আজি কিছু দিনৰ পূৰ্বে আৰক্ষী আয়ুক্ত হীৰেন নাথৰ নামত এক দুষ্ট চক্ৰই ভুৱা ফেচবুক একাউণ্ট খোলাৰ পিছতে এইবাৰ আৰক্ষী সঞ্চালক প্ৰধান কুলধৰ শইকীয়াৰ নামত ভুৱা ফেচবুক একাউণ্ট।
উল্লেখযোগ্য যে আৰক্ষী সঞ্চালক প্ৰধান গৰাকীৰ নামত ‘কুলধৰ শইকীয়া’ নামেৰে ১১ জুনত এটা ভুৱা একাউণ্ট কোনো দুৰ্বৃত্তই খোলে। আনহাতে জানিব পৰা মতে আৰক্ষী সঞ্চালক প্ৰধান গৰাকীৰ প্ৰকৃত একাউণ্টটো ‘কুল শইকীয়া’ বুলিহে ফেচবুকত আছে।
মন কৰিব লগীয়া যে ৮ জুনৰ কাৰ্বি আংলঙৰ ডকমকাৰ ঘটনাৰ পিছতে অসম আৰক্ষীয়ে ছচিয়েল মিডিয়াত আপত্তিজনক মন্তব্য কৰাসকলক এনে কাৰ্যৰ পৰা বিৰত থাকিবলৈ সতৰ্ক কৰি দিছিল। কিন্তু অসম আৰক্ষীৰ সতৰ্কবাণীক উপলুঙা কৰি এজন দুৰ্বৃত্তই আৰক্ষী আয়ুক্ত হীৰেন চন্দ্ৰ নাথৰ নামত এটা ভুৱা ফেচবুক একাউণ্ট খুলিছিল।
অৱশ্যে ইয়াৰ পিছতে আৰক্ষীয়ে এই ঘটনা সন্দৰ্ভত তদন্ত কৰি নগাঁৱৰ পৰা আৰক্ষী আয়ুক্ত গৰাকীৰ নামত ভুৱা ফেচবুক একাউণ্ট খোলাৰ অপৰাধত এজন দুৰ্বৃত্তক আটক কৰিছিল।
আনহাতে ইয়াৰ পিছতে ৰাজ্য চৰকাৰে ছচিয়েল মিডিয়া নীৰিক্ষণৰ বাবে এটা বিশেষ গোট গঠন কৰি দিছিল। কিন্তু ইয়াৰ পিছতো ছচিয়েল মিডিয়াত দুৰ্বৃত্তৰ উপদ্ৰৱ কমা নাই। এই কথা প্ৰমাণ কৰিছে এইবাৰ আৰক্ষী সঞ্চালক প্ৰধান গৰাকীৰ নামত কোনো দুষ্ট চক্ৰই খোলা ভুৱা ফেচবুক একাউণ্টে।
ইফালে আৰক্ষী সঞ্চালক প্ৰধান গৰাকীৰ নামত ভুৱা ফেচবুক একাউণ্ট খোলা প্ৰসংগ সন্দৰ্ভত আৰক্ষী আয়ুক্ত হীৰেন নাথে কয় যে, ‘ইতিমধ্যে পাণবজাৰ থানাত গোচৰ ৰুজু কৰা হৈছে, ক্ৰাইম ব্ৰাঞ্চৰ জৰিয়তে তদন্ত চলোৱা হৈছে আৰু উক্ত ঘটনাক লৈ ৰিপৰ্ট প্ৰেৰণ কৰা হৈছে, শীঘ্ৰে কৰায়ত্ত কৰা হ’ব দুৰ্বৃত্তক।’
