অসম চৰকাৰে ৰাজ্যৰ আবকাৰী বিভাগত কেতবোৰ গুৰুত্বপূৰ্ণ সালসলনি কৰিছে। অসমৰ ৰাজ্যপালৰ অনুমোদন সাপেক্ষে আবকাৰী বিভাগে অসম আবকাৰী সংশোধনী নিয়মাৱলী ২০২৬ ঘোষণা কৰিছে। এই নতুন নিয়মৰ জৰিয়তে সুৰাৰ বিক্ৰী, সুৰা বিপণিৰ স্থান আৰু অনুজ্ঞাপত্ৰ বা বিক্ৰীৰ অধিকাৰ পত্ৰ স্থানান্তৰ কৰাৰ ক্ষেত্ৰত কঠোৰ নিৰ্দেশনা জাৰি কৰা হৈছে। চৰকাৰী জাননী প্ৰকাশ পোৱাৰ দিনাৰ পৰাই সমগ্ৰ ৰাজ্যত এই নতুন নিয়ম কাৰ্যকৰী কৰা হৈছে।
নতুন নিয়ম অনুসৰি এতিয়াৰে পৰা দেশীয় আৰু বিদেশী সুৰাৰ লগতে বিয়েৰৰ পাইকাৰী আৰু খুচুৰা বিক্ৰেতাসকলে চৰকাৰক এটা ন্যূনতম নিশ্চিত ৰাজহ আদায় দিব লাগিব। এই ৰাজহ গোটেই বছৰটোক চাৰিটা ভাগত ভগাই ক্ৰমে ২২, ২৫, ২৬ আৰু ২৭ শতাংশ হিচাপত সংগ্ৰহ কৰা হ’ব। নিৰ্ধাৰিত সময়ত ৰাজহ দিব নোৱাৰিলে দহ শতাংশ জৰিমনা আৰু পলম হ’লে প্ৰতি মাহে ডেৰ শতাংশ হাৰত অতিৰিক্ত সুদ ভৰিব লাগিব। আনহাতে দুখন সুৰাৰ দোকানৰ মাজত থাকিবলগীয়া দূৰত্বৰ নিয়মো কঠোৰ কৰা হৈছে। নতুন দোকান খোলা বা পুৰণি দোকান স্থানান্তৰ কৰাৰ ক্ষেত্ৰত কামৰূপ মহানগৰ জিলাত দুখন দোকানৰ মাজৰ দূৰত্ব নূন্যতম পাঁচশ মিটাৰ হ’ব লাগিব। সেইদৰে অন্যান্য পৌৰ নিগম, পৌৰসভা আৰু নগৰ সমিতি অঞ্চলত এই দূৰত্ব এক কিলোমিটাৰ আৰু গ্ৰাম্য অঞ্চলত দুই কিলোমিটাৰ হোৱাটো বাধ্যতামূলক কৰা হৈছে।
সুৰাৰ বটলৰ জোখৰ ক্ষেত্ৰতো নতুন নিয়ম বান্ধি দিয়া হৈছে। খুচুৰা দোকানসমূহৰ বাবে কেৱল ছীল কৰা আৰু সাঁফৰ থকা ন্যূনতম এশ আশী মিলিমিটাৰ বা তাতকৈ ডাঙৰ বটলতহে সুৰা বিক্ৰী কৰাটো বাধ্যতামূলক কৰা হৈছে। পানশালা বা গ্ৰাহকক বহি খাবলৈ দিয়া দোকানসমূহৰ ক্ষেত্ৰত নূন্যতম সাতশ পঞ্চাশ মিলিমিটাৰৰ বটল ব্যৱহাৰ কৰিব লাগিব। গ্ৰাহকক সুৰা পৰিৱেশন কৰাৰ বাবে ব্যৱহাৰ কৰা এক নিৰ্দিষ্ট জোখৰ পৰিমাণ ষাঠি মিলিমিটাৰৰ সমান হ‘ব। ইয়াৰ উপৰিও সুৰাৰ দোকান স্থানান্তৰ কৰাৰ ক্ষেত্ৰত জিলা এখনৰ ভিতৰতে পৌৰ নিগমৰ বাহিৰত দোকান স্থানান্তৰ কৰিবলৈ আবকাৰী আয়ুক্তৰ পূৰ্ব অনুমোদন লৈ জিলা আয়ুক্তই অনুমতি দিব পাৰিব। পৌৰ নিগমৰ ভিতৰৰ এলেকাত স্থানান্তৰৰ বাবে ৰাজ্য চৰকাৰৰ অনুমতি লাগিব। এতিয়াৰে পৰা গাঁৱৰ পৰা চহৰলৈ সুৰাৰ দোকান নিব পৰা নাযাব যদিও চহৰৰ পৰা গাঁৱলৈ নিব পাৰিব। ঠিক সেইদৰে কামৰূপ মহানগৰ জিলাৰ পৰা অন্য জিলালৈ দোকান স্থানান্তৰ কৰিব পৰা যাব যদিও আন জিলাৰ পৰা কামৰূপ মহানগৰলৈ আনিব নোৱাৰিব। অনুজ্ঞাপত্ৰ পোৱাৰ তিনি বছৰৰ ভিতৰত কোনো আন্তঃজিলা স্থানান্তৰ কৰিব নোৱাৰিব।
অসমৰ খিলঞ্জীয়া জনগোষ্ঠীসমূহে পৰম্পৰাগতভাৱে প্ৰস্তুত কৰা থলুৱা সুৰাৰ ব্যৱসায়িক সুৰক্ষাৰ বাবেও নিয়মাৱলী সংশোধন কৰা হৈছে। থলুৱা সুৰাৰ ক্ষুদ্ৰ উৎপাদন কেন্দ্ৰৰ সৰ্বোচ্চ উৎপাদন ক্ষমতা দৈনিক এহেজাৰ লিটাৰ নিৰ্ধাৰণ কৰা হৈছে। ইয়াৰ লগতে থলুৱা সুৰাৰ বিভিন্ন অনুজ্ঞাপত্ৰৰ মাচুল পূৰ্বৰ পঁচিশ হাজাৰ টকাৰ পৰা পোন্ধৰ হাজাৰ টকালৈ আৰু পাঁচ হাজাৰ টকাৰ পৰা পাঁচশ টকালৈ হ্ৰাস কৰা হৈছে। নিয়মাৱলীত অসম নিৰ্মিত সুৰা নামৰ এটা নতুন শ্ৰেণী অন্তৰ্ভুক্ত কৰা হৈছে, যাৰ শক্তি সোতৰ দশমিক এক দুই শতাংশ হ’ব। ইয়াৰ উৎপাদনৰ অনুজ্ঞাপত্ৰৰ আবেদন মাচুল এক লাখ টকা আৰু বিক্ৰী কেন্দ্ৰৰ অনুজ্ঞাপত্ৰৰ বাবে পঞ্চাশ হাজাৰ টকা ধাৰ্য কৰা হৈছে।
