ইথানল মিশ্ৰিত পেট্ৰ’লে (E20) বাহনৰ মাইলেজ কিছু পৰিমাণে হ্ৰাস কৰে। অৱশেষত এই কথা স্বীকাৰ কৰিছে কেন্দ্ৰীয় চৰকাৰে। এক বিবৃতিত পেট্ৰলিয়াম মন্ত্ৰালয়ে কয় যে কমেও ৫ শতাংশ মাইলেজ কমে। কিন্তু কম ইথানল (E10) মিহলি কৰা পেট্ৰ’লতকৈ ই বিশুদ্ধ আৰু পৰিষ্কাৰ। অন্যান্য প্ৰদৰ্শনৰ ক্ষেত্ৰতো ইয়াৰ মানদণ্ড উন্নত।
সম্পূৰ্ণ পেট্ৰ’ল চালিত যানবাহনত E20 ব্যৱহাৰ কৰিলে যান্ত্ৰিক ক্ষতি হয় বুলি কোৱাটো শুদ্ধ নহয়। ২০০২ চনৰ পৰা এই সন্দৰ্ভত পৰীক্ষা-নিৰীক্ষা চলি আহিছে। যোৱা ১৩ বছৰৰ পৰীক্ষাত নিশ্চিত হৈছে যে ইথানল মিহলি কৰা পেট্ৰ’লে ইঞ্জিনৰ কোনো ক্ষতি নকৰে।
ইয়াৰ উপৰিও আনুষ্ঠানিকভাৱে উল্লেখ কৰা হৈছে যে আন্তঃগাঁথনিৰ বাবে দেশৰ এক লাখৰো অধিক পেট্ৰ’ল পাম্পত বিশুদ্ধ ই ১০ আৰু ই ২০ পেট্ৰ’ল একেলগে পোৱাটো সম্ভৱ নহয়।
আগতে দুখীয়া আৰু মধ্যবিত্ত পৰিয়ালৰ গৃহিণীৰ এটা কাম আছিল চাউলৰ পৰা শিলগুটি আঁতৰোৱা। নিৰ্দিষ্ট মূল্যত চাউল ক্ৰয় কৰিলেও চাউলৰ লগত শিলগুটি মিহলি আছিল। দাঁতত লাগিলে মানুহে বিৰক্তি আৰু বিষৰ অনুভুতিত ভুগিছিল। শিলগুটি মিহলি কৰাটো আছিল দুৰ্নীতি। ই অবৈধ আছিল।
কিন্তু আধুনিক ভাৰতত মোডী চৰকাৰে আনুষ্ঠানিকভাৱে পেট্ৰ’লত ইথানল মিহলাই বিক্ৰী কৰে। আৰু মূল্য লোৱা হয় বিশুদ্ধ পেট্ৰ’লৰ। ইয়াৰ ফলত বিৰোধী ৰাজনৈতিক দল আৰু সাধাৰণ ৰাইজৰ মাজত তীব্ৰ ক্ষোভ, বিৰক্তি আৰু প্ৰশ্ন উত্থাপিত হৈছে।
কিন্তু পেট্ৰলিয়াম মন্ত্ৰালয়ে শুকুৰবাৰে স্পষ্ট কৰি দিছে যে কম মূল্য লোৱা সম্ভৱ নহয়। কাৰণ, পেট্ৰলত ইথানল মিহলোৱাৰ প্ৰকৃত উদ্দেশ্য দেশৰ শক্তি সুৰক্ষা বৃদ্ধি কৰা, মূল্য হ্ৰাস কৰা নহয়। তদুপৰি কৃষকৰ উচিত প্ৰাপ্য নিশ্চিত কৰিবলৈ চৰকাৰে লাভজনক মূল্যত ইথানল ক্ৰয় কৰে। বিশ্ব বজাৰত বৰ্তমান খাৰুৱা তেলৰ যি মূল্য, তাত বিশুদ্ধ পেট্ৰ’লতকৈ ই-২০ উৎপাদনৰ খৰচ বেছি।
এই মুহূৰ্তত মূল অভিযোগ হ’ল পেট্ৰ’লৰ সৈতে ২০ শতাংশ ইথানল মিহলি কৰিলে গাড়ীৰ ইঞ্জিনৰ ক্ষতি হয়। মাইলেজ কমি যায়। চৰকাৰে এই তত্ত্ব একাধিকবাৰ খণ্ডন কৰিছে। কেন্দ্ৰীয় পথ পৰিবহণ মন্ত্ৰী নীতিন গাডকাৰীয়ে বছৰ বছৰ ধৰি গাড়ীত ইথানল ব্যৱহাৰৰ আটাইতকৈ ডাঙৰ যুক্তি আগবঢ়াই আহিছে।
বিৰোধীৰ অভিযোগ যে এতিয়া স্পষ্ট হৈ পৰিছে নীতিন গাডকাৰীয়ে কিয় যোৱা ১২ বছৰ ধৰি ইথানলৰ সমৰ্থক আৰু প্ৰচাৰক! কাৰণ তেওঁৰ দুয়োজন পুত্ৰৰ ইথানল উৎপাদন কোম্পানী আছে। অৱশ্যে গাডকাৰীয়ে এই অভিযোগ মানি ল’বলৈ অনিচ্ছুক।
শেহতীয়াকৈ ইথানলৰ ব্যৱহাৰৰ বিৰুদ্ধে হঠাতে হুলস্থুলৰ সৃষ্টি হৈছে। সেয়ে, এইবাৰ কেন্দ্ৰীয় পেট্ৰলিয়াম মন্ত্ৰালয়েও জনাইছে যে আটাইকেইটা আগশাৰীৰ আন্তঃৰাষ্ট্ৰীয় গাড়ী নিৰ্মাতাই ইথানলে কোনো ক্ষতি নকৰে বুলি উল্লেখ কৰিছে। যদিও এইবাৰ প্ৰথমবাৰৰ বাবে মন্ত্ৰালয়ে এক বিবৃতিত স্পষ্ট কৰি দিছে যে মাইলেজ কমে।
