ত্ৰিপুৰাৰ মুখ্যমন্ত্রী মাণিক সাহাই দাবী কৰিছে যে কমিউনিষ্টসকল বৰ্তমান ৰাজনৈতিকভাৱে দেউলীয়া হৈ পৰিছে। তেওঁলোকে বিভিন্ন ধৰণে ভাৰতীয় জনতা পার্টীক কলঙ্কিত কৰাৰ চেষ্টা চলাইছে। অনাগত দিনত চিপিএমৰ হাতত থকা ১০খন আসন ভাৰতীয় জনতা পার্টীয়ে কাঢ়ি আনিব। ইয়াৰ উপৰি অনাগত দিনত বিজেপিয়ে সাংগঠনিকভাৱে অধিক শক্তিশালী হ’ব লাগিব। শুকুৰবাৰে আগৰতলাৰ ৰবীন্দ্ৰ শতবার্ষিকী ভৱনত ভাৰতীয় জনতা পার্টীৰ নৱনিযুক্ত প্রদেশ সভাপতি অভিষেক দেৱৰায়ৰ সম্বৰ্ধনা অনুষ্ঠানত উপস্থিত থাকি মুখ্যমন্ত্রী মাণিক সাহাই এই মন্তব্য কৰে।
অনুষ্ঠানত ভাষণ প্ৰসংগত মাণিক সাহাই কয় যে অনুশাসন অতি গুৰুত্বপূৰ্ণ। জীৱনত সঠিক দিশত আগবাঢ়িবলৈ হ’লে অনুশাসন থাকিবই লাগিব। কার্যকর্তাসকলে ৰাইজৰ আশা-আকাংক্ষা অনুসৰি কাম কৰিব লাগিব। বুথ সভাপতিসকলক আৰু অধিক শক্তিশালী কৰিব লাগিব। চৰকাৰৰ কাম-কাজৰ বিষয়ে বুথে বুথে অৱগত কৰিব লাগিব। এই স্তৰত কাম কৰিবলৈ তেওঁ নৱনিযুক্ত সভাপতিগৰাকীক আহ্বান জনায়। তেতিয়াহে কেৱল ২০২৮ চনতে নহয়, পৰৱৰ্তী সময়তো ভাৰতীয় জনতা পার্টীৰ চৰকাৰ বৰ্তি থাকিব। তেওঁ কয় যে বিজেপিৰ কোনো বিকল্প নাই আৰু কেতিয়াও নহবও। কংগ্ৰেছ আৰু চিপিএমক সকলোৱে দেখিছে। কমিউনিষ্টসকলৰ মুখা এতিয়া খহি পৰিছে। বহুতে ছচিয়েল মিডিয়া বা ইউটিউবত আহি উল্টাপাল্টা কথা কৈছে আৰু বিজেপিক কলুষিত কৰিবলৈ চেষ্টা কৰিছে। কিন্তু মনত ৰাখিব লাগিব যে এইখন কংগ্ৰেছ বা তৃণমূলৰ পার্টী নহয়, এইখন ভাৰতীয় জনতা পার্টীহে।
মুখ্যমন্ত্রীগৰাকীয়ে নৱনিযুক্ত সভাপতিগৰাকীক কয় যে চিপিএমৰ হাতত থকা ১০খন আসন বিজেপিয়ে পুনৰ নিজৰ হাতলৈ আনিব। যিহেতু সমগ্ৰ ভাৰততে চিপিএম নিঃশেষ হৈ গৈছে, গতিকে ত্ৰিপুৰাতো ইয়াৰ বাবে বিশেষ অভিযান চলাব লাগিব। তেওঁলোকক কোনো পৰিস্থিতিতে এৰি দিয়া নহ’ব, কাৰণ তেওঁলোক দেশ আৰু ৰাজ্যৰ বাবে ক্ষতিকাৰক। মানুহক বিভ্ৰান্ত কৰা আৰু মিছা কথা কোৱাটোৱেই এই দলটোৰ ধৰ্ম। তেওঁলোকৰ শাসনকালত সোণালী যুগৰ কথা কোৱা হৈছিল যদিও তেওঁলোকৰ দিনতে এই ড্ৰাগছ মাফিয়াৰ সৃষ্টি হৈছিল আৰু এতিয়া সেই ড্ৰাগছ মাফিয়াসকলৰ হাতত হেণ্ডকাফ পৰিছে।
মুখ্যমন্ত্রী সাহাই আৰু কয় যে অনাগত দিনত বিজেপিয়ে সাংগঠনিকভাৱে আৰু অধিক শক্তিশালী হ’ব লাগিব। চৰকাৰে চৰকাৰৰ কাম কৰিব আৰু বাতৰি কাকতত প্ৰকাশ পোৱা খবৰৰ ওপৰতেও যথোচিত ব্যৱস্থা গ্ৰহণ কৰা হৈছে। ত্ৰিপুৰাৰ সংস্কাৰমূলক কাম-কাজক লৈ প্ৰধানমন্ত্ৰী নৰেন্দ্ৰ মোদীয়ে অতি সন্তোষ প্ৰকাশ কৰিছে। উত্তৰ-পূৰ্বাঞ্চলৰ ভিতৰত জিএছডিপি আৰু জনমূৰি আয়ৰ ক্ষেত্ৰত ত্ৰিপুৰা দ্বিতীয় সৰ্বোচ্চ স্থানত আছে। নীতি আয়োগে ত্ৰিপুৰাক ফ্ৰণ্ট ৰানাৰ ষ্টেট হিচাপে ঘোষণা কৰিছে। গোৱা আৰু মিজোৰামৰ পিছতে সাক্ষৰতাৰ দিশৰ পৰা দেশৰ তৃতীয়খন ৰাজ্য হিচাপে পৰিগণিত হৈছে ত্ৰিপুৰা। ৰাজ্যখনত এমবিবিএছ আৰু পোষ্ট গ্ৰেজুৱেচনৰ আসন সংখ্যা যথেষ্ট বৃদ্ধি পাইছে। লগতে ডেন্টাল কলেজ, ফাৰ্মেচি কলেজ আৰু বিএছচি নার্সিং কলেজ আদি গঢ়ি উঠিছে। ৰাজ্যখনৰ আন্তঃগাঁথনি উন্নয়নৰ বাবে প্ৰায় ৭ হাজাৰ কোটি টকা আৱণ্টন দিয়া হৈছে।
উল্লেখ্য যে বৃহস্পতিবাৰে বিজেপিৰ কেন্দ্ৰীয় নেতৃত্বই তৰুণ বিধায়ক অভিষেক দেৱৰায়ৰ নাম ত্ৰিপুৰা বিজেপিৰ প্ৰদেশ সভাপতি হিচাপে ঘোষণা কৰিছিল। এই সম্বৰ্ধনা অনুষ্ঠানত ভাৰতীয় জনতা পার্টীৰ নৱনিযুক্ত সভাপতি তথা বিধায়ক অভিষেক দেৱৰায়, সদ্যপ্ৰাক্তন প্রদেশ সভাপতি তথা সাংসদ ৰাজীৱ ভট্টাচাৰ্য, প্ৰভাৰী ড° ৰাজদীপ ৰায়, মন্ত্ৰী পৰিষদৰ সদস্যসকলৰ লগতে বিধায়ক আৰু অন্যান্য শীৰ্ষ নেতৃত্ব উপস্থিত আছিল।
