দেশজুৰি অনুষ্ঠিত হ‘বলগীয়া চিকিৎসা বিজ্ঞানৰ স্নাতক পৰ্যায়ৰ প্ৰৱেশ পৰীক্ষা নীটৰ পুনৰ পৰীক্ষাৰ পূৰ্বে মেছেজিং এপ টেলিগ্ৰামৰ ওপৰত কেন্দ্ৰীয় চৰকাৰে আৰোপ কৰা নিষেধাজ্ঞা শুকুৰবাৰে দিল্লী উচ্চ ন্যায়ালয়ে বাহাল ৰাখিছে। এই পৰিস্থিতিক জৰুৰীকালীন অৱস্থা হিচাপে অভিহিত কৰি ন্যায়ালয়ে ৰায়দান কৰে যে কেন্দ্ৰীয় চৰকাৰে গ্ৰহণ কৰা এই পদক্ষেপসমূহ আটাইতকৈ কম প্ৰতিবন্ধকতামূলক আৰু ই পৰীক্ষাৰ স্বচ্ছতা ৰক্ষাৰ বাবে অপৰিহাৰ্য। উল্লেখযোগ্য যে দেশৰ আটাইতকৈ প্ৰতিযোগিতামূলক পৰীক্ষাসমূহৰ ভিতৰত অন্যতম নীট পৰীক্ষাত প্ৰতি বছৰে বিশ লাখৰো অধিক চিকিৎসাবিদ্যাৰ শিক্ষাৰ্থীয়ে অৱতীৰ্ণ হয়।
দিল্লী উচ্চ ন্যায়ালয়ে দুয়োপক্ষৰ যুক্তি শুনাৰ পাছত প্ৰকাশ কৰে যে জৰুৰীকালীন প্ৰকৃতিৰ প্ৰতি লক্ষ্য ৰাখি চৰকাৰে প্ৰদান কৰা কাৰণসমূহ পৰ্যাপ্ত আৰু তথ্য প্ৰযুক্তি আইন, ২০২০-ৰ ৬৯এ ধাৰাৰ প্ৰক্ৰিয়া সঠিকভাৱে পালন কৰা হৈছে। এই ধাৰাই কেন্দ্ৰীয় চৰকাৰক নিৰ্দিষ্ট পৰিস্থিতিত অনলাইন তথ্যৰ প্ৰৱেশাধিকাৰ অৱৰোধ কৰাৰ ক্ষমতা প্ৰদান কৰে।
যোৱা মে‘ মাহত অনুষ্ঠিত নীট পৰীক্ষাৰ প্ৰশ্নকাকত ফাদিল হোৱা আৰু টেলিগ্ৰাম চেনেলৰ জৰিয়তে বিয়পি পৰাৰ অভিযোগ উত্থাপন হোৱাৰ পাছতেই পৰীক্ষাটো বাতিল কৰা হৈছিল। ইয়াৰ পৰিপ্ৰেক্ষিতত দেওবাৰে অনুষ্ঠিত হ‘বলগীয়া পুনৰ পৰীক্ষাৰ পূৰ্বে মঙলবাৰে ভাৰত চৰকাৰে টেলিগ্ৰামৰ ব্যৱহাৰত নিষেধাজ্ঞা আৰোপ কৰিছিল। কেন্দ্ৰীয় চৰকাৰৰ হৈ আদালতত হাজিৰ হোৱা ছলিচিটৰ জেনেৰেল তুষাৰ মেহতাই যুক্তি দৰ্শাইছিল যে অহা ২২ জুনলৈকে টেলিগ্ৰামৰ প্ৰৱেশাধিকাৰ স্থগিত ৰখাৰ সিদ্ধান্ত কোনো স্বেচ্ছাচাৰী বা অসামঞ্জস্যপূৰ্ণ পদক্ষেপ নহয়, বৰঞ্চ লাখ লাখ শিক্ষাৰ্থীৰ ভৱিষ্যতৰ সৈতে জড়িত এক ৰাষ্ট্ৰীয় পৰীক্ষাৰ পৱিত্ৰতা ৰক্ষাৰ বাবে লোৱা এক সাৱধানতামূলক ব্যৱস্থা। চৰকাৰৰ মতে, প্ৰশ্নকাকত ফাদিল আৰু বিতৰণৰ দৰে কাৰ্যত জড়িত এক বৃহৎ চক্ৰই এই এপটো মুখ্য সঁজুলি হিচাপে ব্যৱহাৰ কৰিছিল।
আনহাতে, টেলিগ্ৰামৰ হৈ আদালতত যুক্তি প্ৰদৰ্শন কৰা জ্যেষ্ঠ অধিবক্তা ধ্ৰুৱ মেহতাই চৰকাৰৰ এই সিদ্ধান্তৰ বিৰোধিতা কৰি কয় যে কেইজনমান ব্যৱহাৰকাৰীৰ অপৰাধমূলক কাৰ্যৰ বাবে নিযুত নিযুত সাধাৰণ ব্যৱহাৰকাৰীৰ যোগাযোগ মাধ্যম এটা সম্পূৰ্ণৰূপে বন্ধ কৰি দিয়াটো অনুচিত। টেলিগ্ৰামে দাবী কৰে যে তেওঁলোকে আইন প্ৰয়োগকাৰী সংস্থাসমূহক সহযোগিতা আগবঢ়াই আহিছে আৰু আইন ভংগ কৰা চেনেলসমূহৰ বিৰুদ্ধে ব্যৱস্থা গ্ৰহণ কৰিছে। পিছে কেন্দ্ৰীয় চৰকাৰে ন্যায়ালয়ক অৱগত কৰে যে কেবিনেট সচিবৰ নেতৃত্বাধীন পৰ্যালোচনা সমিতিয়ে এই সাময়িক নিষেধাজ্ঞা বাহাল ৰখাৰ পৰ্যাপ্ত ভিত্তি লাভ কৰিছে আৰু সকলো আইনী সুৰক্ষা ব্যৱস্থা মানি চলা হৈছে।
টেলিগ্ৰামৰ যুক্তি খণ্ডন কৰি উচ্চ ন্যায়ালয়ে কয় যে চৰকাৰৰ ব্যৱস্থাসমূহ আটাইতকৈ কম প্ৰতিবন্ধকতামূলক আৰু ইয়াক অসামঞ্জস্যপূৰ্ণ বুলি ক‘ব নোৱাৰি। দেওবাৰে নিৰ্বিঘ্নে আৰু নিকাভাৱে নীটৰ পুনৰ পৰীক্ষা অনুষ্ঠিত কৰাৰ স্বাৰ্থতে যে এই কঠোৰ সিদ্ধান্ত গ্ৰহণ কৰা হৈছে, সেয়া ন্যায়ালয়ৰ ৰায়দানত স্পষ্ট হৈ পৰিছে। পৰৱৰ্তী সময়ত নিৰ্ধাৰিত ২২ জুনৰ পাছত চৰকাৰে টেলিগ্ৰামৰ ওপৰত থকা এই সাময়িক নিষেধাজ্ঞা প্ৰত্যাহাৰ কৰিব নে নাই, সেয়া বৰ্তমান লক্ষণীয় হৈ পৰিছে।
