তেওঁ একেলগে এজন সাংসদ আৰু প্ৰাক্তন ক্ৰিকেটাৰ। দেশৰ হৈ বিশ্বজয় কৰাৰ গৌৰৱো তেওঁ অৰ্জন কৰিছে। কিন্তু বৰ্তমান তেওঁৰ হেনো পৰ্যাপ্ত নিৰাপত্তা নাই। এই গুৰুতৰ অভিযোগ উত্থাপন কৰিছে তৃণমূল কংগ্ৰেছৰ বৰ্ধমান-দুৰ্গাপুৰ সমষ্টিৰ সাংসদ কীৰ্তি আজাদে। তেওঁ প্ৰাণৰ ভয়ত ইমানেই ত্ৰস্তমান হৈ পৰিছে যে নিজৰ লগত এটা এয়াৰগান লৈ ঘূৰি ফুৰিবলগীয়া হৈছে। আনকি প্ৰকাশ্যে এটা দূৰদৰ্শনৰ সাক্ষাৎকাৰতো তেওঁৰ লগত সেই এয়াৰগানটো দেখিবলৈ পোৱা গৈছে।
অলপতে এটা সৰ্বভাৰতীয় সংবাদ প্ৰতিষ্ঠানক দিয়া সাক্ষাৎকাৰত কীৰ্তি আজাদৰ সমুখত এটা বন্দুক দেখা গৈছিল। তেওঁক যেতিয়া সোধা হ’ল যে তেওঁ এই বন্দুকটো কিয় লগত ৰাখিছে, তেতিয়া তৃণমূল সাংসদগৰাকীয়ে কয় যে বিজেপি চৰকাৰে তেওঁৰ নিৰাপত্তা প্ৰত্যাহাৰ কৰি লৈছে। সেইবাবেই তেওঁ এই বন্দুকটো লগত ৰাখিছে আৰু বন্দুক চলোৱাৰ অভ্যাসো কৰিছে। তেওঁ লগতে কয় যে কোনো বিজেপিৰ গুণ্ডা সমুখলৈ আহিলেই তেওঁ গুলী চলাই দিব। অৱশ্যে ইয়াৰ পিছতে তেওঁ দাবী কৰে যে তেওঁ নিজৰ জীৱনক লৈ চিন্তিত নহয় আৰু কাৰ কেতিয়া মৃত্যু হ’ব সেয়া ভাগ্যৰ লিখন।
কেন্দ্ৰ নে ৰাজ্য চৰকাৰে তেওঁৰ নিৰাপত্তা প্ৰত্যাহাৰ কৰিছে বুলি সোধাত কীৰ্তি আজাদে কয় যে যেতিয়াই তেওঁক বিজেপিৰ পৰা উলিয়াই দিয়া হৈছিল, তেতিয়াই তেওঁৰ নিৰাপত্তা হ্ৰাস কৰা হৈছিল। বিজেপিত থকা সময়ত তেওঁ ৱাই প্লাছ শ্ৰেণীৰ নিৰাপত্তা লাভ কৰিছিল। কিন্তু এতিয়া তেওঁৰ নিৰাপত্তাৰক্ষী আঁতৰাই দিয়া হৈছে আৰু আনকি তেওঁৰ ঘৰৰ গৃহৰক্ষীসকলকো আঁতৰাই দিয়া হৈছে। বৰ্ধমান-দুৰ্গাপুৰৰ সাংসদগৰাকীৰ অভিযোগ যে বংগত তৃণমূলৰ পৰাজয়ৰ পিছৰে পৰা দলটোৰ সাংসদসকলৰ ওপৰত আক্ৰমণ চলোৱা হৈছে আৰু ভয় দেখুওৱা হৈছে।
উল্লেখ্য যে ৰাজ্যখনত বিজেপি ক্ষমতালৈ অহাৰ পিছত বহু তৃণমূল নেতাৰ নিৰাপত্তা কৰ্তন কৰা হৈছে। অভিষেক বেনাৰ্জী আৰু কল্যাণ বেনাৰ্জীৰ দৰে সাংসদসকল আক্ৰমণৰ বলি হৈছে। কেইবাজনো তৃণমূল নেতাই কণীৰে কৰা আক্ৰমণ অৰ্থাৎ ডিম থেৰাপীৰ দৰে পৰিস্থিতিৰো সন্মুখীন হ’বলগীয়া হৈছে। অৱশ্যে কীৰ্তি আজাদৰ ক্ষেত্ৰত এই আশংকা কিছু কম কাৰণ তেওঁ বংগৰ বাসিন্দা নহয়। তথাপিও নিৰাপত্তাৰ অভাৱক লৈ তেওঁ যথেষ্ট উদ্বিগ্ন হৈ পৰিছে।
