গুৱাহাটীৰ পঞ্জাবাৰী অঞ্চলৰ পৰা এগৰাকী ১৩ বছৰীয়া স্কুলীয়া ছাত্ৰীক অপহৰণ কৰা ঘটনাক লৈ সমগ্ৰ অঞ্চলটোতে তীব্ৰ চাঞ্চল্যৰ সৃষ্টি হৈছে। জাকিৰ আলী নামৰ এজন যুৱকে এই অপহৰণৰ ঘটনা সংঘটিত কৰা বুলি অভিযোগ উত্থাপন হৈছে আৰু বৰ্তমান অভিযুক্ত যুৱকজন পলাতক অৱস্থাত আছে।
প্ৰাথমিক তথ্য অনুসৰি, অভিযুক্ত জাকিৰ আলীয়ে কিশোৰীগৰাকীক স্কুলৰ প্ৰধান শিক্ষকে মাতিছে কৈছিল। এই কথা সঁচা বুলি বিশ্বাস কৰি ছাত্ৰীগৰাকী তাৰ লগত গুচি গৈছিল আৰু তাৰ পিছৰে পৰাই তাই সন্ধানহীন হৈ পৰে।
ছাত্ৰীগৰাকী সন্ধানহীন হোৱাৰ পিছতে তাইৰ পৰিয়ালৰ লোকে ততাতৈয়াকৈ সাতগাঁও আৰক্ষী থানাত উপস্থিত হৈ এখন এজাহাৰ দাখিল কৰে। পৰিয়ালৰ অভিযোগৰ ভিত্তিত আৰক্ষীয়ে তৎকালীনভাৱে এটা গোচৰ ৰুজু কৰে আৰু নিৰুদ্দিষ্ট ছাত্ৰীগৰাকীক বিচাৰি উলিয়াবলৈ অভিযান আৰম্ভ কৰে। আৰক্ষীৰ অহৰহ প্ৰচেষ্টা আৰু সঠিক তদন্তৰ অন্তত মেঘালয়ৰ বৰ্ণিহাট অঞ্চলৰ পৰা কিশোৰীগৰাকীক নিৰাপদে উদ্ধাৰ কৰিবলৈ সক্ষম হয়। উদ্ধাৰৰ পিছত তাইক গুৱাহাটীলৈ ঘূৰাই অনা হয় আৰু প্ৰয়োজনীয় আইনী প্ৰক্ৰিয়াৰ বাবে সাতগাঁও আৰক্ষী থানাত হাজিৰ কৰোৱা হয়।
ইফালে, মূল অভিযুক্ত জাকিৰ আলী এতিয়াও পলাতক হৈ আছে। আৰক্ষীয়ে তাক অতি সোনকালে গ্ৰেপ্তাৰ কৰিবলৈ অভিযান তীব্ৰতৰ কৰি তুলিছে। এই ঘটনাৰ আঁৰত আন কোনো লোক জড়িত আছে নেকি সেই বিষয়েও আৰক্ষীয়ে সবিশেষ তদন্ত অব্যাহত ৰাখিছে। এই সমগ্ৰ ঘটনাই স্থানীয় ৰাইজৰ মাজত অসন্তুষ্টিৰ সৃষ্টি কৰিছে। অঞ্চলটোৰ কন কন শিশুসকলৰ নিৰাপত্তাক লৈ স্থানীয় লোকে গভীৰ উদ্বেগ প্ৰকাশ কৰিছে আৰু সমগ্ৰ ঘটনাটোক লৈ ৰাইজৰ মাজত তীব্ৰ প্ৰতিক্ৰিয়াৰ সৃষ্টি হৈছে।
