বয়স বাঢ়ি অহাৰ লগে লগে মানুহৰ শৰীৰ দুৰ্বল হৈ পৰে আৰু শৰীৰে নিজৰ ক্ষমতা হেৰুৱাবলৈ ধৰে। তেতিয়া সাধাৰণ সৰু সৰু কামবোৰ কৰাও বহুত কঠিন হৈ পৰে। ইয়াৰ ভিতৰত শৌচ কৰিবলৈ যোৱাটোও বয়স্ক লোকৰ বাবে এটা ডাঙৰ সমস্যা হৈ থিয় দিয়ে। নিজৰ শৰীৰটো পৰিষ্কাৰ কৰিবলৈ আনৰ সহায় ল’বলগীয়া হয়, যিটো বহুতৰ বাবে লাজৰ আৰু অস্বস্তিকৰ কথা। কিন্তু এতিয়া এই কামত সহায় কৰিবলৈ আহিছে যন্ত্ৰমানৱ। শেহতীয়াকৈ চীন দেশৰ এটা প্ৰযুক্তি প্ৰতিষ্ঠানে এনে এটা স্বয়ংক্ৰিয় যন্ত্ৰমানৱ শৌচাগাৰ উদ্ভাৱন কৰিছে, যিটো বয়স্ক আৰু ৰোগীয়া লোকসকলৰ বাবে পৰম বন্ধু হৈ পৰিব পাৰে।
এই যন্ত্ৰটোৱে কেনেকৈ কাম কৰিব সেয়া সঁচাকৈয়ে আচৰিত কৰা বিধৰ। ব্যৱহাৰকাৰীসকলে মাতৰ নিৰ্দেশ দি বা দূৰৰ পৰা নিয়ন্ত্ৰণ কৰা সঁজুলিৰ জৰিয়তে যন্ত্ৰটোক নিজৰ ওচৰলৈ মাতিব পাৰিব। এই যন্ত্ৰমানৱটোৱে পোহৰ আৰু শব্দৰ তৰংগ ধৰা পেলোৱা বিশেষ সংবেদকৰ সহায়ত ঘৰৰ ভিতৰত ইফালে সিফালে কোনো বাধা নোহোৱাকৈ অহা-যোৱা কৰিব পাৰিব। এই যন্ত্ৰটোৰ আটাইতকৈ ডাঙৰ সুবিধাটো হৈছে ইয়াৰ আৱৰ্জনা পৰিচালনা ব্যৱস্থা। ব্যৱহাৰ কৰাৰ পিছত এই যন্ত্ৰটোৱে নিজেই আৱৰ্জনাবোৰ ঘৰৰ মূল শৌচাগাৰলৈ লৈ গৈ পেলাই দিব পাৰে। ইয়াৰ উপৰিও স্বাস্থ্যৰ প্ৰতি লক্ষ্য ৰাখি শৌচ কৰাৰ পিছত যন্ত্ৰটোৱে নিজেই নিজকে পৰিষ্কাৰ কৰি ল’ব। গৰম পানীৰে সি নিজেই নিজকে ধুই চিকুণ কৰি ৰাখিব আৰু দুৰ্গন্ধ আঁতৰোৱাৰ বাবেও ইয়াত বিশেষ ব্যৱস্থা ৰখা হৈছে।
শেহতীয়াকৈ চীনৰ ছাংহাই চহৰত বয়স্ক লোকসকলৰ যতন সম্পৰ্কীয় এখন প্ৰদৰ্শনীত এই যন্ত্ৰমানৱ শৌচাগাৰটো ৰাইজৰ আগত প্ৰদৰ্শন কৰা হৈছে। চলা-ফুৰা কৰাত সহায় কৰাৰ লগতে নিজেই নিজকে পৰিষ্কাৰ কৰিব পৰা সুবিধা থকাৰ বাবে ই সকলোৰে দৃষ্টি আকৰ্ষণ কৰিবলৈ সক্ষম হৈছে। বয়স, শাৰীৰিক অক্ষমতা বা বেমাৰৰ বাবে যিসকল লোকে সাধাৰণ শৌচাগাৰলৈ যাবলৈ বা ব্যৱহাৰ কৰিবলৈ কষ্ট পায়, তেওঁলোকৰ বাবে এই শৌচাগাৰটো অতি প্ৰয়োজনীয় হৈ পৰিব বুলি আশা কৰা হৈছে। বাতৰি অনুসৰি এই অত্যাধুনিক যন্ত্ৰটোৰ মূল্য প্ৰায় চাৰি হাজাৰ আমেৰিকান ডলাৰ, অৰ্থাৎ ভাৰতীয় মুদ্ৰাত প্ৰায় তিনি লাখ সত্তৰ হাজাৰ টকা। অৱশ্যে এই যন্ত্ৰটো চীনৰ পৰা আহি ভাৰতৰ বজাৰত কেতিয়া উপলব্ধ হ’ব, সেই বিষয়ে এতিয়ালৈকে কোনো কথা জানিব পৰা হোৱা নাই।
