ফ্ৰান্সৰ পৰম্পৰাগত বাৰ্ষিক পথ সংগীত উৎসৱ ‘ফেট ডে লা মিউজিক’ এইবাৰ এক চৰম দুঃস্বপ্নলৈ পৰিণত হ’ল। লাখ লাখ মানুহৰ উপস্থিতিত উদযাপন কৰা এই উৎসৱৰ আনন্দৰ পৰিৱেশ ম্লান কৰি সমগ্ৰ দেশতে হিংসা, বিশৃংখলতা আৰু অপৰাধৰ সৃষ্টি হয়। আন্তঃৰাষ্ট্ৰীয় পৰ্যটকসহ লাখ লাখ মানুহৰ সমাগম হোৱা এই উৎসৱত একাধিক মহিলা ধৰ্ষণৰ বলি হোৱাৰ লগতে বহু মানুহৰ ওপৰত ৰহস্যজনক ছিৰিঞ্জ আক্ৰমণ চলোৱাৰ গুৰুতৰ অভিযোগ উঠিছে।
পেৰিছকে ধৰি ফ্ৰান্সৰ কেইবাখনো প্ৰধান চহৰত গোটেই নিশা চলা এই নজিৰবিহীন অৰাজকতা নিয়ন্ত্ৰণ কৰিবলৈ ফৰাচী আৰক্ষী আৰু নিৰাপত্তাৰক্ষীয়ে যথেষ্ট কষ্ট কৰিবলগীয়া হয়। পৰিস্থিতি নিয়ন্ত্ৰণলৈ আনিবলৈ প্ৰশাসনে কঠোৰ ব্যৱস্থা গ্ৰহণ কৰিবলগীয়া হয়, যাৰ ফলত সমগ্ৰ দেশতে কমেও ২৪৩ জন লোকক গ্ৰেপ্তাৰ কৰা হৈছে।
এই উৎসৱৰ আটাইতকৈ ভয়ংকৰ দিশটো আছিল ভিৰৰ মাজত অতৰ্কিতে কৰা ‘নিডল স্পাইকিং’ বা ছিৰিঞ্জ আক্ৰমণ। উৎসৱৰ ভিৰৰ সুযোগ লৈ একাংশ মহিলাৰ শৰীৰত হঠাতে ছিৰিঞ্জ ফুটাই দিয়া হয়। বহু ভুক্তভোগী মহিলাই ভিৰৰ মাজত হঠাতে শৰীৰত তীব্ৰ বেজী বিন্ধাৰ দৰে বিষ অনুভৱ কৰে, যাৰ ফলত কেইবাগৰাকীও গুৰুতৰভাৱে অসুস্থ হৈ পৰে। পেৰিছৰ বুলেভাৰ্ড ডে লা মেডেলিন অঞ্চলত এনে এক আক্ৰমণৰ বলি হৈ এগৰাকী মহিলা অচেতন হৈ পৰাত তেওঁক সংকটজনক অৱস্থাত ততাতৈয়াকৈ চিকিৎসালয়ত ভৰ্তি কৰোৱা হয়। ফৰাচী প্ৰশাসনৰ তৰফৰ পৰা জনোৱা হৈছে যে এই ছিৰিঞ্জৰ জৰিয়তে শৰীৰত কোনো ক্ষতিকাৰক বা নিচাজাতীয় ৰাসায়নিক পদাৰ্থ প্ৰৱেশ কৰোৱা হৈছিল নেকি, সেয়া পৰীক্ষা কৰিবলৈ ফৰেনছিক আৰু চিকিৎসা পৰীক্ষা আৰম্ভ কৰা হৈছে।
ছিৰিঞ্জ আক্ৰমণৰ সমান্তৰালকৈ উৎসৱ চলি থকাৰ সময়তে মহিলাৰ ওপৰত একাধিক যৌন নিৰ্যাতন আৰু ধৰ্ষণৰ অভিযোগ ৰুজু হৈছে, যিয়ে এই উৎসৱৰ নিৰাপত্তাক লৈ ডাঙৰ প্ৰশ্নৰ সৃষ্টি কৰিছে। চেণ্ট্ৰেল পেৰিছৰ চেটেলেটৰ দৰে অত্যন্ত ব্যস্ত আৰু জনবসতিপূৰ্ণ অঞ্চলসমূহত বিভিন্ন গেং বা দলবদ্ধ যুৱকৰ মাজত মাৰপিট আৰু হিংসাত্মক সংঘৰ্ষৰ ঘটনা ঘটে। ঠেক ৰাস্তাবোৰত হোৱা এই তীব্ৰ মাৰপিটৰ ফলত সাধাৰণ ৰাইজৰ মাজত ব্যাপক আতংকৰ সৃষ্টি হয় আৰু একপ্ৰকাৰৰ পদপিষ্ট হোৱাৰ দৰে বিপদজনক পৰিস্থিতিৰ সৃষ্টি হৈছিল। প্ৰত্যক্ষদৰ্শীৰ মতে, ভিৰৰ মাজত ইটোৰ পিছত সিটোকৈ অশান্তিৰ সৃষ্টি হোৱাত মানুহৰ সুৰক্ষাৰ কোনো ব্যৱস্থাই নাছিল আৰু পৰিস্থিতিয়ে অতি বিপদজনক ৰূপ ধাৰণ কৰিছিল।
পৰিস্থিতি নিয়ন্ত্ৰণলৈ আনিবলৈ সমগ্ৰ ফ্ৰান্সতে হাজাৰ হাজাৰ আৰক্ষী বিষয়া আৰু অগ্নিনিৰ্বাপক বাহিনীক ৰাজপথত নমোৱা হয়। আনকি ড্ৰোণ আৰু হেলিকপ্টাৰৰ সহায়ত আকাশমাৰ্গেৰেও নিৰীক্ষণ চলায় ফৰাচী জেণ্ডাৰমাৰিয়ে। যদিও আৰক্ষীৰ তৎপৰতাত পৰিস্থিতি নিয়ন্ত্ৰণলৈ অনা হৈছে বুলি প্ৰশাসনে দাবী কৰিছে, তথাপিও সাধাৰণ ৰাইজে নিৰাপত্তা ব্যৱস্থাক লৈ তীব্ৰ ক্ষোভ প্ৰকাশ কৰিছে। অতীততো এনেধৰণৰ মুকলি উৎসৱত বিশৃংখলতাৰ নজিৰ থকাৰ পিছতো কিয় আগতীয়াকৈ পৰ্যাপ্ত প্ৰতিৰোধমূলক ব্যৱস্থা গ্ৰহণ কৰা হোৱা নাছিল, তাক লৈ এতিয়া ফৰাচী ৰাজনীতিতো তীব্ৰ বিতৰ্কৰ সৃষ্টি হৈছে। আপাত দৃষ্টিত যি আছিল সুৰৰ মেলা, সেয়া আজি আন্তঃৰাষ্ট্ৰীয় পৰ্যায়ত ফ্ৰান্সৰ আইন-শৃংখলা আৰু নাৰী নিৰাপত্তাক লৈ এক গভীৰ উদ্বেগৰ কাৰণ হৈ পৰিল।
