জীৱিকা সূত্ৰে অৰুণাচল প্ৰদেশৰ আঞ্জাও জিলাত থকা অসমৰ এজন যুৱকে কৰ্মৰত অৱস্থাত সংঘটিত এক ভয়ংকৰ প্ৰাকৃতিক দুৰ্যোগত অকালতে প্ৰাণ হেৰুৱাবলগীয়া হৈছে। দেওবাৰে, অৰ্থাৎ ২৮ জুনৰ নিশা প্ৰায় ৮:৩০ বজাত জিলাখনৰ ৱালং অঞ্চলত হঠাতে অহা এক ভূমিস্খলনৰ ফলত কৰুণ মৃত্যুক আঁৱালি লোৱা ৩৫ বছৰীয়া যুৱকজন বকোৰ ৰূপম ৰাভা বুলি জানিব পৰা গৈছে।
জানিব পৰা মতে, নিহত ৰূপম ৰাভাৰ ঘৰ বকোৰ অন্তৰ্গত বনগাঁও বুঢ়ীগাঁৱত। তেওঁ অৰুণাচল প্ৰদেশৰ উক্ত অঞ্চলটোত পকলেইন যন্ত্ৰৰ চালক হিচাপে কৰ্মৰত আছিল। প্ৰতিবেদন অনুসৰি, দেওবাৰে নিশা নিৰ্ধাৰিত স্থানত যন্ত্ৰচালনা কৰি থকা অৱস্থাতেই হঠাতে পাহাৰৰ পৰা ভূমিস্খলন হয় আৰু তেওঁ চলাই থকা যন্ত্ৰটো মাটি আৰু ধ্বংসাৱশেষৰ তলত সম্পূৰ্ণৰূপে পোত যায়। এই ভয়ংকৰ দুৰ্ঘটনাত যুৱকজনে থিতাতে মৃত্যুবৰণ কৰে।
এগৰাকী পৰিশ্ৰমী যুৱক হিচাপে পৰিচিত ৰূপম ৰাভাৰ এই অকাল মৃত্যুত তেওঁৰ জন্মস্থান বনগাঁও বুঢ়ীগাঁৱত এক শোকাকুল পৰিৱেশৰ সৃষ্টি হৈছে। স্থানীয় ৰাইজ আৰু পৰিয়ালৰ শোকসন্তপ্ত সদস্যসকলে যুৱকজনৰ আকস্মিক বিয়োগত গভীৰ শোক প্ৰকাশ কৰিছে।
মৃত্যুৰ সময়ত যুৱকজনে পত্নী আৰু এটি মাত্ৰ চাৰিবছৰীয়া পুত্ৰ সন্তান ইহসংসাৰত এৰি থৈ গৈছে। কৰ্মসূত্ৰে বাহিৰলৈ গৈ এনেদৰে প্ৰাকৃতিক দুৰ্যোগৰ বলি হৈ যুৱকজনে অকালতে প্ৰাণ হেৰুৱাবলগীয়া হোৱা ঘটনাই বৰ্তমান সমগ্ৰ অঞ্চলটোত শোকৰ ছাঁ পৰিছে।
