একেখনেই চিত্ৰনাট্য। দুবছৰ আগৰ কাটাৰ বিশ্বকাপৰ ছেমি ফাইনেলৰ স্ক’ৰলাইনৰ হুবহু প্ৰতিফলন? সেইবাৰো ফ্ৰান্সে ২-০ গ’লত জয়লাভ কৰিছিল। আজিও স্ক’ৰব’ৰ্ডত একেটা নম্বৰ ২-০ জিলিকি থাকিল।
মৰক্কোৰ অদমনীয় ফুটবল বনাম ফৰাচী শিল্পৰ মনোমুগ্ধকৰ শৈলী। অৱশেষত কাইলিয়ান এমবাপে আৰু অউছমান ডেম্বেলৰ দুটা গ’লত আফ্ৰিকান দলটোৰ প্ৰতিৰোধৰ দেৱালখন আকৌ এবাৰ ছিন্নভিন্ন হৈ পৰিল।
অৱশ্যে প্ৰথমাৰ্ধৰ খেল চাই এই পৰিণতিৰ কথা কোনোমতেই অনুমান কৰিব পৰা হোৱা নাছিল।। যুঁজখন সমানে সমানে হৈছিল। খেলখনৰ ২৫ মিনিটৰ ভিতৰতে মৰক্কোৰ বক্সত এমবাপেৰ ফাউল হয়। লাভ কৰিলে পেনাল্টি। ফ্ৰান্সৰ ছুপাৰষ্টাৰগৰাকীয়ে দলটোক আগুৱাই নিয়াৰ সহজ সুযোগ লাভ কৰিছিল।
কিন্তু মৰক্কোৰ প্ৰত্যাহ্বান চম্ভালাৰ দায়িত্বত আছিল মৰক্কোৰ অভেদ্য গ’লৰক্ষক য়াচিন বেন’! ২৮ মিনিটত তেওঁ সোঁফালে জপিয়াই এমবাপেৰ শক্তিশালী স্পট কিকটো ব্লক কৰে। কাটাৰৰ স্মৃতি উজাৰি দি মৰক্কোৱে যেন যুদ্ধৰ বাৰ্তা প্ৰেৰণ কৰিলে। প্ৰথমাৰ্ধৰ আঘাতৰ সময়ত (৪৫+২ মিনিট) লুকাছ ডিগনৰ শক্তিশালী শ্বটটোৱে ক্ৰছবাৰত খুন্দা মৰাত বিৰতিৰ সময়লৈকে দুয়োটা দল গ’লশূন্যভাৱে ৰয়।
কিন্তু চেম্পিয়নসকল সদায় শেষ মুহূৰ্তৰ যাদুত পাৰ্গত। প্ৰথমাৰ্ধত পেনাল্টি মিছ কৰি হতাশাৰ প্ৰতীক হিচাপে পৰিগণিত হোৱা এমবাপেই দ্বিতীয়াৰ্ধত ফ্ৰান্সৰ শিল্পৰ মধ্যমণি হৈ পৰে। ৬০ মিনিটত ডেজিৰী ড’ইৰ নিখুঁত পাছৰ পৰা বলটো লাভ কৰি বক্সৰ বাওঁফালৰ পৰা সোঁ ভৰিৰে জুখিমাখি মৰা শ্বটটোৰে বেন’ক পৰাস্ত কৰে।
ফ্ৰান্স ১-০ত আগবাঢ়িল। এই এটা গ’লৰ আঘাত চম্ভালাৰ আগতেই ফৰাচীসকলে পুনৰ আঘাত কৰে। ৬৬ মিনিটত এমবাপে নিজে গ’ল নিদিলে, কিন্তু অউছমান ডেম্বেলক বলটো সজাই দিলে। বক্সৰ বাহিৰৰ পৰা ডেম্বলেৰ নিখুঁত শ্বট পোনে পোনে মৰক্কোৰ নেটত সোমাই গ’ল। ব্যৱধান ২-০ গ’লত ৰ’ল। খেলখনৰ ভাগ্য প্ৰায় তাতেই লিখা হৈ গৈছিল।
পিছ পৰি থকা মৰক্কোৰ প্ৰশিক্ষকগৰাকীয়ে সালসলনিৰ কাৰ্ড খেলিলে। ছোফিয়ানে আমাৰাবাট আৰু ছুফিয়ান ৰহিমী খেলপথাৰত নামিল। ৬৩ মিনিটত আগ্ৰাসী টেকেলৰ বাবে ইছা ডিঅ’পে হালধীয়া কাৰ্ড লাভ কৰে। আচ্ৰাফ হাকিমি বা ব্ৰাহিম ডায়েজে পুনৰ মেচখনত প্ৰৱেশ কৰিবলৈ যৎপৰোনাস্তি চেষ্টা কৰে। কিন্তু তেওঁলোকৰ হাতত মাইক মেইগনানৰ প্ৰাচীৰ আৰু ফৰাচী প্ৰতিৰক্ষাৰ অনুশাসন ভংগ কৰিব পৰা ক্ষমতা নাছিল।
A third straight Semi-final secured for France. 🇫🇷#FIFAWorldCup
— FIFA World Cup (@FIFAWorldCup) July 9, 2026
খেলখনৰ ৭৭ মিনিটত আঘাতৰ বাবে এমবাপে খেলপথাৰৰ পৰা আঁতৰি যোৱাটোৱে নিশ্চিতভাৱে ফ্ৰান্সৰ শিবিৰৰ বাবে কিছু চিন্তাৰ সৃষ্টি কৰিছিল। বিকল্প হিচাপে নমা খেলুৱৈ জিন ফিলিপ মেটেটাই ইনজুৰি টাইমত এটা সুযোগ পাইছিল যদিও বেন’ৱে সেইটো ৰক্ষা কৰে। অৱশ্যে ই ফৰাচীসকলৰ বিজয়ত বাধা নহ’ল।
