰ্তী এখন দুৰ্গম গাঁৱৰ চৰকাৰী বিদ্যালয়ৰ ৰূপ সলনি কৰিবলৈ ১ কোটি টকাৰ অনুদান দিলে খিলাড়ী কুমাৰে।
জম্মু আৰু কাশ্মীৰৰ বান্দিপোৰা জিলাৰ গুৰেজ উপত্যকাৰ একেবাৰে শেষ প্ৰান্তত, ভাৰত-পাকিস্তান সীমান্তৰ কাষৰীয়া দুৰ্গম গাঁও নীৰু তুলাইলত এই বিদ্যালয়খন অৱস্থিত। এই জৰাজীৰ্ণ চৰকাৰী বিদ্যালয়খনৰ নতুন আৰু আধুনিক ভৱন নিৰ্মাণ কৰা হৈছে অক্ষয় কুমাৰে দিয়া এই ধনেৰেই। ৫ বছৰ আগতে দিয়া নিজৰ প্ৰতিশ্ৰুতি ৰক্ষা কৰি অভিনেতাজনে প্ৰমাণ কৰিলে যে তেওঁ কেৱল ৰূপালী পৰ্দাৰেই নহয়, প্ৰকৃত জীৱনৰো এজন সঁচা নায়ক।
ঘটনাৰ সূত্ৰপাত হৈছিল ২০২১ চনত। সেই সময়ত সীমান্ত ৰক্ষী বাহিনী বা বিএছএফৰ বিশেষ আমন্ত্ৰণত সীমান্তত কৰ্মৰত জোৱানসকলৰ মনোবল বৃদ্ধি কৰিবলৈ কাশ্মীৰলৈ গৈছিল অক্ষয় কুমাৰ। এই ভ্ৰমণৰ মাজতে তেওঁ উত্তৰ কাশ্মীৰৰ এই দুৰ্গম নীৰু গাঁৱত ভৰি দিছিল। তাত গৈ তেওঁ প্ৰতিকূল বতৰৰ মাজত বিদ্যালয়খনৰ বেয়া অৱস্থা আৰু স্থানীয় কণ কণ ছাত্ৰ-ছাত্ৰীসকলৰ পঢ়া-শুনাত হোৱা চৰম অসুবিধা প্ৰত্যক্ষ কৰে। অভাৱী শিশুসকলৰ সেই কষ্ট দেখি আৱেগিক হৈ পৰে অভিনেতাজন আৰু তেতিয়াই বিদ্যালয়খনৰ আন্তঃগাঁথনি উন্নয়নৰ বাবে নিজৰ ফালৰ পৰা ১ কোটি টকা অনুদান দিয়াৰ কথা ঘোষণা কৰে।
৫ বছৰৰ পাছত অক্ষয়ৰ সেই অনুদানেৰে বিদ্যালয়খনৰ ৰূপ সম্পূৰ্ণৰূপে সলনি হৈ পৰിছে। অভিনেতাজনে দিয়া এই ধনেৰে যি নতুন আধুনিক ভৱন নিৰ্মাণ কৰা হৈছে, তাৰ নাম ৰখা হৈছে শ্ৰী হৰি ওম ভাটিয়া এডুকেশ্যন ব্লক। অক্ষয় কুমাৰে তেওঁৰ প্ৰয়াত পিতৃ হৰি ওম ভাটিয়াৰ স্মৃতিক চিৰস্মৰণীয় কৰি ৰাখিবলৈকে এই নামকৰণ কৰিছে।
নতুনকৈ নিৰ্মাণ হোৱা এই বিদ্যালয় ভৱনত ছাত্ৰ-ছাত্ৰীৰ বাবে আছে আধুনিক সা-সুবিধাৰে সমৃদ্ধ শ্ৰেণীকোঠা, কম্পিউটাৰ লেব, এক সুন্দৰ পুথিভঁৰাল আৰু শিক্ষকসকলৰ বাবে সুকীয়া কাৰ্যালয়ৰ ব্যৱস্থা। ইয়াৰ লগতে, এই দুৰ্গম অঞ্চলৰ ছাত্ৰ-ছাত্ৰীসকলৰ পুষ্টিৰ কথা মনত ৰাখি বিদ্যালয়ৰ মধ্যাহ্ন ভোজন প্ৰকল্পৰ আন্তঃগাঁথনিও আগতকৈ বহুত উন্নত আৰু আধুনিক কৰা হৈছে। সীমান্ত অঞ্চলৰ শিক্ষা ব্যৱস্থাত অক্ষয়ৰ এই অৱদান স্থানীয় বাসিন্দা আৰু প্ৰশাসনৰ ফালৰ পৰা যথেষ্ট প্ৰশংসিত হৈছে।
