বাংলাদেশৰ ৰাজধানী ঢাকাত অনুষ্ঠিত এখন আন্তঃৰাষ্ট্ৰীয় আলোচনা সভাত ভাৰতৰ ভুল মানচিত্ৰ প্ৰদৰ্শন কৰাক লৈ তীব্ৰ আপত্তি জনালে এগৰাকী ভাৰতীয় কূটনীতিকে। মানচিত্ৰখনত জম্মু-কাশ্মীৰক পাকিস্তানৰ অংশ হিচাপে দেখুওৱা হৈছিল বুলি প্ৰকাশিত প্ৰতিবেদনত উল্লেখ কৰা হৈছে।
৬ জুলাইত বাংলাদেশ ইনষ্টিটিউট অৱ ইণ্টাৰনেচনেল এণ্ড ষ্ট্ৰেটেজিক ষ্টাডিজ চমুকৈ BIISS-ৰ ঢাকাস্থিত প্ৰেক্ষাগৃহত ‘Rebuilding Trust, Renewing Regional Integration: Pathways for Revitalising SAARC’ শীৰ্ষক আলোচনা সভাখন অনুষ্ঠিত হৈছিল। দক্ষিণ এছিয়াৰ আঞ্চলিক সহযোগিতা সংস্থা SAARC-ক পুনৰ সক্ৰিয় কৰাৰ পথ সম্পৰ্কে আলোচনা কৰাই আছিল অনুষ্ঠানটোৰ মূল উদ্দেশ্য।
অনুষ্ঠানত ভাৰতত বাংলাদেশৰ প্ৰাক্তন উচ্চায়ুক্ত হিচাপে দায়িত্ব পালন কৰা তাৰিক এ কৰিমে মূল বক্তব্য আগবঢ়াইছিল। তেওঁৰ প্ৰেজেণ্টেচনৰ সময়ত পৰ্দাত প্ৰদৰ্শিত এখন মানচিত্ৰত জম্মু-কাশ্মীৰক পাকিস্তানৰ অংশ হিচাপে দেখুওৱা হয়। সেই সময়তে অনুষ্ঠানত উপস্থিত থকা ঢাকাৰ ভাৰতীয় উচ্চ আয়োগৰ দ্বিতীয় সচিব পূজা কুমাৰী ঝাই থিয় হৈ আপত্তি জনায়।
পূজা কুমাৰী ঝাই কয় যে প্ৰদৰ্শিত মানচিত্ৰখন শুদ্ধ নহয় আৰু জম্মু-কাশ্মীৰ ভাৰতৰ অবিচ্ছেদ্য অংগ। ইয়াৰ উত্তৰত তাৰিক এ কৰিমে মানচিত্ৰখন কেৱল বিষয়টো উপস্থাপন কৰাৰ উদ্দেশ্যে ব্যৱহাৰ কৰা হৈছিল আৰু ইয়াত প্ৰকৃত সীমাৰেখা দেখুওৱা হোৱা নাই বুলি স্পষ্টীকৰণ দিয়ে।
কিন্তু কৰিমৰ স্পষ্টীকৰণৰ পাছতো ভাৰতীয় কূটনীতিকগৰাকীয়ে নিজৰ বক্তব্য পুনৰ দোহাৰে। তেওঁ কয় যে জম্মু-কাশ্মীৰ ভাৰতৰ অংগ আৰু মানচিত্ৰখনত অঞ্চলটোক ভুলকৈ দেখুওৱা হৈছে। ইয়াৰ পাছত তাৰিক এ কৰিমে ভাৰতীয় কূটনীতিকগৰাকীৰ আপত্তি নথিভুক্ত কৰা হৈছে বুলি জানিবলৈ দিয়ে আৰু নিজৰ বক্তব্য অব্যাহত ৰাখে।
অনুষ্ঠানটোত বাংলাদেশৰ বৈদেশিক পৰিক্ৰমা বিভাগৰ ৰাজ্যিক মন্ত্ৰী শামা ওবাইদ ইছলাম মুখ্য অতিথি হিচাপে উপস্থিত আছিল। তেওঁ দক্ষিণ এছিয়াৰ দেশসমূহৰ মাজত বিশ্বাস, সহযোগিতা আৰু নিয়মীয়া আলোচনা বৃদ্ধি কৰি SAARC-ক পুনৰ সক্ৰিয় কৰাৰ প্ৰয়োজনীয়তাৰ ওপৰত গুৰুত্ব আৰোপ কৰে। ঘটনাটোৰ ভিডিঅ’ সামাজিক মাধ্যমত প্ৰচাৰ হোৱাৰ পাছত মানচিত্ৰৰ ভুল তাৎক্ষণিকভাৱে আঙুলিয়াই দিয়াৰ বাবে ভাৰতীয় কূটনীতিকগৰাকীক বহু লোকে প্ৰশংসা কৰিছে।
