উন্নয়নৰ দোহাই দি গুৱাহাটী মহানগৰীত চলি থকা অবাধ বৃক্ষ নিধনৰ ফলত এতিয়া গছ-গছনিৰ স্থান অধিকাৰ কৰিছে কেৱল উৰণীয়া সেতু আৰু কংক্ৰিটৰ অট্টালিকাই। চৰকাৰৰ এনে অপৰিকল্পিত কাৰ্যৰ ফলশ্ৰুতিতেই মহানগৰীত সাম্প্ৰতিক সময়ত অসহনীয় গ্ৰীষ্মপ্ৰৱাহ আৰু বায়ুপ্ৰদূষণে ভয়াবহ ৰূপ ধাৰণ কৰিছে। ব্যাপক হাৰত গছ কটাৰ বিপৰীতে চৰকাৰে পৰ্যাপ্ত পৰিমাণে নতুন গছপুলি ৰোপণ নকৰাত সৰ্বত্ৰে প্ৰতিক্ৰিয়াৰ সৃষ্টি হৈছে।
চৰকাৰৰ এনে পৰিৱেশ-বিৰোধী নীতিৰ তীব্ৰ বিৰোধিতা কৰি আজি ৫ জুন, অৰ্থাৎ বিশ্ব পৰিৱেশ দিৱসৰ সৈতে সংগতি ৰাখি ‘ধৰিত্ৰী সুৰক্ষা মঞ্চ, অসম’ নামৰ সংগঠনটোৱে চৰকাৰী কাৰ্যৰ প্ৰতিবাদস্বৰূপে মহানগৰীৰ কেইবাখনো স্থানত গছপুলি ৰোপণ কাৰ্যসূচী ৰূপায়ণ কৰে।
সংগঠনটোৱে প্ৰথমে দিছপুৰৰ নাবাৰ্ড কাৰ্যালয়ৰ সমীপৰ পৰা এই বৃক্ষৰোপণ কাৰ্যসূচীৰ শুভাৰম্ভ কৰে। উক্ত কাৰ্যসূচীত ‘নৰ্থইষ্ট নাও’ৰ মুখ্য সম্পাদক পৰেশ মালাকাৰ, অসম জাতীয় পৰিষদৰ নেত্ৰী কুংকি চৌধুৰী, বিশিষ্ট সমাজকৰ্মী গজেন কলিতা আৰু ভূতত্ত্ববিদ বিজয় কৃষ্ণ চেতিয়া প্ৰমুখ্যে ভালেকেইগৰাকী বিশিষ্ট ব্যক্তি উপস্থিত থাকে।
উপস্থিত ব্যক্তিসকলে চৰকাৰৰ প্ৰকৃতি ধ্বংসকাৰী নীতিৰ বিৰুদ্ধে মুকলিকৈ ক্ষোভ প্ৰকাশ কৰে। ইয়াৰ পৰৱৰ্তী পৰ্যায়ত সকলোৱে একগোট হৈ দীঘলীপুখুৰী-আমবাৰী অঞ্চল আৰু অসম বস্ত্ৰবিদ্যা প্ৰতিষ্ঠান (Assam Textile Institute)-ৰ সন্মুখভাগত গছপুলি ৰোপণ কৰে।
অসম বস্ত্ৰবিদ্যা প্ৰতিষ্ঠানৰ চৌহদত অনুষ্ঠিত কাৰ্যসূচীটি প্ৰতিষ্ঠানখনৰ অধ্যক্ষ ৰাম চন্দ্ৰ দাসে শুভাৰম্ভ কৰে, য’ত অৰ্ধশতাধিক কৰ্মচাৰী আৰু ছাত্ৰ-ছাত্ৰীয়ে স্বতঃস্ফূৰ্তভাৱে অংশগ্ৰহণ কৰে। পৰিৱেশ সুৰক্ষাৰ এই সংগ্ৰামখনত অংশগ্ৰহণ কৰি সহযোগিতা আগবঢ়োৱাৰ বাবে ‘ধৰিত্ৰী সুৰক্ষা মঞ্চ, অসম’ৰ মুখ্য আহ্বায়ক মহেশ ডেকা আৰু আন দুগৰাকী আহ্বায়ক ক্ৰমে অঞ্জুমান ভৰদ্বাজ তথা উৎপলা দাসে সকলোলৈকে আন্তৰিক ধন্যবাদ আৰু কৃতজ্ঞতা জ্ঞাপন কৰে।
