আমেৰিকাৰ ৰাষ্ট্ৰপতি ড’নাল্ড ট্ৰাম্পৰ হোৱাইট হাউছত এক কেলেংকাৰী সংঘটিত হৈছে, য’ত এজন কৰ্মচাৰীয়ে নিজৰ ৰাষ্ট্ৰপতিৰ ভাষণক লৈ জুৱা খেলি লাখ লাখ টকা উপাৰ্জন কৰাৰ অভিযোগ উত্থাপন হৈছে। অভিযুক্ত গেব্ৰিয়েল পেৰেজে ২০১৬ চনৰ পৰা হোৱাইট হাউছত ট্ৰাম্পৰ টেলিপ্ৰম্পটাৰ অপাৰেটৰ হিচাপে কাম কৰি আহিছিল আৰু ৰাষ্ট্ৰপতিগৰাকীয়ে ৰাজহুৱাভাৱে কি কি শব্দ ক’ব সেই কথা আগতীয়াকৈ জানিছিল কাৰণ ট্ৰাম্পৰ লিখিত ভাষণ তেওঁৰ কম্পিউটাৰৰ স্ক্ৰীণতে ভাহি উঠিব।
এই গোপন তথ্যৰ সুযোগ লৈ পেৰেজে কালছি নামৰ অনলাইন ভৱিষ্যদ্বাণী বজাৰ (প্ৰেডিকছন মাৰ্কেট) বা পণ প্লেটফৰ্মত একাউণ্ট খুলিছিল, য’ত ৰাজনৈতিক ব্যক্তিসকলে নিজৰ ভাষণত কিছুমান শব্দ ব্যৱহাৰ কৰিব নে নাই সেই বিষয়ে ধন লগাব পাৰে। ট্ৰাম্পৰ ষ্টেট অৱ দ্য ইউনিয়নৰ ভাষণ আৰু ৱৰ্ল্ড ইকনমিক ফ’ৰামৰ দৰে প্ৰায় ডজন সংখ্যক হাই-প্ৰফাইল ভাষণৰ ওপৰত বাজি ধৰি পেৰেজে সহজেই প্ৰায় এক লাখ ডলাৰ বা ৯০ হাজাৰ ডলাৰতকৈ অধিক লাভ কৰিছিল কাৰণ তেওঁ শব্দবোৰ আগতীয়াকৈ জানিছিল।
তদন্তত প্ৰকাশ পাইছে যে ট্ৰাম্পে বহু সময়ত ভাষণৰ মাজত স্ক্ৰীপ্ট সলনি কৰিলে পেৰেজে মাজভাগতে চতুৰতাৰে তেওঁৰ বাজি বাতিল কৰি দিছিল যদিও কালশী প্লেটফৰ্মৰ আভ্যন্তৰীণ নিৰীক্ষণ দলটোৱে সন্দেহজনক লেনদেনটো ধৰি পেলাই গম পায় যে একাউণ্টটো প্ৰকৃততে এজন চৰকাৰী কৰ্মচাৰীৰ। কালশী কৰ্তৃপক্ষই একাউণ্টটোৰ পৰা ধন উলিওৱা বন্ধ কৰি সমগ্ৰ বিষয়টো আমেৰিকাৰ ক’ম’ডিটি ফিউচাৰ্ছ ট্ৰেডিং কমিছন বা চিএফটিচিক জনোৱাৰ পিছতে হোৱাইট হাউছ সতৰ্ক হৈ পৰে।
হোৱাইট হাউছৰ প্ৰেছ সচিব কেৰলিন লিভিটে সংবাদ মাধ্যমৰ আগত কয় যে ৰাষ্ট্ৰপতি ট্ৰাম্পে এই বিষয়ে জানিব পাৰি অত্যন্ত ক্ষুব্ধ হৈ পৰিছে আৰু ইয়াক “অত্যন্ত লজ্জাজনক” বুলি অভিহিত কৰি অপাৰেটৰজনক তৎকালীনভাৱে বিনা বেতনে ছুটীত পঠিয়াবলৈ নিৰ্দেশ দিছে।
বৰ্তমান পেৰেজৰ হোৱাইট হাউছৰ কঠোৰ নৈতিক নিয়ম উলংঘা কৰাৰ বাবে চিএফটিচিৰ তদন্ত চলি আছে যদিও মানহাটানৰ ফেডাৰেল প্ৰচিকিউটৰসকলে এই কাণ্ডৰ কোনো ধৰণৰ অপৰাধমূলক অভিযোগ দাখিল কৰিবলৈ অস্বীকাৰ কৰিছে।
