আহমেদাবাদ চাইবাৰ ক্ৰাইম ব্ৰাঞ্চৰ এক অভিযানত পোহৰলৈ আহিছে এক বৃহৎ চাইবাৰ জালিয়াতিৰ ঘটনা। নীট পৰীক্ষাৰ প্ৰশ্নকাকত ফাদিল কৰাৰ নামত ছাত্ৰ-ছাত্ৰী আৰু অভিভাৱকক ঠগি অহা এটি আন্তঃৰাজ্যিক চক্ৰৰ দুজন সদস্যক আৰক্ষীয়ে গ্ৰেপ্তাৰ কৰিবলৈ সক্ষম হৈছে। ৰাজস্থানৰ পৰা আটক কৰা অভিযুক্ত দুজনৰ নাম সুমেৰ সিং ভৰত লাল মীনা আৰু আকাশ পাপ্পুলাল মীনা বুলি জানিব পৰা গৈছে।
আৰক্ষীয়ে জনোৱা অনুসৰি, এই চক্ৰটোৱে প্ৰকৃততে কোনো পৰীক্ষাৰ প্ৰশ্নকাকত ফাদিল কৰা নাছিল বৰঞ্চ পৰীক্ষাৰ নামত দুশ্চিন্তাত থকা ছাত্ৰ-ছাত্ৰীসকলক লক্ষ্য কৰি লৈছিল। ইণ্টাৰনেটত টেলিগ্ৰাম আৰু ইনষ্টাগ্ৰামৰ দৰে ছ‘চিয়েল মিডিয়া মাধ্যম ব্যৱহাৰ কৰি তেওঁলোকে প্ৰশ্নকাকত পোৱাৰ মিছা প্ৰতিশ্ৰুতি দিছিল। অতিৰিক্ত ধন বা প্ৰিমিয়াম এক্সেছৰ নামত তেওঁলোকে বহু ছাত্ৰ-ছাত্ৰীৰ পৰা আগতীয়াকৈ টকা সংগ্ৰহ কৰিছিল।
অভিযুক্তসকলে টেলিগ্ৰামত কেইবাটাও চেনেল খুলি ছাত্ৰ-ছাত্ৰীৰ বিশ্বাস অৰ্জন কৰিবলৈ নিজকে সফলতা লাভ কৰা ছাত্ৰ বুলি প্ৰচাৰ কৰিছিল। এইদৰে প্ৰচাৰ চলাই তেওঁলোকে প্ৰৱঞ্চনাৰ জাল বিস্তাৰ কৰিছিল। ইয়াৰ উপৰিও তেওঁলোকে অনলাইন গেমিং প্লেটফৰ্ম ব্যৱহাৰ কৰি ধনৰ লেনদেনৰ তথ্য গোপনে ৰখাৰ চেষ্টা কৰিছিল যাতে আৰক্ষীয়ে ট্ৰেক কৰিব নোৱাৰে। এই পৰ্যন্ত তেওঁলোকৰ পৰা প্ৰায় দেৰ কোটি টকাৰ জালিয়াতিৰ তথ্য পোৱা গৈছে।
প্ৰাথমিক তদন্তত পোহৰলৈ আহিছে যে এই চক্ৰটোৱে প্ৰায় এহেজাৰগৰাকী ব্যক্তিক লক্ষ্য কৰি লৈছিল আৰু বৰ্তমানলৈকে সত্তৰ গৰাকী ভুক্তভোগীৰ অভিযোগ পোৱা গৈছে। আৰক্ষীয়ে পুনৰবাৰ স্পষ্ট কৰি দিছে যে কোনো নীটৰ প্ৰশ্নকাকত ফাদিল হোৱা নাছিল, কেৱল ছাত্ৰ-ছাত্ৰীৰ দুৰ্বলতাৰ সুযোগ লৈ এই চাইবাৰ প্ৰৱঞ্চনা চলিছিল। বৰ্তমান আৰক্ষীয়ে এই চক্ৰৰ বাকী সদস্যসকলক বিচাৰি তদন্ত অব্যাহত ৰাখিছে।
