১৯৩০ চনত আৰম্ভ হোৱা ফিফা বিশ্বকাপৰ ইতিহাসত বৰ্তমানলৈকে ২,৭০০ তকৈও অধিক গ‘ল পঞ্জীয়ন হৈছে। সমাগত ২০২৬ চনৰ বিশ্বকাপক কেন্দ্ৰ কৰি ফুটবলৰ সৰ্ববৃহৎ মঞ্চত অনুষ্ঠিত হোৱা আটাইতকৈ বিস্ফোৰক আৰু সৰ্বাধিক গ‘ল হোৱা খেলসমূহৰ ইতিহাস পুনৰ চৰ্চালৈ আহিছে। এই চৰ্চাৰ কেন্দ্ৰবিন্দুত আছে ৯০ মিনিটৰ খেলত সৰ্বাধিক ১২ টাকৈ গ‘ল হোৱাৰ এক বিৰল আৰু অপৰাজিত অভিলেখ। ফুটবলৰ ইতিহাসত এনে মাত্ৰ কেইখনমান খেলহে আছে, যিবোৰত গ‘লৰ বৰষুণ হোৱাৰ বাবে ক্ৰীড়াপ্ৰেমীৰ মাজত সেইসমূহ আজিও চিৰস্মৰণীয় হৈ আছে।
বিশ্বকাপৰ ইতিহাসত এখন খেলত আটাইতকৈ বেছি গ‘ল হোৱাৰ অভিলেখটো ১৯৫৪ চনৰ বিশ্বকাপৰ কোৱাৰ্টাৰ ফাইনেলত সৃষ্টি হৈছিল। ১৯৫৪ চনৰ ২৬ জুনত লুজানত অনুষ্ঠিত এই খেলখনত অষ্ট্ৰিয়া আৰু চুইজাৰলেণ্ডে সন্মিলিতভাৱে ১২ টা গ‘ল কৰি ক্ৰীড়াজগতত এক নতুন ইতিহাস ৰচনা কৰিছিল। খেলৰ প্ৰথম ২৩ মিনিটৰ ভিতৰত চুইজাৰলেণ্ডে ৩-০ গ‘লৰ ব্যৱধানত অগ্ৰগতি লাভ কৰিছিল যদিও, পৰৱৰ্তী ২৫ মিনিটত অষ্ট্ৰিয়াই একেৰাহে পাঁচটা গ‘ল দি ইয়াৰ তীব্ৰ প্ৰত্যুত্তৰ দিয়ে। প্ৰথম অৰ্ধৰ সমাপ্তিতে খেলৰ স্ক‘ৰ ৫-৪ হৈছিল আৰু শেষত অষ্ট্ৰিয়াই চুইজাৰলেণ্ডক ৭-৫ গ‘লৰ ব্যৱধানত পৰাজিত কৰিবলৈ সক্ষম হয়। আশ্চৰ্যজনকভাৱে, এই ঐতিহাসিক অভিলেখটো বিগত সাত দশকৰো অধিক সময় ধৰি অক্ষুণ্ণ হৈ আছে।
সৰ্বাধিক গ‘ল হোৱা খেলৰ প্ৰেক্ষাপটত ১৯৮২ চনত স্পেইনত অনুষ্ঠিত হাংগেৰী আৰু এল চালভাডৰৰ মাজৰ খেলখনো বিশেষভাৱে উল্লেখনীয়। এই খেলখনত মুঠ ১১ টা গ‘ল হৈছিল, য‘ত হাংগেৰীয়ে এল চালভাডৰক ১০-১ ব্যৱধানত বিধ্বস্ত কৰি ৯ টা গ‘লৰ এক বৃহৎ ব্যৱধানত জয়লাভ কৰিছিল। ফিফা বিশ্বকাপৰ ইতিহাসত হাংগেৰীয়েই হৈছে একমাত্ৰ দল, যিয়ে এককভাৱে এখন খেলত ১০ টা গ‘ল কৰাৰ অভিলেখ গঢ়িছে। এই খেলখনতে বিকল্প খেলুৱৈ হিচাপে খেলপথাৰত নামি লাছলো কিছে (Laszlo Kiss) হেট্ৰিক অৰ্জন কৰিছিল, যিটো বিশ্বকাপৰ ইতিহাসত কোনো বিকল্প খেলুৱৈৰ একমাত্ৰ হেট্ৰিক হিচাপে পৰিগণিত। আনহাতে, ১৯৩৮ চনত ব্ৰাজিল আৰু পোলেণ্ডৰ মাজত অনুষ্ঠিত আন এখন আক্ৰমণাত্মক খেলতো মুঠ ১১ টা গ‘ল হৈছিল। এই খেলখনত ব্ৰাজিলে পোলেণ্ডক ৬-৫ ব্যৱধানত পৰাস্ত কৰিছিল আৰু পোলেণ্ডৰ এৰ্নেষ্ট উইলিমাউস্কিয়ে (Ernest Wilimowski) অকলেই ৪ টা গ‘ল কৰিছিল, যিখন খেল এতিয়ালৈকে সৰ্বাধিক গ‘ল দিও পৰাজিত হোৱাৰ ৰেকৰ্ড হিচাপে ইতিহাসত লিপিবদ্ধ হৈ আছে।
১৯৫৪ চনৰ বিশ্বকাপতে হাংগেৰী আৰু পশ্চিম জাৰ্মানীৰ মাজৰ গ্ৰুপ পৰ্যায়ৰ খেলখনতো ১১ টা গ‘ল হৈছিল। সেই খেলখনত হাংগেৰীয়ে পশ্চিম জাৰ্মানীক ৮-৩ ব্যৱধানত পৰাস্ত কৰিছিল, যদিও ইয়াৰ কেইসপ্তাহমানৰ পিছত অনুষ্ঠিত ফাইনেলত একেখন পশ্চিম জাৰ্মানীয়েই হাংগেৰীক আচৰিত ধৰণে পৰাজিত কৰি বিশ্বকাপৰ খিতাপ দখল কৰিছিল। ইয়াৰ উপৰি, ১৯৫৮ চনত ফ্ৰান্স আৰু পেৰাগুৱেৰ মাজৰ গ্ৰুপ পৰ্যায়ৰ খেলখনত মুঠ ১০ টা গ‘ল হৈছিল, য‘ত ফ্ৰান্সে ৪ টা গ‘লৰ ব্যৱধান ৰাখি ৭-৩ গ‘লত জয়লাভ কৰি এক আক্ৰমণাত্মক প্ৰদৰ্শন দাঙি ধৰিছিল।
পৰিসংখ্যা অনুসৰি, ১৯৫৪ চনৰ বিশ্বকাপ প্ৰতিযোগিতাখনক ইতিহাসৰ আটাইতকৈ বেছি গ‘ল হোৱা টুৰ্ণামেণ্ট হিচাপে গণ্য কৰা হয়, য‘ত মাত্ৰ ২৬ খন খেলত ১৪০ টা গ‘ল হৈছিল আৰু প্ৰতিখন খেলত গ‘লৰ গড় আছিল ৫.৩৮। ১৯৩৮ চনৰ পৰা ১৯৮২ চনৰ ভিতৰত বিশ্বকাপৰ মঞ্চই এনে ৫ খন খেল প্ৰত্যক্ষ কৰিছিল, য’ত অন্ততঃ ১০ টা বা তাতকৈ অধিক গ‘ল হৈছিল। কিন্তু পৰিসংখ্যাগতভাৱে চালে আধুনিক বিশ্বকাপত ১০ বা তাতকৈ অধিক গ‘ল হোৱা খেল অতি বিৰল। ১৯৮২ চনৰ পিছত কোনো বিশ্বকাপ খেলত ১০ টা গ‘ল হোৱা নাই। ২০১৮ চনৰ বিশ্বকাপত প্ৰতিখন খেলত গড়ে ২.৬৪ আৰু ২০২২ চনৰ বিশ্বকাপত ২.৬৯ গ‘ল হৈছিল। বৰ্তমানৰ আধুনিক ফুটবল অধিক দ্ৰুত আৰু কৌশলগত হোৱাৰ লগতে প্ৰতিৰক্ষাত্মক ব্যৱস্থা শক্তিশালী হোৱাৰ বাবে বিগত চাৰিটা দশকৰো অধিক সময় ধৰি বিশ্ব ফুটবলে এনে ষষ্ঠখন খেলৰ বাবে অপেক্ষা কৰিবলগীয়া হৈছে। সেয়েহে, আগন্তুক বিশ্বকাপত ১২ গ‘লৰ এই বিৰল অভিলেখ ভংগ হোৱাৰ সম্ভাৱনা অত্যন্ত ক্ষীণ বুলিয়েই ক্ৰীড়াবিশেষজ্ঞসকলে মত প্ৰকাশ কৰে।
