আমেৰিকা যুক্তৰাষ্ট্ৰৰ নেব্ৰাস্কাৰ এখন হোটেলত মানৱ সৰবৰাহকাৰীক ধন দি এগৰাকী নাবালিকাক যৌন নিৰ্যাতন চলোৱাৰ অপৰাধত গুজৰাটৰ এগৰাকী ২৭ বছৰীয়া যুৱকক দহ বছৰৰ কাৰাদণ্ড বিহা হৈছে। যুৱকজনৰ নাম কাৱনকুমাৰ পেটেল বুলি জানিব পৰা গৈছে। যোৱা ছাব্বিশ মে‘ তাৰিখে আমেৰিকাৰ ওমাহত থকা এখন ফেডাৰেল আদালতৰ ন্যায়াধীশ জোচেফ এফ বেটেইলনে এই কঠোৰ শাস্তি প্ৰদান কৰে।
আমেৰিকাৰ চৰকাৰী বিষয়াসকলে জানিবলৈ দিয়া মতে, দহ বছৰৰ কাৰাদণ্ড সম্পূৰ্ণ কৰাৰ পিছত পেটেলে আৰু পাঁচ বছৰ নিৰীক্ষণত কটাব লাগিব। ইয়াৰ লগতে এই কথাও পোহৰলৈ আহিছে যে যুৱকজনে আমেৰিকাত অবৈধভাৱে বসবাস কৰি আছিল। সেয়েহে তেওঁৰ কাৰাগাৰৰ ম্যাদ উকলি যোৱাৰ পিছত তেওঁক নিজৰ দেশলৈ ঘূৰাই পঠোৱাৰ ব্যৱস্থা কৰা হ‘ব বুলিও কৰ্তৃপক্ষই জানিবলৈ দিছে।
এই গোটেই ঘটনাটো পোহৰলৈ আহে ২০২৫ চনৰ ৬ জানুৱাৰীত। সেইদিনা ওমাহা আৰক্ষীয়ে আমেৰিকিন নামৰ এখন হোটেলত চুৰিৰ খবৰ পাই তালৈ গৈছিল। তালৈ গৈয়েই আৰক্ষীয়ে তাত চলি থকা মানৱ সৰবৰাহৰ বিষয়ে সন্দেহ কৰে আৰু তদন্ত আৰম্ভ কৰে। ইয়াৰ পিছতে হোমলেণ্ড চিকিউৰিটি টাস্ক ফ’ৰ্চ আৰু ওমাহা আৰক্ষীয়ে যুটীয়াভাৱে অভিযান চলাই পোন্ধৰ আৰু ষোল্ল বছৰ বয়সীয়া দুজনী ছোৱালীক উদ্ধাৰ কৰে। এই ছোৱালী দুজনীক অন্য এখন ৰাজ্যৰ পৰা আনি তাত ধনৰ বিনিময়ত যৌন কাৰ্যত ব্যৱহাৰ কৰা হৈছিল।
উদ্ধাৰ হোৱা নাবালিকা দুগৰাকীয়ে আৰক্ষীক জনোৱা মতে, সৰবৰাহকাৰীসকলে তেওঁলোকক হোটেলৰ কৰ্মচাৰীৰ সৈতে যৌন সম্পৰ্ক স্থাপন কৰিবলৈ বাধ্য কৰিছিল। তেনে কৰিলেহে হোটেলৰ কোঠাৰ ভাৰা কমাই দিয়া হ‘ব, নহ‘লে তেওঁলোকক হোটেলৰ পৰা উলিয়াই দিয়া হ‘ব বুলি ভাবুকি দিয়া হৈছিল। আৰক্ষীৰ অনুসন্ধানত পোহৰলৈ আহে যে হোটেলৰ দুজন কৰ্মচাৰীয়ে নাবালিকা এগৰাকীৰ সৈতে যৌন সম্পৰ্ক স্থাপন কৰিবলৈ সৰবৰাহকাৰীক ধন দিছিল আৰু তৃতীয় এজন কৰ্মচাৰীয়ে আনগৰাকী নাবালিকাৰ সৈতে যৌন কাৰ্যত লিপ্ত হৈছিল।
এই জঘন্য কামৰ বিনিময়ত হোটেলৰ কৰ্মচাৰীসকলে সৰবৰাহকাৰী আৰু নাবালিকাসকলক কোনো বাধা নোহোৱাকৈ কেইবাদিনো ধৰি সেই হোটেলখনত থাকিবলৈ দিছিল। সেই সময়ছোৱাত সৰবৰাহকাৰীসকলে ছোৱালীকেইজনীৰ বিষয়ে অনলাইনো বিজ্ঞাপন দিছিল আৰু আন গ্ৰাহকৰ সৈতেও যোগাযোগ কৰিছিল। ভুক্তভোগী ছোৱালীকেইজনীয়ে তদন্তকাৰী বিষয়াক জনাইছিল যে তেওঁলোকক খাবলৈও অতি কমকৈ দিয়া হৈছিল আৰু সৰবৰাহকাৰীৰ সকলো কথা মানি লোৱাৰ বাহিৰে তেওঁলোকৰ হাতত অন্য কোনো উপায়েই নাছিল।
আমেৰিকাৰ অধিবক্তা লেছলী উডছে এই ঘটনা সন্দৰ্ভত কয় যে, এনে ঘটনাই মানৱ সৰবৰাহ ৰোধ কৰিবলৈ আৰু দুৰ্বল শিশুসকলক ৰক্ষা কৰিবলৈ সকলোৱে মিলি কাম কৰাৰ প্ৰয়োজনীয়তাৰ কথা সোঁৱৰাই দিয়ে। তেওঁ এই অভিযানত জড়িত আৰক্ষী আৰু অন্যান্য সংস্থাসমূহক নাবালিকা দুগৰাকীক সফলতাৰে উদ্ধাৰ কৰাৰ বাবে ধন্যবাদ জ্ঞাপন কৰে।
কৰ্তৃপক্ষই সাধাৰণ ৰাইজকো আহ্বান জনাইছে যে যদি তেওঁলোকে সমাজৰ কতো এনে ধৰণৰ মানৱ সৰবৰাহ বা অবৈধ কাৰ্যকলাপৰ সন্দেহ কৰে, তেন্তে লগে লগে স্থানীয় আৰক্ষীক খবৰ দিব লাগে। ৰাইজৰ সজাগতাই এনে জঘন্য অপৰাধৰ বলি হোৱা লোকসকলক উদ্ধাৰ কৰাত সহায় কৰিব বুলিও বিষয়াসকলে মত প্ৰকাশ কৰে।
