চৰকাৰী চিকিৎসা মহাবিদ্যালয়ৰ চিকিৎসালয়ত নৈশ কৰ্তব্যৰ সময়ত এগৰাকী মহিলা চিকিৎসকক যৌন নিৰ্যাতন চলোৱা হয়। বাধা দিলে গুলীয়াই হত্যা কৰাৰ ভাবুকি দিয়ে। এই অভিযোগ বিজেপি যুৱ মৰ্চাৰ এজন নেতাৰ বিৰুদ্ধে।
মধ্যপ্ৰদেশৰ সাগৰ জিলাত বৃহস্পতিবাৰে মাজ নিশা সংঘটিত হয় এই ঘটনা। প্ৰতিবাদত সৰৱ হৈছে চিকিৎসক মহল। ২৪ ঘন্টাৰ ভিতৰত অভিযুক্তক গ্ৰেপ্তাৰ নকৰিলে ৰাজ্যজুৰি ধৰ্মঘট আৰম্ভ কৰাৰ হুংকাৰ দিছে মধ্যপ্ৰদেশ কনিষ্ঠ চিকিৎসক সন্থাই।
চিকিৎসা কৰ্মীসকলে কয় যে এই ঘটনাই চৰকাৰী চিকিৎসালয়ত নিশা কৰ্তব্যৰত স্বাস্থ্যকৰ্মী বিশেষকৈ মহিলা চিকিৎসকৰ নিৰাপত্তাৰ দিশটো উদঙাই দিছে। এগৰাকী প্ৰতিবাদকাৰী চিকিৎসকে কয় যে চিকিৎসালয়খনৰ ভিতৰত চিকিৎসকসকল নিজেই সুৰক্ষিত নহয়।
অভিযুক্তৰ নাম অনিল শ্ৰীবাস্তৱ। মধ্যপ্ৰদেশ ৰাজ্যিক বিজেপি যুৱ মৰ্চাৰ কাৰ্যনিৰ্বাহক সমিতিৰ সদস্য। কৰ্তব্যৰত অৱস্থাত যৌন নিৰ্যাতন চলোৱা এগৰাকী মহিলা চিকিৎসকৰ অভিযোগৰ ভিত্তিত শ্ৰীবাস্তৱ আৰু তেওঁৰ এগৰাকী সহযোগীৰ বিৰুদ্ধে গোচৰ ৰুজু কৰা হৈছে। আৰক্ষীয়ে জনোৱা মতে, অভিযুক্ত দুজনৰ সন্ধানত তালাচী অভিযান অব্যাহত আছে।
বৃহস্পতিবাৰে পুৱা প্ৰায় ২ বজাত লক্ষ্মী তিৱাৰী নামৰ এগৰাকী ৰোগীক সাগৰ জিলাৰ বুণ্ডেলখণ্ড চিকিৎসা মহাবিদ্যালয়লৈ অনা হয়। অভিযোগ অনুসৰি চিকিৎসাৰ সময়ত ৰোগীজনৰ লগত থকা অনিল শ্ৰীবাস্তৱ আৰু তেওঁৰ সংগীয়ে স্বাস্থ্যকৰ্মীৰ সৈতে অসৎ আচৰণ কৰিবলৈ আৰম্ভ কৰে।
তাত উপস্থিত মহিলা চিকিৎসকে প্ৰতিবাদ কৰাৰ সময়ত শ্ৰীবাস্তৱে যৌন নিৰ্যাতন চলায়। একে সময়তে বিজেপি যুৱ মৰ্চাৰ নেতাগৰাকীয়ে মহিলা চিকিৎসকগৰাকীক ভাবুকি দি কয় যে চিকিৎসালয়ৰ বাহিৰত ভৰি দিলেই গুলী চলিব। অভিযুক্ত দুজনে লগতে নাৰ্ছসকলকো দুৰ্ব্যৱহাৰ কৰি ভাবুকি প্ৰদান কৰে।
অতিৰিক্ত আৰক্ষী অধীক্ষক নৰেন্দ্ৰ সোলংকিয়ে কয় যে মহিলা চিকিৎসকগৰাকীৰ অভিযোগৰ ভিত্তিত ভাৰতীয় দণ্ডবিধিৰ সংশ্লিষ্ট ধাৰাত বিজেপি যুৱ মৰ্চাৰ নেতা আৰু তেওঁৰ সংগীৰ বিৰুদ্ধে এজাহাৰ দাখিল কৰা হৈছে। অতি সোনকালে অভিযুক্ত দুজনক গ্ৰেপ্তাৰ কৰাৰ প্ৰচেষ্টা অব্যাহত আছে।
ইপিনে, চিকিৎসা মহাবিদ্যালয়খনৰ মূল প্ৰৱেশদ্বাৰ অৱৰোধ কৰি প্ৰতিবাদ সাব্যস্ত কৰে চিকিৎসক আৰু স্বাস্থ্যকৰ্মীসকলে। সাময়িকভাৱে চিকিৎসা সেৱা ব্যাহত হৈ পৰে। প্ৰতিবাদকাৰী চিকিৎসকসকলে অভিযুক্তক শীঘ্ৰে গ্ৰেপ্তাৰ কৰিবলৈ দাবী জনায়।
আৰক্ষী আৰু প্ৰশাসনৰ জ্যেষ্ঠ বিষয়াৰ আশ্বাসৰ পিছতে সাময়িকভাৱে বাতিল কৰা হৈছে প্ৰতিবাদ। অৱশ্যে ২৪ ঘন্টাৰ ভিতৰত অভিযুক্তক গ্ৰেপ্তাৰ নকৰিলে ৰাজ্যজুৰি ধৰ্মঘট আৰম্ভ কৰা হ’ব বুলি স্পষ্ট কৰি দিছে কনিষ্ঠ চিকিৎসক সন্থাই।
