প্ৰধানমন্ত্ৰী নৰেন্দ্ৰ মোডীয়ে চিচিলিছ নেচনেল বোটানিকেল গাৰ্ডেন ভ্ৰমণৰ সময়ত জনাথন নামৰ পৃথিৱীৰ আটাইতকৈ পুৰণি জীৱিত প্ৰাণীটোক সাক্ষাৎ কৰে। এই বিশেষ ভ্ৰমণৰ সময়ত তেওঁ তাত এটা গছপুলিও ৰোপণ কৰে। ভাৰত আৰু চিচিলিছৰ মাজত কূটনৈতিক সম্পৰ্ক স্থাপনৰ ৫০ বছৰীয়া জয়ন্তী উপলক্ষে তেওঁ এই ভ্ৰমণ কৰিছে। চিচিলিছৰ ৰাষ্ট্ৰীয় দিৱস উদযাপনত প্ৰধানমন্ত্ৰী মোডীক সন্মানীয় অতিথি হিচাপে আমন্ত্ৰণ জনোৱা হৈছে আৰু তেওঁ দেশখনৰ নেতৃত্বৰ সৈতে বিভিন্ন গুৰুত্বপূৰ্ণ আলোচনাতো মিলিত হ’ব।
জনাথন হৈছে এটা বৃহৎ আকৃতিৰ কাছ যাৰ জন্ম ১৮৩২ চনত হৈছিল বুলি অনুমান কৰা হয়। ইয়াৰ অৰ্থ হৈছে যে বৰ্তমান জনাথনৰ বয়স প্ৰায় ১৯৪ বছৰ। গিনিজ ৱৰ্ল্ড ৰেকৰ্ডছে জনাথনক পৃথিৱীৰ আটাইতকৈ পুৰণি জীৱিত স্থলজ প্ৰাণী হিচাপে স্বীকৃতি দিছে। প্ৰায় দুশ বছৰ ধৰি জনাথনে পৃথিৱীৰ বহুতো ঐতিহাসিক পৰিঘটনা, প্ৰজন্মৰ পিছত প্ৰজন্ম আৰু নাটকীয় পৰিৱৰ্তন নিজ চকুৰে দেখিছে। ইমান বয়স হোৱাৰ পিছতো পশু চিকিৎসকসকলৰ প্ৰচেষ্টাত জনাথনৰ স্বাস্থ্য বৰ্তমান যথেষ্ট ভাল অৱস্থাত আছে। চকুত ছানি পৰা আৰু ঘ্ৰাণশক্তি কমাৰ বাবে তাৰ অলপ অসুবিধা হয় যদিও জনাথন এতিয়াও চিচিলিছৰ অন্যতম প্ৰধান আকৰ্ষণ হৈ আছে। তাৰ এই দীঘলীয়া জীৱনকাল বিজ্ঞানীসকলৰ বাবেও বাৰ্ধক্য আৰু আয়ুসৰ বিষয়ে গৱেষণা কৰাৰ এক গুৰুত্বপূৰ্ণ বিষয় হৈ পৰিছে।
Visited the Giant Tortoise Enclosure at the Seychelles National Botanical Garden with President Dr. Patrick Herminie.
The Aldabra Giant Tortoise, which is native to Seychelles, is among the largest and longest-living species on Earth, with some of them witnessing over two… pic.twitter.com/995s3bfawf
— Narendra Modi (@narendramodi) June 27, 2026
প্ৰধানমন্ত্ৰী মোডীৰ এই চিচিলিছ নেচনেল বোটানিকেল গাৰ্ডেন ভ্ৰমণ তেওঁৰ কাৰ্যসূচীৰ এক অন্যতম প্ৰধান অংশ। জনাথনক লগ পোৱাৰ লগতে তেওঁ গছপুলি ৰোপণ কৰি পৰিৱেশ সংৰক্ষণ আৰু বহনক্ষম উন্নয়নৰ গুৰুত্বৰ ওপৰত আলোকপাত কৰে। এই ভ্ৰমণে সামুদ্ৰিক নিৰাপত্তা, জলবায়ু পৰিৱৰ্তনৰ মোকাবিলা আৰু আন আন ক্ষেত্ৰত ভাৰত আৰু চিচিলিছৰ মাজত সহযোগিতা অধিক সুদৃঢ় কৰিব বুলি আশা কৰা হৈছে। দুয়োখন দেশৰ সম্পৰ্কৰ সোণালী জয়ন্তী উপলক্ষে হোৱা এই ভ্ৰমণত ৰণনীতিগত, অৰ্থনৈতিক আৰু উন্নয়নমূলক দিশৰ ওপৰতো বহুতো গুৰুত্বপূৰ্ণ আলোচনা হোৱাৰ সম্ভাৱনা আছে।
