ফুটবল বিশ্বকাপ আৰম্ভ হ’বলৈ মাজত মাত্ৰ ১০ দিন বাকী থকা অৱস্থাত অৱশেষত ভাৰতীয় ফুটবলপ্ৰেমীসকলৰ দীৰ্ঘদিনীয়া উৎকণ্ঠাৰ অন্ত পৰিছে। ভাৰতত বিশ্বকাপৰ মেচসমূহ ক’ত সম্প্ৰচাৰ হ’ব, তাক লৈ চলি থকা সকলো অনিশ্চয়তাৰ অৱসান ঘটাই জি এণ্টাৰটেইনমেণ্ট এণ্টাৰপ্ৰাইজ লিমিটেডে সোমবাৰে এক ডাঙৰ ঘোষণা কৰে। বিশ্ব ফুটবলৰ সৰ্বোচ্চ নিয়ামক সংস্থা ফিফাৰ (FIFA) সৈতে হোৱা এক বৃহৎ চুক্তি মৰ্মে জি এণ্টাৰটেইনমেণ্টে অনাগত আঠ বছৰৰ বাবে ভাৰতত ফুটবল বিশ্বকাপ সম্প্ৰচাৰৰ সম্পূৰ্ণ স্বত্ব লাভ কৰিছে।
এই দীৰ্ঘম্যাদী চুক্তিৰ অধীনত কেৱল চলিত বৰ্ষৰ পুৰুষৰ ফুটবল বিশ্বকাপেই নহয়, বৰঞ্চ ২০২৭ আৰু ২০৩১ চনৰ মহিলা ফুটবল বিশ্বকাপ, লগতে ২০৩০ আৰু ২০৩৪ চনৰ পুৰুষৰ ফুটবল বিশ্বকাপসহ মুঠ ৩৯ টা গুৰুত্বপূৰ্ণ আন্তঃৰাষ্ট্ৰীয় প্ৰতিযোগিতাৰ সম্প্ৰচাৰ কৰা হ’ব। জি এণ্টাৰটেইনমেণ্টে জানিবলৈ দিয়া মতে, শেহতীয়াকৈ তেওঁলোকে মুকলি কৰা চাৰিটা নতুন ক্ৰীড়া চেনেল ক্ৰমে— ইউনাইট৮ স্প’ৰ্টছ ১, ইউনাইট৮ স্প’ৰ্টছ ১ এইচডি, ইউনাইট৮ স্প’ৰ্টছ ২ আৰু ইউনাইট৮ স্প’ৰ্টছ ২ এইচডিত এই মেচসমূহ পোনপটীয়াকৈ সম্প্ৰচাৰ কৰা হ’ব। ইয়াৰ উপৰিও টেলিভিছনৰ উপভোক্তাৰ উপৰি ডিজিটেল দৰ্শকসকলে জি-ফাইভ (ZEE5) ওটিটি এপৰ জৰিয়তেও খেলসমূহ উপভোগ কৰিব পাৰিব।
যদিও এই চুক্তিৰ প্ৰকৃত বিত্তীয় সবিশেষ আনুষ্ঠানিকভাৱে ৰাজহুৱা কৰা হোৱা নাই, তথাপিও এক বিশেষ সূত্ৰৰ খবৰ অনুসৰি, ভাৰতীয় মূল্যত প্ৰায় ৩৩২ কোটি টকাৰ বিনিময়ত ফিফাৰ সৈতে এই আঠ বছৰীয়া চুক্তি চূড়ান্ত কৰা হৈছে। উল্লেখযোগ্য যে ভাৰতৰ আন কোনো ক্ৰীড়া সম্প্ৰচাৰকাৰী সংস্থাই এই বৃহৎ পৰিমাণৰ ধন বিনিয়োগ কৰিবলৈ সন্মত হোৱা নাছিল। বিগত কেইবাদিনো ধৰি ফিফাৰ শীৰ্ষ নেতৃত্বৰ সৈতে জি এণ্টাৰটেইনমেণ্টৰ আলোচনা অব্যাহত আছিল আৰু সোমবাৰে এই প্ৰক্ৰিয়াৰ সফল সামৰণি পৰে।
চুক্তি প্ৰক্ৰিয়া চূড়ান্ত হোৱাৰ পিছত সন্তোষ প্ৰকাশ কৰি ফিফাৰ চিফ বিজনেছ অফিচাৰ ৰোমি গাই কয় যে ভাৰতত ফুটবলৰ এক বৃহৎ দৰ্শক সমাজ আছে, যাৰ বাবে ভাৰতীয় বজাৰখন ফিফাৰ বাবে সদায় অত্যন্ত গুৰুত্বপূৰ্ণ। জি এণ্টাৰটেইনমেণ্টে ফুটবল বিশ্বকাপৰ সম্প্ৰচাৰৰ বাবে আগবাঢ়ি অহাত তেওঁ আনন্দ প্ৰকাশ কৰে। বিভিন্ন টিভি চেনেল আৰু ওটিটি মাধ্যমৰ জৰিয়তে ভাৰতৰ চুকে-কোণে থকা ফুটবলপ্ৰেমী দৰ্শকে অতি উচ্চ মানদণ্ডৰে এই মেচসমূহ উপভোগ কৰিব পাৰিব বুলি তেওঁ গভীৰ আস্থা প্ৰকাশ কৰে। বৰ্তমান সম্প্ৰচাৰ সম্পৰ্কীয় কাৰিকৰী প্ৰস্তুতিসমূহ ক্ষীপ্ৰতাৰে আগবঢ়াই নিয়া হৈছে।
