মধ্য গুৱাহাটীৰ বিজেপি বিধায়ক অনাঅসমীয়া বিজয় গুপ্তাৰ বিজয় হোৱাৰ পিছতে গুৱাহাটীত আৰম্ভ হৈছে বিহাৰী সম্প্ৰদায়ৰ দাদাগিৰি আৰু অতপালি। অসমৰ বুকুত থাকি, অসমৰ বতাহ-পানী খাই অৱশেষত অসমৰে ৰাজধানী মহানগৰী গুৱাহাটীত অসমীয়াক ‘গ’ বেক’ ধ্বনি দিয়াৰ এক চৰম ধৃষ্টতা তথা লজ্জাজনক ঘটনাই অসম জোকাৰি হৈছে। গুৱাহাটীৰ চেৰাবভাটিৰ আৰ্য নগৰত দেওবাৰে এক ভয়ংকৰ উত্তাল পৰিস্থিতিৰ সৃষ্টি হয়, য’ত একাংশ অনাঅসমীয়া বিহাৰী সম্প্ৰদায়ৰ উন্মত্ত লোকে উগ্ৰ অসম বিৰোধী শ্ল’গানেৰে সমগ্ৰ অঞ্চলটো কঁপাই তোলে। অভিযোগ উঠিছে যে নৱ-নিৰ্বাচিত বিধায়ক বিজয় গুপ্তাৰ আশীৰ্বাদধন্য তথা তেওঁৰ অতি ঘনিষ্ঠ সহযোগী, শাসকীয় বিজেপিৰ ভাতৃ সংগঠন ভাৰতীয় জনতা যুৱ মৰ্চাৰ অসম প্ৰদেশ সমিতিৰ সহকাৰী কোষাধ্যক্ষ আলোক ত্ৰিপাঠীৰ প্ৰত্যক্ষ নেতৃত্বতে এই সমগ্ৰ অসম বিৰোধী কাণ্ড আৰু সাংবাদিক নিগ্ৰহৰ ঘটনা সংঘটিত হৈছে। বিধায়ক বিজয় গুপ্তাৰ নিৰ্বাচনত জয়লাভৰ পিছতেই গুৱাহাটী মহানগৰীত একাংশ অনাঅসমীয়া লোকৰ দাদাগিৰি আৰু অসম বিদ্বেষ চৰম পৰ্যায়লৈ বৃদ্ধি পোৱাটো এতিয়া সচেতন মহলৰ বাবে এক গভীৰ উদ্বেগৰ বিষয় হৈ পৰিছে।
ঘটনাৰ বিৱৰণি অনুসৰি, চেৰাবভাটিৰ উক্ত অঞ্চলটোত দীৰ্ঘদিনৰে পৰা একাংশ অনাঅসমীয়া লোকে গাঞ্জা, ভাং আদিৰ এক ৰমৰমীয়া অবৈধ তথা বেআইনী ব্যৱসায় চলাই অহাৰ গুৰুতৰ অভিযোগ আছিল। স্থানীয় আৰক্ষীয়ে এই সমগ্ৰ অবৈধ কাৰবাৰৰ প্ৰতি চকু মুদা কুলিৰ ভাও ধৰি থকাৰ পৰিপ্ৰেক্ষিতত, জীতেন শালৈ নামৰ এজন সচেতন স্থানীয় লোকে ইয়াৰ বিৰুদ্ধে তীব্ৰ প্ৰতিবাদ সাব্যস্ত কৰি আহিছিল। দেওবাৰেও যেতিয়া জীতেন শালৈয়ে এই সামাজিক ব্যাধিৰ বিৰুদ্ধে প্ৰতিবাদ কৰি এজন সাংবাদিকৰ সন্মুখত বক্তব্য প্ৰদান কৰি আছিল, ঠিক সেই সময়তে আলোক ত্ৰিপাঠীৰ নেতৃত্বত অহা অনাঅসমীয়া লোকৰ এক বৃহৎ উদণ্ড দলে তেওঁলোকক ঘেৰি ধৰে।
উন্মত্ত দলটোৱে কেৱল প্ৰতিবাদকাৰী আৰু সাংবাদিকক আক্ৰমণ কৰিয়েই ক্ষান্ত নাথাকিল, বৰঞ্চ নিজৰ ভেটি পাহৰি অসমৰ মাটিতেই ‘অসমীয়া গ’ বেক’, ‘জাতি-মাটিৰ কথা ইয়াত নচলিব’, আৰু ‘এক বিহাৰী শপে ভাৰী’ আদি চৰম অসন্মানজনক আৰু অসম বিৰোধী শ্ল’গানেৰে পৰিৱেশ উত্তপ্ত কৰি তোলে। তাত উপস্থিত থকা দুই-এজন যুৱকে এনে অসম বিৰোধী ধ্বনি নিদিবলৈ অনুৰোধ কৰিছিল যদিও উদণ্ড অনাঅসমীয়াৰ দলটোৱে সকলোকে অংগুষ্ঠ প্ৰদৰ্শন কৰি আক্ৰমণাত্মক হৈ পৰে।এই জঘন্য ঘটনাৰ বাতৰি সংগ্ৰহ কৰিবলৈ যোৱা এটা ব্যক্তিগত নিউজ পৰ্টেলৰ দুজন সাংবাদিকো এই উন্মত্ত দলটোৰ ভয়াৱহ আক্ৰমণৰ বলি হয়। কেৱল সেয়ে নহয়, প্ৰতিবাদকাৰী জীতেন শালৈকো মাটিত বগৰাই লৈ বৃহৎ সংখ্যক লোকে নিৰ্দয়ভাৱে মাৰধৰ কৰে আৰু এখন বাহনৰো বিস্তৰ ক্ষতিসাধন কৰে। পৰৱৰ্তী সময়ত ঘটনাস্থলীত ভৰলুমুখ আৰক্ষী উপস্থিত হৈ ৰাইজৰ সমূহীয়া প্ৰহাৰৰ পৰা জীতেন শালৈক কোনোমতে উদ্ধাৰ কৰি থানালৈ লৈ যায় আৰু গুৰুতৰভাৱে আহত সাংবাদিক হৃদয় আহমেদক ততাতৈয়াকৈ স্থানীয় হাস্পতালত ভৰ্তি কৰোৱা হয়। অসমৰ মাটিত থিয় হৈ সংবাদ মাধ্যমৰ কণ্ঠৰোধ কৰিবলৈ চলোৱা এই আক্ৰমণ আৰু মুকলিকৈ অসমীয়া জাতিক প্ৰত্যাহ্বান জনোৱা এই ঘটনাই এতিয়া সমগ্ৰ ৰাজ্যজুৰি তীব্ৰ প্ৰতিক্ৰিয়াৰ সৃষ্টি কৰিছে।
