অৱশেষত ইৰাণ আৰু আমেৰিকাৰ মাজত শান্তি চুক্তি সম্পন্ন হৈছে আৰু ইয়াৰ লগে লগে ষ্ট্ৰেইট অৱ হৰমুজ মুকলি হোৱাৰ লগতে জাহাজৰ চলাচল স্বাভাৱিক হৈ পৰিছে। এই যোগাত্মক পৰিৱেশৰ প্ৰভাৱ এতিয়া ভাৰততো দেখিবলৈ পোৱা গৈছে। ভাৰত চৰকাৰে বৃহস্পতিবাৰে ব্যৱসায়িক এলপিজি চিলিণ্ডাৰৰ যোগানৰ ওপৰত আৰোপ কৰা সকলো ধৰণৰ নিষেধাজ্ঞা আঁতৰাই পেলাইছে। চৰকাৰৰ এই ডাঙৰ সিদ্ধান্তৰ ফলত হোটেল আৰু ৰেষ্টুৰেণ্টৰ গৰাকীসকলৰ লগতে সাধাৰণ ৰাইজকো এক ডাঙৰ সকাহ দিয়া হৈছে।
পশ্চিম এছিয়াৰ যুদ্ধ সংকটৰ পৰিস্থিতি উন্নত হোৱাৰ পিছতে অসমৰ মুখ্য সচিব ৰবি কোটাই জনাইছে যে ব্যৱসায়িক এলপিজি চিলিণ্ডাৰৰ ওপৰত থকা সকলো বাধ্যবাধকতা তৎকালিনভাৱে প্ৰত্যাহাৰ কৰা হৈছে। কেন্দ্ৰীয় পেট্ৰ’লিয়াম আৰু প্ৰাকৃতিক গেছ মন্ত্ৰালয়ে সমগ্ৰ পৰিস্থিতি পুনৰীক্ষণ কৰি সকলো ৰাজ্যকে ব্যৱসায়িক এলপিজি চিলিণ্ডাৰ বিক্ৰীৰ ক্ষেত্ৰত থকা নিষেধাজ্ঞা শিথিল কৰাৰ কথা অৱগত কৰিছে। মুখ্য সচিবে ছ’চিয়েল মিডিয়া এক্সৰ জৰিয়তে সদৰী কৰিছে যে কেন্দ্ৰীয় চৰকাৰে ব্যৱসায়িক এলপিজি যোগান পূৰ্বৰ অৱস্থালৈ ঘূৰাই অনাৰ সিদ্ধান্ত লৈছে আৰু পেট্ৰ’লিয়াম সচিব নীৰজ মিত্তলে এই সন্দৰ্ভত সকলো ৰাজ্য আৰু কেন্দ্ৰীয় শাসিত অঞ্চললৈ পত্ৰ প্ৰেৰণ কৰিছে।
মন্ত্ৰালয়ৰ নতুন নিৰ্দেশ অনুসৰি অনা-ঘৰুৱা ব্যৱহাৰৰ এলপিজি চিলিণ্ডাৰৰ ওপৰত থকা আঞ্চলিক নিষেধাজ্ঞা এতিয়াৰ পৰা নাথাকিব আৰু পাইপ গেছৰ সুবিধা থকা গ্ৰাহকসকলে দীৰ্ঘম্যাদী ব্যৱস্থা হিচাপে সেই সুবিধাই ব্যৱহাৰ কৰিব পাৰিব। পেট্ৰ’লিয়াম সচিবৰ তথ্য অনুসৰি এতিয়াৰে পৰা সকলো ব্যৱসায়িক আৰু ঔদ্যোগিক গ্ৰাহকৰ তথ্য তৈল বিপণন কোম্পানীসমূহে নিজৰ ডাটাবেছত সংৰক্ষিত কৰি ৰাখিব লাগিব। ইয়াৰ বাবে তিনিটা প্ৰধান তৈল প্ৰতিষ্ঠানৰ বাবে এক উমৈহতীয়া তথ্য ভঁৰাল গঠন কৰা হ’ব আৰু পূৰ্বৰ নিৰ্দেশনা অনুসৰি যিসকল গ্ৰাহকে ইতিমধ্যে পাইপ গেছ ব্যৱহাৰ কৰিবলৈ লৈছে, তেওঁলোকে সেই সুবিধাই অব্যাহত ৰাখিব লাগিব।
