শুৱালকুছি অঞ্চলত শেহতীয়াকৈ এক অতি বেদনাদায়ক ঘটনা পোহৰলৈ আহিছে, যিয়ে মানৱতাক লজ্জানত কৰিছে। তাত দীৰ্ঘদিন ধৰি এটা ভাৰাঘৰত থকা তৰুলতা দাস নামৰ এগৰাকী সত্তৰ বছৰীয়া বৃদ্ধা মাতৃ নিজৰে সন্তানৰ নিৰ্দয়তাৰ চিকাৰ হৈছে। তেওঁৰ এই অৱস্থাই সমগ্ৰ স্থানীয় ৰাইজৰ মাজত তীব্ৰ ক্ষোভৰ সৃষ্টি কৰিছে।
জানিব পৰা মতে, অতীতত তৰুলতা দাসৰ স্বামীয়ে কাঠৰ কাম কৰি ঘৰখন চলাইছিল। তেঁওলোকৰ কবিতা, মানসী আৰু মঞ্জু নামৰ তিনিজনী ছোৱালী আছিল। স্বামীৰ মৃত্যুৰ পাছত মাতৃগৰাকীয়ে আটাইকেইজনী জীয়ৰীক বিয়া দি উলিয়াই দিছিল। কিন্তু বয়স বাঢ়ি অহাৰ বাবে যেতিয়া তেওঁ শাৰীৰিকভাৱে অসুস্থ আৰু অসহায় হৈ পৰিল, তেতিয়া জীয়ৰীসকলে মাকৰ চোৱাচিতা কৰিবলৈ টান পালে। সেইবাবে তেওঁলোকে মাকক গুৱাহাটীৰ এখন বৃদ্ধাশ্ৰমত থৈ আহিছিল। পাছত বৃদ্ধাশ্ৰমৰ মাহেকীয়া খৰচখিনি দিবলৈ মন নকৰি তেওঁলোকে মাকক তাৰ পৰা উলিয়াই আনি গুৱাহাটীৰ গড়চুক অঞ্চলৰ এটা ৰাজপথৰ কাষত নিৰ্মমভাৱে মাৰধৰ কৰি এৰি থৈ পলাই যায়।
সেই নিশাই গড়চুক আৰক্ষীয়ে ৰাস্তাৰ কাষৰ পৰা বৃদ্ধাগৰাকীক উদ্ধাৰ কৰে আৰু শুৱালকুছি আৰক্ষীক খবৰ দি তেওঁলোকৰ হাতত গতায়। সমগ্ৰ ঘটনাটো জানিব পাৰি শুৱালকুছি থানাৰ ভাৰপ্ৰাপ্ত বিষয়া বিকু বৰ্মনে তিনিওগৰাকী জীয়ৰীক থানালৈ মাতি আনে। কিন্তু তাৰ পিছতো কোনো এজনী জীয়ৰীয়ে মাকক নিজৰ লগত নিবলৈ সন্মত নহ’ল। অৱশেষত উপায়বিহীন হৈ আৰক্ষী বিষয়াজনে লটাৰীৰ সহায় লবলগীয়া হয়। এই লটাৰীৰ সিদ্ধান্ত অনুসৰি এতিয়াৰে পৰা প্ৰতিগৰাকী জীয়ৰীয়ে এসপ্তাহকৈ মাকক নিজৰ লগত ৰাখি পোহ-পালন কৰিব লাগিব। আৰক্ষীৰ এই প্ৰচেষ্টাই বৃদ্ধাগৰাকীক এটা সাময়িক আশ্ৰয় দিলে যদিও, নিজৰ জন্মদাত্ৰী মাতৃৰ স্থান লটাৰীৰ মাধ্যমেৰে থিৰ কৰিবলগীয়া হোৱা এই ঘটনাই আজিৰ সমাজ ব্যৱস্থাৰ এক কৰুণ আৰু বাস্তৱ ছবি ডাঙি ধৰিছে।
