দুবাৰকৈ পিছ পৰি দুবাৰেই দুৰ্দান্ত প্ৰত্যাৱৰ্তন; নেদাৰলেণ্ডৰ বিৰুদ্ধে জাপানে দেখুৱালে ৰোমাঞ্চকৰ খেল

প্ৰথমখন খেলত দক্ষিণ কোৰিয়াই জয়লাভ কৰিছিল। কাটাৰে ড্ৰ’ কৰিলে। আন এখন এছিয়াৰ দেশ জাপানে প্ৰথমখন মেচত পিছ পৰিও দুৰ্দান্ত প্ৰত্যাৱৰ্তনেৰে চমক দেখুৱালে। জাপানে নেদাৰলেণ্ডৰ বিৰুদ্ধে ২-২ গ’লত খেলখন সমাপ্ত কৰে।

দুবাৰকৈ পিছ পৰিও উভতি আহি জাপানে দেখুৱাই দিলে যে এছিয়াৰ দেশসমূহ ইউৰোপীয় দলতকৈ কোনোগুণে কম নহয়। ঠিক যেতিয়া সকলোৱে ভাবিছিল যে জাপান আৰু ঘূৰি আহিব নোৱাৰে, তেতিয়াই তেওঁলোকে উত্তৰ দিলে। আৰু জাপানৰ প্ৰত্যাঘাতত ধৰাশায়ী হৈছিল ডাচসকল। ৮৯ মিনিটত কামাডাৰ গ’লে ডাচৰ সকলো আশা চূৰ্ণ কৰি পেলালে। জাপানে নেদাৰলেণ্ডৰ পৰা কাঢ়ি ল’লে পইণ্ট।

প্ৰথমাৰ্ধ গ’লবিহীন আছিল যদিও বিৰতিৰ পিছত মেচখনে উত্তাপ লাভ কৰে। দ্বিতীয়াৰ্ধত খেলখনৰ চাৰিওটা গ’ল হয়। ৫১ মিনিটত ডাচ অধিনায়ক ভাৰ্জিল ভান ডাইকৰ গ’লেৰে নেদাৰলেণ্ডে অগ্ৰগতি লাভ কৰে। অৱশ্যে জাপানৰ কেইটো নাকামুৰাই মাত্ৰ ছয় মিনিটতে সেই গ’লটো শোধ কৰি সমতা স্থাপন কৰে। ৬৪ মিনিটত ক্ৰেচেন্সিও ছমাৰভিলেৰ গ’লেৰে ডাচ দলটোৱে পুনৰ অগ্ৰগতি লাভ কৰে। কিন্তু শেষ পৰ্যন্ত জাপানে হাৰ নামানিল। ৮৯ মিনিটত দৈচি কামাডাৰ গ’লে এছিয়ান দলটোক পুনৰ সমতালৈ আনে। ফলত জাপানে ৰোমাঞ্চকৰ খেলৰ অন্তত এটা পইণ্ট লৈ খেলপথাৰ এৰে।

প্ৰথমাৰ্ধত দুয়োটা দলে আক্ৰমণাত্মক ফুটবল খেলিছিল যদিও কোনো গ’ল হোৱা নাছিল। ৩৪ মিনিটত জাপানৰ গ’লৰক্ষক জিঅ’ন চুজুকিয়ে কৰ্ণাৰত মালেনৰ হেডাৰটো অতি দক্ষতাৰে ৰক্ষা কৰে। তেওঁৰ কেইবাটাও উৎকৃষ্ট ছেভে বিৰতিৰ সময়ত স্ক’ৰলাইন ০-০ত ৰাখিছিল।

দ্বিতীয়াৰ্ধত মেচখনৰ ছবি সলনি হ’ল। ৫১ মিনিটত ভেন ডাইকে ৰাইট উইংৰ ক্ৰছৰ পৰা এটা ডাঙৰ হেডাৰেৰে নেদাৰলেণ্ডক অগ্ৰগতি প্ৰদান কৰে। তেওঁ যেতিয়া হেড কৰে কোনেও তেওঁক লক্ষ্য কৰা নাছিল। ডাচ অধিনায়কগৰাকীয়ে কোনো বাধা নোহোৱাকৈ গ’লটো হেড কৰিছিল।

অৱশ্যে পিছ পৰি থকাৰ মাত্ৰ ছয় মিনিটৰ পিছতে জাপানে প্ৰত্যুত্তৰ দিয়ে। ৫৭ মিনিটত বাওঁফালৰ পৰা গঢ়ি উঠা দৰ্শনীয় আক্ৰমণৰ পৰা গ’ল দি কেইট’ নাকামুৰাই খেলখনত সমতা স্থাপন কৰে।

৬৪ মিনিটত নেদাৰলেণ্ডে পুনৰ গ’ল দিয়ে। কমলা ৰঙৰ জাৰ্চি পৰিহিত নেদাৰলেণ্ডৰ ক্ৰেচেন্সিঅ’ ছমাৰভিলৰ গ’লৰ জৰিয়তে দলটোৱে ২-১ গ’লত অগ্ৰগতি লাভ কৰে। কিন্তু জাপানে যুঁজ এৰি দিয়া নাছিল। ৮৯ মিনিটত কামাডাই গ’ল দি ২-২ গ’লত সমতা আনে। ইয়াৰ পিছত আৰু কোনো পক্ষই পুনৰ গ’ল দিব নোৱাৰিলে।

জাপানে সৰু সৰু পাছেৰে আক্ৰমণৰ জাল ৰচিছিল। যদিও তেওঁলোকে নেদাৰলেণ্ডৰ আক্ৰমণ চম্ভালিবলৈ ডিফেন্সত অতিৰিক্ত ফুটবলাৰক নমাইছিল, জাপানে বল ঘূৰাই পোৱাৰ লগে লগে বিজুলীৰ গতিৰে প্ৰত্যাক্ৰমণ কৰিছিল। সেই গতিৰ লগত আছিল নিখুঁত পাছ আৰু আক্ৰমণৰ চোক।

শেষত সেই অবিৰত হেঁচাই ফল দিলে। দুবাৰ পিছ পৰি থকাৰ পিছতো জাপানে হাৰ নামানিলে, বৰঞ্চ ইউৰোপৰ অন্যতম শক্তিশালী দলৰ বিৰুদ্ধে যুঁজ দি এটা পইণ্ট কাঢ়ি লৈ ​​এছিয়ান ফুটবলৰ শক্তি প্ৰমাণ কৰিলে।