পৰিৱেশ সংৰক্ষণৰ প্ৰতি সজাগতা বৃদ্ধি আৰু বিশ্বব্যাপী ৰাজনৈতিক কৰ্মোদ্যোগ তথা জনচেতনা জাগ্ৰত কৰাৰ উদ্দেশ্যে প্ৰতি বছৰে ৫ জুন তাৰিখটো সমগ্ৰ বিশ্বতে পৰিৱেশ দিৱস হিচাপে পালন কৰা হয়। উল্লেখযোগ্য যে, ১৯৭৩ চনৰ ৫ জুনত প্ৰথমবাৰৰ বাবে এই দিৱস উদযাপন কৰা হৈছিল।
এই দিৱসৰ সৈতে সংগতি ৰাখি অসমৰ পৰা পৰিচালিত ৰাষ্ট্ৰীয় পৰ্যায়ৰ অগ্ৰণী সামাজিক সংগঠন ‘ব্ৰাদাৰ্ছ’ৰ (Brothers) উদ্যোগত দেশৰ বিভিন্ন প্ৰান্তত এক ব্যাপক বৃক্ষৰোপণ কাৰ্যসূচী ৰূপায়ণ কৰা হয়। মধ্যপ্ৰদেশ আৰু মহাৰাষ্ট্ৰৰ লগতে অসমৰ মাজুলী, লখিমপুৰ, কামৰূপ আৰু তিনিচুকীয়া আদি জিলাৰ বিভিন্ন স্থানত সংগঠনটোৱে সফলতাৰে এই কাৰ্যসূচী সম্পন্ন কৰে।
সংগঠনটোৰ ৰাষ্ট্ৰীয় সচিব প্ৰধান ড° দিব্যজ্যোতি শইকীয়াৰ আহ্বানমৰ্মে দেশৰ ভিন্ন প্ৰান্তৰ সদস্যসকলে স্থানীয় যুৱ সংস্থা, বিদ্যালয়ৰ শিক্ষক আৰু ছাত্ৰ-ছাত্ৰীৰ সহযোগত এই কাৰ্যসূচীত অংশগ্ৰহণ কৰে। ড° শইকীয়াৰ সক্ৰিয় নেতৃত্বত শিক্ষক আৰু ছাত্ৰ-ছাত্ৰীসকলে একেলগে আমলখি, বকুল, অৰ্জুন, মেহগনি, নাহৰ, মধুৰীআম আদি ভিন্ন প্ৰজাতিৰ কেইবাশতাধিক গছপুলি ৰোপণ কৰি পৰিৱেশ সংৰক্ষণৰ এক সুন্দৰ নিদৰ্শন দাঙি ধৰে।
প্ৰণিধানযোগ্য যে, ‘ব্ৰাদাৰ্ছ’ৰ ৰাষ্ট্ৰীয় সচিব প্ৰধান ড° দিব্যজ্যোতি শইকীয়া সমগ্ৰ ভাৰতবৰ্ষৰ অন্যতম অন্ধবিশ্বাস বিৰোধী নেতা, যুক্তিবাদী চিন্তাবিদ তথা আন্তঃৰাষ্ট্ৰীয় খ্যাতিসম্পন্ন মানৱাধিকাৰ আৰু সমাজ কৰ্মী হিচাপে সুপৰিচিত। তেখেতৰ সবল নেতৃত্বত ‘ব্ৰাদাৰ্ছ’-এ বিগত সময়ছোৱাত দেশৰ বুকুত শিপাই থকা অন্ধবিশ্বাস আৰু ‘ডাইনী’ নিৰ্যাতনৰ দৰে অন্ধকাৰময় কু-প্ৰথা ৰোধ কৰাৰ ক্ষেত্ৰত এক উল্লেখনীয় ভূমিকা পালন কৰি আহিছে। সমাজ সংস্কাৰৰ ক্ষেত্ৰত সংগঠনটোৰ এই বলিষ্ঠ পদক্ষেপক ‘টাইম’ (TIME) মেগাজিনকে আদি কৰি বিশ্বৰ কেইবাখনো আগশাৰীৰ সংবাদ মাধ্যমে ইতিমধ্যে ভূয়সী প্ৰশংসা কৰিছে।
