আমাৰ ঘৰৰ বাকী সকলো বৈদ্যুতিক সঁজুলিয়ে মাজে মাজে জিৰণি পালেও ফ্ৰিজটোৰ কিন্তু কোনো জিৰণি নাই। চৌবিশ ঘণ্টাই অবিৰতভাৱে কাম কৰি থকাৰ বাবেই ঘৰৰ বিদ্যুৎ বিলৰ এটা ডাঙৰ অংশ এই যন্ত্ৰটোৰ নামতে আহে। বিশেষকৈ ফ্ৰিজটো অলপ পুৰণি হ’লেই আমাৰ অজ্ঞাতে ই বেছি বিদ্যুৎ খৰচ কৰিবলৈ আৰম্ভ কৰে। বাহিৰৰ পৰা ফ্ৰিজটোৱে ঠাণ্ডা কৰি থকা যেন লাগিব পাৰে, কিন্তু আচল সমস্যাটো ইয়াৰ পুৰণি প্ৰযুক্তিৰ ভিতৰতে লুকাই থাকে।
বহুতৰে ঘৰত দহ বছৰ বা তাতকৈ পুৰণি ফ্ৰিজ থাকে আৰু ভালদৰে চলি থকা বুলি ভাবি বহুতে ইয়াক সলনি কৰিব নিবিচাৰে। কিন্তু ফ্ৰিজ পুৰণি হ’লে ইয়াৰ ভিতৰৰ যন্ত্ৰাংশসমূহৰ কাৰ্যক্ষমতা লাহে লাহে কমিবলৈ ধৰে আৰু কমপ্ৰেছৰটো দুৰ্বল হৈ পৰে। ফলত নিৰ্দিষ্ট উষ্ণতা বজাই ৰাখিবলৈ ফ্ৰিজটোৱে বহু বেছি কাম কৰিবলগীয়া হয়। ইয়াৰ উপৰি ফ্ৰিজৰ দুৱাৰৰ ৰবৰ আলগা হ’লে ভিতৰৰ ঠাণ্ডা বতাহ বাহিৰ ওলাই যায় আৰু কুণ্ডলীত ধূলি জমা হ’লে ঠাণ্ডা কৰাৰ ক্ষমতা কমি যায়। যন্ত্ৰটোৱে যিমান বেছি কষ্ট কৰিব, সিমানেই বিদ্যুৎ বিলৰ পৰিমাণো বৃদ্ধি পাব। বৰ্তমান সময়ৰ নতুন প্ৰযুক্তিৰ ফ্ৰিজসমূহ পুৰণি প্ৰযুক্তিতকৈ বহুত বেছি বিদ্যুৎ ৰাহি কৰিব পৰা ধৰণৰ হয়।
ফ্ৰিজ এটা সম্পূৰ্ণৰূপে বেয়া হৈ পৰাৰ আগতে কিছুমান স্পষ্ট সংকেত দিয়ে, যাৰ প্ৰতি চকু ৰখাটো অতি জৰুৰী। আপোনাৰ ফ্ৰিজটোৰ বয়স যদি দহ বছৰতকৈ বেছি হৈছে, তেন্তে কেইটামান কথা লক্ষ্য কৰক। ইয়াৰ কমপ্ৰেছৰটোৱে একেৰাহে ডাঙৰকৈ শব্দ কৰি থাকে নেকি, ফ্ৰিজৰ ভিতৰত থকা খাদ্যবস্তু আগতকৈ সোনকালে নষ্ট হ’বলৈ ধৰিছে নেকি, ফ্ৰিজৰ ভিতৰত অত্যধিক বৰফ জমা হৈছে নেকি অথবা কোনো কাৰণ নোহোৱাকৈয়ে প্ৰতি মাহে বিদ্যুৎ বিল বাঢ়ি গৈছে নেকি, এই সকলোবোৰ কথা পৰীক্ষা কৰা উচিত। এই লক্ষণসমূহে দেখা দিলে বুজিব লাগিব যে ফ্ৰিজটো সলনি কৰাৰ সময় হৈছে। বাৰে বাৰে পইচা খৰচ কৰি পুৰণি ফ্ৰিজ মেৰামতি কৰাতকৈ এটা নতুন আধুনিক ফ্ৰিজ কিনাটোৱেই বেছি লাভজনক, যিয়ে আপোনাৰ মাহিলী খৰচ বহু পৰিমাণে কমাই আনিব।
