ভোটাৰ তালিকাৰ বিশেষ সংশোধনী প্ৰক্ৰিয়াৰ বিৰুদ্ধে নিৰ্বাচন আয়োগক কেন্দ্ৰ কৰি হোৱা প্ৰতিবাদত অংশগ্ৰহণ কৰাৰ বাবে সোমবাৰে বম্বে উচ্চ ন্যায়ালয়ত নিঃচৰ্ত ক্ষমা বিচাৰে বলীউডৰ অভিনেতা ইমৰাণ খানে। লগতে ভৱিষ্যতে এনে ধৰণৰ প্ৰতিবাদত অংশগ্ৰহণ নকৰাৰো প্ৰতিশ্ৰুতি প্ৰদান কৰে। যোৱা ১০ অক্টোবৰত মুম্বাইত হোৱা প্ৰতিবাদৰ সময়ত আটক হোৱা ৪২ বছৰীয়া অভিনেতাগৰাকীয়ে ‘লিভ ইণ্ডিয়া জাননী’ লাভ কৰিছিল। তেওঁ ন্যায়ালয়ক জনায় যে আয়োজকসকলৰ সৈতে তেওঁৰ কোনো সম্পৰ্ক নাই আৰু প্ৰতিবাদত অংশগ্ৰহণ কৰাৰ পৰিণতিৰ বিষয়ে তেওঁ অৱগত নাছিল।
উচ্চ ন্যায়ালয়ৰ বিচাৰপীঠে খানক কঠোৰ ভাষাৰে ভৰ্ৎসনা কৰি কয় যে তেওঁ এগৰাকী অভাৰছিজ চিটিজেন অৱ ইণ্ডিয়া কাৰ্ডধাৰী আমেৰিকান নাগৰিক। সেয়েহে ভাৰতীয় নাগৰিকৰ দৰে ৰাজনৈতিক প্ৰতিবাদত অংশগ্ৰহণ কৰাৰ তেওঁৰ কোনো অধিকাৰ নাই। বিচাৰপীঠে তেওঁক প্ৰশ্ন কৰে যে যদি কোনো ভাৰতীয় নাগৰিকে আমেৰিকাত এনে প্ৰতিবাদত অংশগ্ৰহণ কৰিলেহেঁতেন, তেন্তে তেওঁক পৰৱৰ্তী বিমানতে নিজ দেশলৈ ওভতাই পঠোৱা হ’লহেঁতেন। খানে সৰুৰে পৰা ভাৰতত ডাঙৰ-দীঘল হোৱাৰ পাছতো কিয় ভাৰতীয় নাগৰিকত্ব গ্ৰহণ কৰা নাই বুলিও বিচাৰপীঠে প্ৰশ্ন কৰে।
খানৰ হৈ আদালতত উপস্থিত থকা জ্যেষ্ঠ অধিবক্তা ভেংকটেশ ধোণ্ডে যুক্তি দৰ্শাই কয় যে খানে তেওঁৰ সমগ্ৰ জীৱন ভাৰতত কটাইছে আৰু জন্মসূত্ৰে আমেৰিকাৰ নাগৰিকত্ব লাভ কৰিছে। ২০০৬ চনত অচিআই মৰ্যাদা লাভ কৰাৰ পূৰ্বে তেওঁ পাৰ্চন অৱ ইণ্ডিয়ান অৰিজিন কাৰ্ডধাৰী আছিল বুলিও তেওঁ জনায়। অৱশ্যে ফৰেইনাৰ্ছ ৰিজনেল ৰেজিষ্ট্ৰেচন অফিচৰ হৈ উপস্থিত থকা অতিৰিক্ত চলিচিটৰ জেনেৰেল অনিল সিঙে এই যুক্তিক বিৰোধিতা কৰে আৰু খানৰ ছ’চিয়েল মিডিয়াৰ প’ষ্ট তথা সাক্ষাৎকাৰক প্ৰমাণ হিচাপে দাখিল কৰি তেওঁৰ সক্ৰিয় অংশগ্ৰহণৰ কথা আঙুলিয়াই দিয়ে।
আদালতে স্পষ্ট কৰি দিয়ে যে ক্ষমা প্ৰাৰ্থনাক এনে প্ৰতিবাদত অংশগ্ৰহণ কৰাৰ অনুমতি বুলি গণ্য কৰিব নোৱাৰি। “তেওঁলোক ইয়াত চৰকাৰৰ কৃপাত আছে। তেওঁলোকে ইয়াত থাকি সমালোচনা কৰিব নোৱাৰে,” বুলি বিচাৰপীঠে মন্তব্য কৰে। মুখ্য ন্যায়াধীশ এম চি ত্ৰিপাঠী আৰু ন্যায়াধীশ অদ্বৈত শেঠনাৰ বিচাৰপীঠে যোৱা সপ্তাহত স্থগিত ৰখা ‘লিভ ইণ্ডিয়া জাননী’ বৰ্তমানো বাহাল ৰাখি খানৰ নিঃৰ্ত ক্ষমা প্ৰাৰ্থনা গ্ৰহণ কৰে। অহা ৭ ডিচেম্বৰত গোচৰটোৰ পৰৱৰ্তী শুনানীৰ দিন ধাৰ্য কৰা হৈছে।
