মহাৰাষ্ট্ৰৰ ভিৱাণ্ডী অঞ্চলত এক ভয়ংকৰ খাদ্য বিষক্ৰিয়াৰ ঘটনা সংঘটিত হৈছে। একেখন দোকানৰ পৰা খাদ্য খোৱাৰ পাছতেই ৫৯ জন লোক অসুস্থ হৈ পৰে আৰু তেওঁলোকক ততাতৈয়াকৈ ইন্দিৰা গান্ধী মেম’ৰিয়েল চিকিৎসালয়ত ভৰ্তি কৰোৱা হয়। অৱশ্যে এক স্বস্তিৰ খবৰ যে বৰ্তমান আটাইকেইজন ৰোগীৰ স্বাস্থ্যৰ অৱস্থা সুস্থিৰ বুলি জানিব পৰা গৈছে।
চিকিৎসালয়খনৰ মুখ্য চিকিৎসা বিষয়া মাধুৰী পানাহাৰেই শুকুৰবাৰে সংবাদ সংস্থা এএনআইৰ আগত প্ৰকাশ কৰে যে যোৱা দিনটোৰ পৰা ৰোগীৰ সংখ্যা ক্ৰমান্বয়ে বৃদ্ধি পাইছে। তেওঁ জনায় যে কালি বিয়লি ৫.৩০ বজালৈকে ১১ জন ৰোগী ভৰ্তি হৈছিল আৰু আজি পুৱালৈ সেই সংখ্যা ৩৭ জনলৈ বৃদ্ধি পায়। বৰ্তমান মুঠ ৫৯ জন ৰোগী চিকিৎসালয়ত চিকিৎসাধীন হৈ আছে। ৰোগীসকলে পেটৰ বিষ, বমি আৰু পেটচলা ৰোগত আক্ৰান্ত হোৱা বুলি অভিযোগ কৰিছে। চিকিৎসালয় কৰ্তৃপক্ষই নিশ্চিত কৰিছে যে এই সকলোবোৰ লোকে একেখন দোকানৰ পৰাই খাদ্য গ্ৰহণ কৰিছিল। কালি ভৰ্তি হোৱা ৰোগীসকলৰ অৱস্থা লাহে লাহে উন্নত হৈছে আৰু সকলোৰে স্বাস্থ্য বৰ্তমান বিপদমুক্ত।
শেহতীয়া কেইসপ্তাহমানৰ ভিতৰত দেশৰ বিভিন্ন প্ৰান্তৰ পৰা এনেধৰণৰ খাদ্য বিষক্ৰিয়াৰ কেইবাটাও খবৰ পোহৰলৈ আহিছে। যোৱা ১৭ জুন তাৰিখে তেলেংগানাৰ ৰাজন্না ছিৰচিল্লা জিলাতো অনুৰূপ এক ঘটনা সংঘটিত হৈছিল। থাংগাল্লাপল্লী মণ্ডলৰ এখন আৱাসিক এলেকাত পদপথৰ ব্যৱসায়ীৰ পৰা পানীপুৰী খোৱাৰ পিছত প্ৰায় ১৫ টা শিশু গুৰুতৰভাৱে অসুস্থ হৈ পৰিছিল।
থাংগাল্লাপল্লী আৰক্ষীয়ে জনোৱা অনুসৰি, শিশুকেইটা আৰু তেওঁলোকৰ পৰিয়ালৰ লোকে সেই কল’নীত প্ৰৱেশ কৰা এজন পানীপুৰী বিক্ৰেতাৰ পৰা পানীপুৰী খাইছিল। তাৰ অলপ পিছতেই শিশুকেইটাৰ বমি আৰু পেটচলা আৰম্ভ হয় আৰু তেওঁলোকক লগে লগে চৰকাৰী চিকিৎসালয়লৈ উন্নত চিকিৎসাৰ বাবে লৈ যোৱা হয়। আৰক্ষীয়ে ইতিমধ্যে সেই পানীপুৰী বিক্ৰেতাজনক নিজৰ জিম্মাত লৈ ঘটনাটোৰ এক তদন্ত আৰম্ভ কৰিছে।
একেদৰে এই মাহৰ আৰম্ভণিতে মধ্যপ্ৰদেশৰ গুনা জিলাতো দূষিত খোৱাপানী গ্ৰহণ কৰাৰ ফলত এক ডজনৰো অধিক শিশু চিকিৎসালয়ত ভৰ্তি হ’বলগীয়া হৈছিল। প্ৰশাসনে লগে লগে সেই অঞ্চলৰ খোৱাপানীৰ নমুনা সংগ্ৰহ কৰি ঘটনাটোৰ তদন্ত আৰম্ভ কৰে। বিষয়া সকলে জনোৱা অনুসৰি সেই শিশুসকলৰো বমি, পেটৰ বিষ আৰু শৌচনীৰ দৰে লক্ষণ দেখা গৈছিল, পিছে চিকিৎসাৰ অন্তত বৰ্তমান তেওঁলোকৰ অৱস্থাও সুস্থিৰ হৈ আছে।
