ৰবিবাৰে অনুষ্ঠিত হৈ যোৱা নীট ইউজি ৰি-এক্সামত অৰ্থাৎ পুনৰ পৰীক্ষাত প্ৰায় ২২ লাখতকৈও অধিক পৰীক্ষাৰ্থীয়ে অংশগ্ৰহণ কৰে। এই পৰীক্ষাৰ মাজতে ৰাজস্থানৰ আজমেৰৰ এটা পৰীক্ষা কেন্দ্ৰত বোৰ্খা পিন্ধি অহাৰ বাবে এগৰাকী ছাত্ৰীক প্ৰৱেশ কৰাত বাধা দিয়াৰ এক গুৰুতৰ অভিযোগ উত্থাপন হৈছে।
সাংবাদিকৰ সৈতে হোৱা বাৰ্তালাপত ভুক্তভোগী ছাত্ৰীগৰাকীয়ে কয় যে তেওঁ বোৰ্খা পিন্ধি পৰীক্ষা দিবলৈ আহিছিল বাবে তেওঁক কেন্দ্ৰটোৰ ভিতৰলৈ সোমাবলৈ দিয়া হোৱা নাছিল। ছাত্ৰীগৰাকীৰ মতে যোৱা ৩ মে’ত অনুষ্ঠিত হোৱা প্ৰথম পৰীক্ষাতো তেওঁ একে সাজপাৰ পিন্ধিয়েই পৰীক্ষা দিছিল আৰু তেতিয়া তেওঁক কোনো ধৰণৰ বাধা দিয়া হোৱা নাছিল।
নেচনেল টেষ্টিং এজেন্সী অৰ্থাৎ এনটিএ-ৰ নিয়ম অনুসৰি পৰীক্ষাৰ্থীসকলে ধৰ্মীয় পোছাক বা প্ৰতীক পিন্ধি পৰীক্ষা কেন্দ্ৰলৈ আহিব পাৰে, কিন্তু তাৰ বাবে তালাচী প্ৰক্ৰিয়াৰ সুবিধাৰ্থে তেওঁলোক নিৰ্ধাৰিত সময়তকৈ বহু পূৰ্বে কেন্দ্ৰত উপস্থিত হ’ব লাগে।
কুলচুম বানো নামৰ এই ছাত্ৰীগৰাকীয়ে অভিযোগ কৰা মতে পৰীক্ষা কেন্দ্ৰৰ সুৰক্ষা কৰ্মীয়ে প্ৰথমে তেওঁক ওৰণিখন খুলিবলৈ কয় আৰু পিছত বোৰ্খাও খুলিবলৈ বাধ্য কৰে। ছাত্ৰীগৰাকীয়ে প্ৰশ্ন উত্থাপন কৰে যে যদি এনটিএ-ৰ নিয়মত ধৰ্মীয় পোছাক পিন্ধাৰ অনুমতি আছে, তেন্তে তেওঁক কিয় বাধা দিয়া হ’ল। ইয়াৰ লগতে ছাত্ৰীগৰাকীয়ে স্পষ্টকৈ কয় যে পৰীক্ষাতকৈ তেওঁৰ বাবে বৰ্খাহে বেছি গুৰুত্বপূৰ্ণ আৰু এই পোছাক খুলি তেওঁ পৰীক্ষাত বহিব নোখোজে।
ছাত্ৰীগৰাকীৰ পিতৃয়ে জানিবলৈ দিয়ে যে তেওঁৰ কন্যাই যোৱা ৩ মে’ৰ পৰীক্ষাতো বোৰ্খা পিন্ধিয়েই অংশ লৈছিল আৰু নিয়ম অনুসৰি ধৰ্মীয় পোছাক পিন্ধাৰ অনুমতি আছে। তেওঁলোকে সুৰক্ষা কৰ্মীক অনুৰোধ কৰিছিল যাতে কোনো মহিলা কৰ্মীৰ দ্বাৰা ছাত্ৰীগৰাকীক ভালদৰে তালাচী কৰা হয় আৰু কোনো গোপন স্থানত বোৰ্খা খুলিবলৈ দিয়া হয়, কিন্তু কৰ্তৃপক্ষই এই অনুৰোধত মান্তি হোৱা নাছিল। অৱশ্যে এই বিতৰ্কৰ মাজতে নেচনেল টেষ্টিং এজেন্সীয়ে জনায় যে ছাত্ৰীগৰাকীক শেষত কেন্দ্ৰত প্ৰৱেশ কৰিবলৈ আৰু পৰীক্ষাত বহিবলৈ অনুমতি দিয়া হয়।
আজমেৰ উত্তৰ অঞ্চলৰ চাৰ্কল অফিচাৰ শিৱম যোশীয়ে এই সন্দৰ্ভত সংবাদ মাধ্যমক কয় যে নিয়মৰ কিছু অস্পষ্টতাৰ বাবেই এই খেলিমেলিৰ সৃষ্টি হৈছিল, কিন্তু উচ্চপদস্থ বিষয়াসকলে কথাটো স্পষ্ট কৰাৰ পিছত সমস্যাটোৰ সমাধান হয়। এই ঘটনাটোৰ বাহিৰে বাকী সকলো শিক্ষাৰ্থীয়ে শান্তিপূৰ্ণভাৱে পৰীক্ষা কেন্দ্ৰত প্ৰৱেশ কৰে বুলি তেওঁ জনায়।
উল্লেখ্য যে যোৱা ৩ মে’ত অনুষ্ঠিত হোৱা নীট পৰীক্ষাৰ প্ৰশ্নকাকত ফাদিল হোৱাৰ বাবে পৰীক্ষাটো বাতিল কৰা হৈছিল আৰু সেইবাবেই দেওবাৰে এনটিএ-ই নিৰাপত্তা ব্যৱস্থা অধিক কটকটীয়া কৰি এই পুনৰ পৰীক্ষাৰ আয়োজন কৰিছিল।
