বিশ্বৰ বিভিন্ন দেশত মেটাৰ একাধিক সেৱাত হঠাৎ সমস্যাৰ সৃষ্টি হৈছে। ফেচবুক, ইনষ্টাগ্ৰাম আৰু হোৱাটছএপ ব্যৱহাৰ কৰিবলৈ গৈ হাজাৰ হাজাৰ ব্যৱহাৰকাৰীয়ে অসুবিধাৰ সন্মুখীন হোৱা বুলি অভিযোগ কৰিছে।
বিশেষকৈ ফেচবুক আৰু ইনষ্টাগ্ৰামত লগ-ইন কৰাৰ সময়ত বহু ব্যৱহাৰকাৰীয়ে সমস্যাৰ সন্মুখীন হৈছে। কিছুমান ফেচবুক ব্যৱহাৰকাৰীৰ স্ক্ৰীনত কাৰিকৰী সমস্যাৰ বাবে সেৱা সাময়িকভাৱে ব্যাহত হোৱা বুলি এটা বাৰ্তা দেখা গৈছে। ইনষ্টাগ্ৰাম ব্যৱহাৰকাৰীয়েও একেধৰণৰ সমস্যাৰ কথা জনাইছে।
হোৱাটছএপৰ সেৱাও কিছুমান অঞ্চলত ব্যাহত হোৱা বুলি অভিযোগ উঠিছে। বহু ব্যৱহাৰকাৰীয়ে বাৰ্তা প্ৰেৰণ আৰু গ্ৰহণ কৰাত সমস্যাৰ সন্মুখীন হোৱা বুলি জনাইছে।
অনলাইন সেৱাৰ সমস্যাৰ তথ্য সংগ্ৰহ কৰা ডাউনডিটেক্টৰ ৱেবছাইটত সন্ধিয়া ৭ বাজি ২৬ মিনিটলৈকে ১,১২৬ জন ব্যৱহাৰকাৰীয়ে মেটাৰ সেৱাত সমস্যা হোৱা বুলি অভিযোগ দাখিল কৰে। অৱশ্যে সমস্যাৰ প্ৰকৃত কাৰণ সম্পৰ্কে মেটাৰ ফালৰ পৰা এতিয়ালৈকে কোনো স্পষ্ট তথ্য প্ৰকাশ কৰা হোৱা নাই।
