ভাৰতত ৰাছিয়াৰ ৰাষ্ট্ৰদূত ডেনিছ আলিপভে বৃহস্পতিবাৰে কয় যে ৰাছিয়াই ২০৩০ চনৰ ভিতৰত তেওঁলোকৰ দেশত আন্তঃৰাষ্ট্ৰীয় ছাত্ৰ-ছাত্ৰীৰ সংখ্যা ৫ লাখলৈ বৃদ্ধি কৰিব বিচাৰিছে।২০২৬ চনৰ ভাৰত-ৰাছিয়ান শিক্ষা সন্মিলনত ভাষণ দি তেওঁ ৰাছিয়াৰ শিক্ষাৰ মানদণ্ড আৰু বিশ্বজুৰি শিক্ষাৰ প্ৰসাৰৰ বাবে ইয়াৰ পদক্ষেপসমূহৰ ওপৰত আলোকপাত কৰে।
আলিপভে কয়, “ৰাছিয়াৰ শিক্ষা ব্যৱস্থা বিখ্যাত বৈজ্ঞানিক বিদ্যালয়, কঠোৰ শৈক্ষিক মানদণ্ড আৰু আধুনিক বিশ্বৰ মূল ক্ষেত্ৰসমূহত ব্যৱহাৰিক প্ৰশিক্ষণৰ বাবে পৰিচিত। ইয়াৰ ভিতৰত অভিযান্ত্ৰিক, চিকিৎসা, কৃত্ৰিম বুদ্ধিমত্তা, ডিজিটেল প্ৰযুক্তি, পাৰমাণৱিক বিজ্ঞান আৰু বিভিন্ন অত্যাধুনিক গৱেষণাৰ দৰে বিষয়সমূহ অন্তৰ্ভুক্ত। বৰ্তমান ৰাছিয়াত প্ৰায় ৩ লাখ আন্তঃৰাষ্ট্ৰীয় ছাত্ৰ-ছাত্ৰীয়ে অধ্যয়ন কৰি আছে, ইয়াৰে প্ৰায় ৪০,০০০ গৰাকী ভাৰতীয়।”
তেওঁ লগতে কয়, “আমি ২০৩০ চনৰ ভিতৰত ৰাছিয়াত আন্তঃৰাষ্ট্ৰীয় ছাত্ৰ-ছাত্ৰীৰ সংখ্যা ৫ লাখলৈ বৃদ্ধি কৰিবলৈ প্ৰতিশ্ৰুতিবদ্ধ। আমাৰ দুয়োখন দেশৰ মাজত শৈক্ষিক আদান-প্ৰদান আৰু যৌথ গৱেষণামূলক পদক্ষেপ বৃদ্ধি পোৱাটো ভাল লাগিছে। সহযোগিতাৰ এই নতুন দিশসমূহে ছাত্ৰ-ছাত্ৰী আৰু গৱেষকৰ বাবে নতুন সুযোগৰ সৃষ্টি কৰিছে আৰু বিশ্বৰ বিভিন্ন সমস্যা সমাধান আৰু উদ্ভাৱনত সহায় কৰিছে।”
আলিপভে কয় যে ৰাছিয়া আৰু ভাৰতৰ বিভিন্ন বিশ্ববিদ্যালয়ে অভিযান্ত্ৰিক, অৰ্থনীতি, শাসন, চিকিৎসা, আধুনিক প্ৰযুক্তি আদি বিভিন্ন ক্ষেত্ৰত একেলগে কাম কৰি আছে।
তেওঁ দুয়োখন দেশৰ মাজত প্ৰতিষ্ঠানিক সহযোগিতাৰ ওপৰত গুৰুত্ব আৰোপ কৰি ৰাছিয়াৰ সৈতে শৈক্ষিক সহযোগিতা বৃদ্ধিৰ বাবে হাৰিয়ানা আৰু ৰাজস্থান চৰকাৰৰ পদক্ষেপক আদৰণি জনায়। তেওঁ কয় যে আগ্ৰাৰ ড০ আম্বেদকাৰ বিশ্ববিদ্যালয় আৰু এমজিআইএমঅ’ বিশ্ববিদ্যালয়ৰ মাজত ছাত্ৰ বিনিময়, ইন্টাৰ্ণশ্বিপ আৰু শৈক্ষিক সহযোগিতাৰ পদক্ষেপক আমি আদৰণি জনাইছো।
চিকিৎসা প্ৰতিষ্ঠানসমূহৰ ভিতৰত চেচেনভ ফাৰ্ষ্ট মস্কো ষ্টেট মেডিকেল ইউনিভাৰ্চিটিয়ে আই আই টি বম্বে, জে এছ এছ একাডেমী অৱ হাইয়াৰ এডুকেচন এণ্ড ৰিচাৰ্চ, দিল্লী বিশ্ববিদ্যালয় আৰু জে আই এছ ইউনিভাৰ্চিটিৰ সৈতে চিকিৎসা শিক্ষা, যৌথ গৱেষণা আৰু শৈক্ষিক বিনিময়ৰ বাবে কাম কৰি আছে।
কাজান ফেডাৰেল ইউনিভাৰ্চিটিয়ে ভাৰতৰ আইটিইচি আৰু জিআইএন কাৰ্যসূচীৰ অধীনত ইংৰাজী আৰু একাডেমিক মবিলিটি প্ৰগ্ৰেমৰ চিকিৎসা পাঠ্যক্ৰম আৰম্ভ কৰিছে। ৰাছিয়ান ভাষাৰ কাৰ্যসূচীকে ধৰি ৰাছিয়াৰ সৈতে শৈক্ষিক সহযোগিতা বৃদ্ধিৰ বাবে হাৰিয়ানা আৰু ৰাজস্থান চৰকাৰে গ্ৰহণ কৰা পদক্ষেপকো তেওঁ আদৰণি জনায়।
ভাৰতৰ বিভিন্ন প্ৰান্তত ৰাছিয়ান ভাষা কেন্দ্ৰ মুকলি কৰাৰ কথাও আলিপভে আলোকপাত কৰে। “২০২৫-২৬ চনতেই তিৰুৱনন্তপুৰম, বেংগালুৰু আৰু আহমেদাবাদত ৰাছিয়ান ভাষা কেন্দ্ৰ মুকলি কৰা হৈছে। ভাৰতৰ অন্যান্য ৰাজ্যৰ প্ৰতিষ্ঠানসমূহেও এনে পদক্ষেপৰ প্ৰতি আগ্ৰহ প্ৰকাশ কৰিছে।”
অফিচিয়েল ৱেবছাইটৰ মতে, দিল্লীৰ কন’ট প্লেচৰ লে মেৰিডিয়েন হোটেলত ২৮ মে’ৰ পৰা ২৯ মে’লৈ ভাৰত-ৰাছিয়ান এডুকেশ্যন ছামিট ২০২৬ অনুষ্ঠিত হৈছে। এই সন্মিলনত ভাৰত আৰু ৰাছিয়াৰ নীতি নিৰ্ধাৰক, শিক্ষাবিদ আৰু প্ৰতিষ্ঠানিক মুৰব্বীসকলক একত্ৰিত কৰি উচ্চ শিক্ষা, গৱেষণা আৰু ছাত্ৰ বিনিময়ৰ ক্ষেত্ৰত দ্বিপাক্ষিক সহযোগিতা শক্তিশালী কৰাৰ প্ৰয়াস কৰা হৈছে।
ৱেবছাইটটোত লগতে কোৱা হৈছে যে এতিয়া দ্বিতীয় বৰ্ষত ভৰি দিয়া ভাৰত-ৰাছিয়ান শিক্ষা সন্মিলন ভাৰত আৰু ৰাছিয়াৰ মাজত শৈক্ষিক সহযোগিতাৰ এক ডাঙৰ মঞ্চত পৰিণত হৈছে। এই সন্মিলনৰ মূল উদ্দেশ্য হৈছে শৈক্ষিক সম্পৰ্ক শক্তিশালী কৰা, উচ্চ শিক্ষাৰ সুযোগ সম্প্ৰসাৰণ কৰা, উদ্যোগৰ সৈতে অংশীদাৰিত্ব গঢ়ি তোলা আৰু শিক্ষাৰ ক্ষেত্ৰত উদ্ভাৱনসমূহ প্ৰদৰ্শন কৰা। ইয়াৰ জৰিয়তে দুয়োখন দেশৰ প্ৰতিষ্ঠানসমূহক সংযোগ কৰি ছাত্ৰ-ছাত্ৰী আৰু গৱেষকসকলৰ বাবে নতুন পথ প্ৰশস্ত কৰাই লক্ষ্য।
