অসমৰ ক্ষুদ্ৰ চাহ খেতিয়কসকলৰ সৰ্বাংগীণ উন্নয়নৰ প্ৰতি লক্ষ্য ৰাখি ৰাজ্য চৰকাৰে এক গুৰুত্বপূৰ্ণ সিদ্ধান্ত গ্ৰহণ কৰিছে। এতিয়াৰে পৰা ৰাজ্যৰ ক্ষুদ্ৰ চাহ খেতিয়কসকলে কৃষক পঞ্জীয়ন পৰ্টেলত নাম পঞ্জীয়ন কৰি কৃষক পৰিচয় পত্ৰ লাভ কৰিবলৈ সক্ষম হ’ব। এই একত্ৰিত ডিজিটেল মঞ্চৰ জৰিয়তে ক্ষুদ্ৰ চাহ খেতিয়কসকলে এতিয়াৰে পৰা চৰকাৰী কল্যাণমূলক আঁচনি, কৃষি সেৱা আৰু প্ৰাতিষ্ঠানিক ঋণৰ সুবিধা অতি সহজেই লাভ কৰিব পাৰিব।
মুখ্যমন্ত্ৰীগৰাকীয়ে ৰাজ্যৰ চাহ খেতিয়ক সমাজৰ বাবে চৰকাৰৰ এই পদক্ষেপক এক তাৎপৰ্যপূৰ্ণ অগ্ৰগতি বুলি অভিহিত কৰিছে। তেওঁ স্পষ্ট কৰি দিয়ে যে চাহ খণ্ডটো উদ্যোগ বিভাগৰ অধীনতেই থাকিব যদিও এই নতুন ব্যৱস্থাৰ জৰিয়তে ক্ষুদ্ৰ চাহ খেতিয়কসকলে কৃষি বিভাগৰ পৰা প্ৰদান কৰা সুবিধাসমূহো গ্ৰহণ কৰিব পাৰিব। কৃষক পৰিচয় পত্ৰৰ জৰিয়তে খেতিয়কসকলে সময়মতে সাৰ লাভ কৰা, চৰকাৰী আঁচনিৰ সুযোগ লোৱা আৰু প্ৰাতিষ্ঠানিক ঋণ লাভ কৰাটো সহজসাধ্য হৈ পৰিব।
ভাৰতীয় চাহ ব’ৰ্ডৰ পৰিসংখ্যা অনুসৰি, ২০২৫ চনৰ ৩১ মাৰ্চলৈকে অসমত মুঠ এক লাখ তেত্ৰিছ হাজাৰ আঠশ চৌষষ্ঠিজন ক্ষুদ্ৰ চাহ খেতিয়কে এক লাখ ছাব্বিশ হাজাৰ এশ সাত দশমিক ছয় চাৰি হেক্টৰ ভূমিত চাহ খেতি কৰি আহিছে। বৰ্তমান ৰাজ্য চৰকাৰৰ এই নতুন পদক্ষেপে এই বৃহৎসংখ্যক ক্ষুদ্ৰ চাহ খেতিয়কৰ অৰ্থনৈতিক সুৰক্ষা নিশ্চিত কৰাৰ দিশত এক ইতিবাচক বাতাবৰণৰ সৃষ্টি কৰিছে। চৰকাৰী ব্যৱস্থাপনাৰ জৰিয়তে ডিজিটেল পঞ্জীয়ন প্ৰক্ৰিয়া ক্ষিপ্ৰতাৰে সম্পন্ন হ’লে অনাগত দিনত ক্ষুদ্ৰ চাহ খেতিয়কসকলে চৰকাৰী সুবিধাসমূহ নিৰৱচ্ছিন্নভাৱে লাভ কৰিবলৈ সক্ষম হ’ব আৰু ই ৰাজ্যৰ গ্ৰাম্য অৰ্থনীতিলৈ আশাৰ বতৰা কঢ়িয়াই আনিব।
